Ñaporandu, jaiporu peteĩ téysto ha jahasa peteĩ kapítulope

Ñaikuaveʼẽ hag̃ua pe lívro Mbaʼépa añetehápe omboʼe la Biblia? ikatu 1) ñaporandu peteĩ mbaʼe pe óga járape ñañepyrũ hag̃ua ñañemongeta, 2) jalee peteĩ téysto vívliko japreparavaʼekue ha 3) jahechauka peteĩ kapítulo oho porãva pe ñañeʼẽva rehe. Upéva jajapóvo ikatu jalee umi porandu oĩva oñepyrũvo pe kapítulo. Pe óga jára oikuaasevéramo, ikatu ñahesaʼỹijo hendive mbykymi pe kapítulo jahechauka hag̃ua mbaʼéichapa ojejapo peteĩ estúdio. Upéicha ikatu jajapo ñamoñepyrũ hag̃ua peteĩ estúdio ñag̃uahẽ ypy jave térã jaha jeývo javisita pe óga járape.

◼ “Ndépa reimoʼã ñande, yvypóra rei, ikatuha jaikuaa ñande Apoharépe, heʼiháicha ñandéve koʼápe Ñandejára Ñeʼẽ?” Elee Hechos 17:26, 27, ha ehaʼarõ tokontesta. Upéi ehechauka kapítulo 1.

◼ “Koʼág̃a ñambohovái opaichagua provléma. Upéicharõ jepe, ndépa reimoʼã ikatuha jahupyty pyʼaguapy ha ikatuha ñahaʼarõ umi mbaʼe oútava, ojehechaukaháicha koʼápe?” Elee Romanos 15:4, ha ehaʼarõ tokontesta. Upéi ehechauka kapítulo 2.

◼ “Nde ikatúramo, rejapónepa koʼã mbaʼe ojeʼéva koʼápe?” Elee Revelación 21:4, ha ehaʼarõ tokontesta. Upéi ehechauka kapítulo 3.

◼ “Ndépa reimoʼã ñane familiakuéra ikatúne hag̃ua ohupyty koʼã mbaʼe porã ojeʼevaʼekue ko purahéi yma guarépe?” Elee Salmo 37:10, 11, ha ehaʼarõ tokontesta. Upéi ehechauka kapítulo 3.

◼ “Ndépa ere ikatúne hag̃ua oiko ko ojeʼéva koʼápe?” Elee Isaías 33:24, ha ehaʼarõ tokontesta. Upéi ehechauka kapítulo 3.

◼ “Ndépa reñeporandúmava umi omanóvapa oikuaa mbaʼépa ñande jajapo?” Ehaʼarõ tokontesta. Upéi elee Eclesiastés 9:5, ha ehechauka kapítulo 6.

◼ “Ndépa reimoʼã ikatúne hag̃ua jahecha jey umi ñane hénte omanovaʼekuépe, Jesús heʼihaguéicha koʼã téystope?” Elee Juan 5:28, 29, ha ehaʼarõ tokontesta. Upéi ehechauka kapítulo 7.

◼ “Mbaʼéichapa, vaicha ndéve, ojejapóta ko yvy ape ári pe Ñandejára oipotáva, ojejapoháicha amo yvágape, heʼiháicha ko ñemboʼe ojeporuetévape?” Elee Mateo 6:9, 10, ha ehaʼarõ tokontesta. Upéi ehechauka kapítulo 8.

◼ “Ndépa reimoʼã jahechamahañaína koʼã mbaʼe ojeʼevaʼekue ko profesíape?” Elee 2 Timoteo 3:1-4, ha ehaʼarõ tokontesta. Upéi ehechauka kapítulo 9.

◼ “Heta oĩ oikuaaséva mbaʼérepa ivaive ohóvo umi provléma opavavépe ñanderupytýva. Ndépa reimoʼã ikatuha oikohína ko heʼiháicha koʼápe?” Elee Revelación 12:9, ha ehaʼarõ tokontesta. Upéi eiporu kapítulo 10.

◼ “Ndépa reikuaaséva avei mbaʼérepa jahecha oiko pe heʼiháicha koʼápe?” Elee Job 21:7, ha ehaʼarõ tokontesta. Upéi ehechauka kapítulo 11.

◼ “Ndépa repensa peteĩ família ovyʼavetaha oiporúramo ko marandu omeʼẽva Ñandejára Ñeʼẽ?” Elee Efesios 5:33, ha ehaʼarõ tokontesta. Upéi ehechauka kapítulo 14.

Rehechauka rire mbaʼéichapa ojejapo peteĩ estúdio, restudiavéramo dos vése ikatúma reinforma, rehecháramo osegitaha pe estúdio.