“Pesegíkena pejapo” Conmemoración hoʼáta 5 de abril
1. ¿Mbaʼérepa kristianokuérape g̃uarã iñimportanteterei pe Conmemoración?
1 Jesús ningo heʼivaʼekue hemimboʼekuérape ogueromanduʼa hag̃ua pe sakrifísio ojapovaʼekue yvyporakuéra rehehápe, upévare heʼi chupekuéra: “Pesegíkena pejapo kóva penemanduʼa hag̃ua cherehe” (Luc. 22:19, NM). Jesús omano rupi ñanderehehápe ñandepeʼa pekádo ha ñemano poguýgui, upévare kristianokuérape g̃uarã iñimportanteterei pe Conmemoración, ko áñope hoʼatahína 5 de abril. Oñemoag̃uívo upe ára, ¿mbaʼépa ikatu jajapo jahechauka hag̃ua jaagradeseha Jehovápe? (Col. 3:15.)
2. ¿Mbaʼéichapa jahechaukáta ñamombaʼeha pe Conmemoración?
2 Jajepreparákena. Jaikuaa jave oikotaha peteĩ mbaʼe iñimportánteva katuete jajeprepara porã. Upéicha avei, hiʼag̃uívo pe Conmemoración tekotevẽ japrepara porã ñane korasõ, ha upearã ikatu jastudia ha jajepyʼamongeta ñande rogayguándi umi mbaʼe oikovaʼekuére Jesús omano mboyvemi (Esd. 7:10). Ñane kalendário ha folléto Ñahesaʼỹijo Ñandejára Ñeʼẽ ára ha ára oreko umi téysto omombeʼúva Jesús ohasavaʼekue. Avei ikatu relee lívro El hombre más grande, upearã nepytyvõta pe lísta osẽvaʼekue Ñemañaha 1 de abril 2011, páhina 15 ha 16-pe.
3. ¿Mbaʼéichapa avei jahechaukáta ñamombaʼeha pe Conmemoración?
3 Japredikákena. Ñasẽ meméramo japredika jahechaukáta avei ñamombaʼeha pe Conmemoración (Luc. 6:45). Ág̃a sábado 17 de marzo guive ñasẽta ñainvita umi héntepe ou hag̃ua Conmemoraciónpe. ¿Ikatúpa ñamohenda porã ñane tiémpo ñasẽve hag̃ua predikasiónpe, térã jajapo hag̃ua prekursorádo auxiliár? Jajapo vove ñande Aty Jastudia Hag̃ua Ñande Rogayguándi iporãta ñañemongetáramo upévare.
4. ¿Mbaʼépa jahupyty jaha rupi Conmemoracionhápe?
4 ¡Hetaiterei mbaʼe porã ningo jahupyty jaha rupi Conmemoracionhápe káda áño! Ñanemokyreʼỹeterei ha jahayhuve Jehovápe jajepyʼamongetávo mbaʼéichapa haʼe imbaʼeporã ñanendive omeʼẽvo itaʼýra peteĩete ñande rehehápe (Juan 3:16; 1 Juan 4:9, 10). Avei ñanemomýi ani hag̃ua ñapensa ñandejehénte ha ñanepytyvõ ñañeʼẽ hag̃ua Jehováre tahaʼe haʼévape (2 Cor. 5:14, 15; Sal. 102:19-21). Upévare, jaagradeségui Jehovápe, jaipotaitereíma og̃uahẽ 5 de abril ñagueromanduʼa hag̃ua Jesús omano hague ára (1 Cor. 11:26).