Ñañehaʼãkena japredika hekopete kállere
1. Mbaʼéichapa ikatu ñahaʼanga Jesúspe?
1 Oĩ aja ko yvy ape ári, Jesús ndokyhyjeivaʼekue opredika hag̃ua umi héntepe tapére térã oimeraẽ hendápe (Luc. 9:57-61; Juan 4:7). Haʼe omombeʼusetereivaʼekue opa ikatúvape ko marandu iñimportantetéva. Koʼág̃a rupi ñande avei japredikávo kállere jareko peteĩ oportunida ijojahaʼỹva ñaipytyvõ hag̃ua ñande rapichakuérape oikuaa hag̃ua Ñandejára rembipota (Pro. 1:20). Ha ñane rembiapo osẽ porãvétantema ñanembaʼerechakuaárõ ha ñande voi ñañemoag̃uíramo ñañemongeta hag̃ua ñande rapichándi.
2. Mbaʼérepa iporãvéta ñande voi ñañemoag̃uíramo ñande rapicháre?
2 Ñande voi ñañembojavaʼerã. Iporãvéta ningo ñande voi jaháramo ñañemongeta ñande rapichándi, japytarangue peteĩ hendápe ñañemboʼy térã jaguapy ñahaʼarõ tou hikuái. Ñañehaʼãvaʼerã japukavy, ñamaña hováre ha ñanderory ñañeʼẽvo chupe. Ohóramo ñanendive ótro maranduhára, iporãvéta ñañembojáramo peteĩteĩ japredika hag̃ua. Ha ohendu porãramo ñaporandukuaa chupe ikatúpa ótro día ñañemongetave hendive. Oĩ maranduhára opredika meméva peteĩ kállere, upévare ojotopa jey jepi umi oñemongetavaʼekuéndi ha péicha oñeʼẽve chupekuéra pe marandu porãre.
3. Mbaʼéichapa jahechaukáta ñanembaʼerechakuaaha japredika jave kállere?
3 Tekotevẽ ñanembaʼerechakuaa. Jaiporavokuaavaʼerã mbaʼe kállerepa japredikáta ha natekotevẽi ñañeʼẽ entéro ohasávape, síno jaiporavovaʼerã mávandipa ñañemongetáta. Avei tekotevẽ ñanembaʼerechakuaa. Pór ehémplo, jahecháramo peteĩ ojapuráva ohóvo ani jajoko chupe; ha japredikáramo peteĩ negósio renondépe ñañatendevaʼerã ani ñambopochy ijárape. Iporãve ningo ñañemongeta umi héntendi osẽnguévo pe negósiogui, ñañeʼẽrangue hendivekuéra oike mboyve. Ñañatendevaʼerã ani ñamondýi umi héntepe ñañembojávo hendapekuéra. Avei jahechavaʼerã mávapepa ñameʼẽta umi puvlikasión. Iporãvéta ñameʼẽramo peteĩ tratádo umi nañanerenduporãivape, ñameʼẽrangue rrevísta.
4. Mbaʼérepa javyʼa ha jahupytýta hetave mbaʼe porã japredikávo kállere?
4 Japredikávo kállere ikatu ñamog̃uahẽ hetavépe pe marandu porã (Ecl. 11:6). Ikatu avei jatopa umi hénte ndaiporivaʼekue hógape jahárõ guare japredika ogahárupi. Upéicharõ, ñañehaʼãkena japredika kállere ikatu hag̃uáicha javyʼa ha jahupyty hetave mbaʼe porã Ñandejára servísiope.