Jajeroviákena Jehová rehe

1. Mbaʼe témapa oguereko ñane asámblea de distríto, ha mbaʼérepa ou porãta ñandéve?

¹ ‘Ñandejára niko hekojoja’, ohai Isaías. “Ovyʼaitéta umi hese ojeroviáva!” (Isa. 30:18b). La Biblia ohechauka Ñandejára heta vésema ohundihague umi iñañávape ha osalvahague isiervokuérape. Mbaʼépa oaprende umi mbaʼégui Jehová siervokuéra koʼag̃agua? Mbaʼépa ikatu jajapo ñaime porã hag̃ua “og̃uahẽvo Ñandejára ára, tuichaitéva ha ojekyhyjeha”? (Joel 3:4, 5 [2:31, 32, NM]) Ñane Asambléa de Distríto “Koʼẽrõitéma ñanesãsóta!” ñanepytyvõta jajepyʼamongeta hag̃ua umi mbaʼére, jahecha hag̃ua mbaʼéichapa ñande ñaimeñaína. Ñanepytyvõta jasegi hag̃ua jajerovia Jehová rehe.

2. Mbaʼéichapa ikatu jahechauka ñamombaʼeha ñane asambléa de distríto?

² Ndépa rejepreparáma reime hag̃ua káda día asambleahápe? Pór ehémplo, reñeʼẽmapa ne patrón ndive, omeʼẽ hag̃ua ndéve permíso? Ani rehaʼarõitereítei reñeʼẽ hag̃ua. Eñemboʼe Jehovápe ha upéi ejerure pe permíso (Neh. 2:4, 5). Upéicha avei, ani ñahaʼarõiterei jahecha hag̃ua mbaʼéichapa jaháta, moõpa jakéta ha oimeraẽ mbaʼe ñaikotevẽtava. Upéicha jajepreparáramo voi porã, jahechauka ñamombaʼeha pe tembiʼu espirituál Jehová omeʼẽtava ñandéve. Umi ansiáno ohechavaʼerã mávapepa ikatu oipytyvõ ojeprepara porã hag̃ua, espesialménte umi ijedávape (Gál. 6:10).

3. Mbaʼéichapa pe asambléa jerére ojehechavaʼerã peteĩ Testigo heko porãha?

³ Ñanerembiapo porãramo ñambotuicha Ñandejárape. Ñandeaty heta jave peteĩ asamblearã, ñanerembiapo porã rupive oñeñeʼẽ porã Jehová siervokuérare. Mbaʼépa upévare oñehaʼarõ ñandehegui? Ñaime aja pe asambléa jerére, peteĩ hotel-pe, rrestaurántepe térã ótro hendápe, umi oñemongetáva ñanendive ipiroʼyvaʼerã ohechávo mbaʼéichapa peteĩ kristiáno heko porã, ipasiénsia, ndaipochyreíri, ojejokokuaa ha nohaʼarõietereiha hapichakuéragui (Gál. 5:22, 23; Fil. 4:5). Ohechavaʼerã japorohayhuha, ha upévare “nañanetieʼỹi ha nañandenteséi, nañandepochýi ha nañandepyʼarasýi avave ndive”. Jatopáramo umi mbaʼe noĩporãiva jepe, ñañehaʼãvaʼerã ‘ñamombaʼeguasu Ñandejárape opa mbaʼe jajapóvape’ (1 Cor. 10:31; 13:5).

4. Mbaʼéichapa tuvakuéra ikatu oipytyvõ itaʼyrakuérape heko porã hag̃ua, ha upéva rupive ombotuicha hag̃ua Jehovápe?

⁴ Opa rire peteĩ asambléa, peteĩ hotel rehe oñangarekóva ohecharamoiterei mbaʼéichapa umi mitãrusu heko porã ha oñemonde porã, ha upévare heʼi ‘hiʼãha chupe Jehová testigokuéra opyta meme upe hotel-pe’. Ajépa javyʼa umícha ñahendúvo! Jaguerohory ituvakuérape omboʼe porã ha oñangareko porã haguére hesekuéra. Tuvakuéra ndohejaivaʼerã voi itaʼyrakuérape peteĩ hotel-pe oĩʼỹre avave oñangarekóva hesekuéra. Mitãnguérare oñeñangarekovaʼerã opaite árape (Pro. 29:15). Tove tombotuicha ha tombovyʼa Jehovápe umi mitãrusu hembiapo porãva (Prov. 27:11).

