Jahechaukákena ñamombaʼeha Conmemoración ojejapóta 17 de abril
1. Mbaʼépa heʼivaʼekue pe salmísta ha mbaʼérepa ikatu ñañeñandu avei upéicha Conmemoración tiémpope?
1 Pe salmísta omombaʼeterei Jehovápe ohechávo mbaʼeichaitépa oiporiahuvereko ha oguenohẽ chupe heta jejopy vaígui, upévare heʼi: “Mbaʼéicha piko ikatúta amyengovia Ñandejárape haʼe ipyʼaporãite haguére chendive?” (Sal. 116:12). Koʼág̃a koʼýte ñande ñañeñandu upéicha, Jehová ombou rupi Itaʼýra omano hag̃ua ñanderehehápe ha ñandepeʼa pekádo ha ñemano poguýgui. Upévare, jahechaukákena ñamombaʼeha ko jopói jajepreparávo ñanemanduʼa hag̃ua Jesús omano hague árare, ág̃a 17 de abril (Col. 3:15).
2. Mbaʼérepa ñamombaʼevaʼerã Jesús sakrifísio?
2 Umi mbaʼe porã jahupytýva. Jesús omano rupi ñanderehehápe ‘ojeheja rei ñandéve ñane rembiapo vaikue’ (Col. 1:13, 14). Upévare ikatu jaservi Jehovápe konsiénsia potĩ reheve (Heb. 9:13, 14). Ñañemboʼe ñande pyʼaite guive ha ñamombeʼu chupe opa mbaʼe ñañandúva (Heb. 4:14-16). Avei jajerovia rupi Jesús sakrifísiore ikatúta jaiko opa ára g̃uarã (Juan 3:16).
3. Mbaʼéichapa ikatu jahechauka jaagradeseha Jehovápe omeʼẽ haguére Itaʼýra ñanderayhupápe?
3 Jahechauka ñamombaʼeha. Mbaʼéichapa ikatu jahechauka jaagradeseha Jesús sakrifísio? Primero, jasegivaʼerã pe prográma jalee hag̃ua la Biblia oñemoĩva Conmemoración tiémpope g̃uarã, ha jajepyʼamongeta hese. Ha upéva jajapo hag̃ua ñanepytyvõta pe artíkulo “¿Está usted listo para el día más importante del año?”, osẽva La Atalaya del 1 de febrero 2011-pe (ko artíkulo osẽta avei Ñemañaha abril-júniope). Segundo, ñañemboʼevaʼerã Jehovápe ñande pyʼaite guive ha jaagradese chupe omeʼẽ haguére Itaʼýra ñanderayhupápe (1 Tes. 5:17, 18). Tercero, jahavaʼerã Conmemoracionhápe ha péicha ñaneñeʼẽrendu Jesúspe (1 Cor. 11:24, 25). Ha cuarto, jahechaukavaʼerã japorohayhuha Jehová ojapoháicha ha ñainvita opa ikatúvape ou hag̃ua ñanemoirũ upe árape (Isa. 55:1-3).
4. Mbaʼépa jajapovaʼerã oñemoag̃uívo Conmemoración ára?
4 Umi kristiáno omombaʼéva Jesús sakrifísio nopensái pe Conmemoración haʼeha peteĩ rreuniónte. Oikuaa iñimportantetereiha upe rreunión ojejapóva káda áño. Upévare, oñemoag̃uívo upe ára jajapovaʼerã pe salmísta heʼi haguéicha: ‘Amombaʼeguasu Ñandejárape che pyʼaite guive, ndacheresaraichéne omeʼẽ hague chéve heta mbaʼe porã’ (Sal. 103:2).