5. Mbaʼéichapa ñande jeguaka ha pe ñamondéva rupive ikatu ñambotuicha Jehovápe?

⁵ Ñañemonde ha ñañembojegua hekópe porã. Enterove ñaipytyvõta oñeñeʼẽ porã hag̃ua ñanderehe pe asambléa oikohápe ndajaiporúiramo umi móda ha jeguaka osẽva sapyʼa g̃uarãnte, térã nañanemoʼãporãiva térã umi ojeporúva ñasẽtarõ jaguata. Ñañemonde porã vaʼerã jaha aja asamblearã ha jaju jeývo, ñaipytyvõ aja asambléa mboyve, ha ñaime aja pe asambleahápe. Ñande jaservi Jehovápe, ha upévare jajepyʼapyve oñeñeʼẽ porã hag̃ua Jehová rérare. Ñambotapykue umi mbaʼe ikatúva ñandévente ñandegusta térã ñanembovyʼa. Túva ha sy oñatendevaʼerã hogayguakuéra oñemonde hag̃ua hekópe porã opaite árape (1 Tim. 2:9).

6. Mbaʼérepa iporã ñañemonde hekópe porã ñaime rei jave, ñañemonde porãháicha ñaime aja asambleahápe?

⁶ Iñimportánte avei ñañemonde hekópe porã ñaime rei jave pe hotel-pe, umi negósio rupi térã peteĩ rrestaurántepe. Ñasẽramo ñasena peteĩ rrestaurántepe opa rire pe prográma, iporã vaʼerã ñañemondéramo pe asambléape ñaimehaguéicha. Ndajaipeʼáiramo ñande tarhéta asambléa rehegua ikatúta japredika oimehápe (2 Cor. 6:3, 4).

7. Mbaʼéichapa ikatu ñaipytyvõ oĩ porãmba ha ojevyʼa hag̃ua asambleahápe? (Ehecha “Marandukuéra Asambléa de Distrítope g̃uarã.”)

⁷ Isaías heʼi: “Ñandejára peneraʼarõ pendeporiahuvereko jey hag̃ua; hiʼãitéma chupe ohechauka peẽme imborayhu” (Isa. 30:18a). Jaagradeséramo Jehovápe iporiahuvereko ha ipyʼaporãhaguére ñanendive ñamereseʼỹre, ñambotuicháta chupe ñanerembiapo porã ha ñañemonde porã rupive ñaime aja asambleahápe. Ko ñane Asambléa de Distríto “Koʼẽrõitéma ñanesãsóta!” tomombaʼeguasu Ñandejárape, ha tañanepytyvõ jajeroviave hag̃ua hese!

[Rrekuádro oĩva páhina 5-pe]

Marandukuéra Asambléa de Distrítope g̃uarã

◼ Prográma. Oñepyrũta 9:30 káda pyhareve ha ikatúta ojeike lás 8:00 guive. Oñepyrũ mboyvemi, pe sesión omoakãva oguapýta pe platafórmape umi kántiko ipu aja. Upérõ g̃uarã hiʼãyma enterove jaguapypa, ikatu hag̃uáicha pe prográma oñepyrũvo opa mbaʼéma oĩ hendápe porã. Pe prográma kaʼarugua opáta viernes 5:15, sábado 5:05 ha domingo 4:10.

◼ Estasionamiénto. Oĩháme estasionamientorã ñande ñañangarekóva, ikatúta ojeporu ojepagaʼỹre mbaʼeve. Ojeikéta henyhẽ meve pe lugár. Jaike hag̃ua jahechaukavaʼerã ñande tarhéta asambléa rehegua. Ndatuicháiramo pe estasionamiénto, umi oguerekóva áuto ikatu oñomongeta oho hag̃ua oñondive. Upéicha káda áuto ikatúta henyhẽ, ohorangue peteĩ térã mokõinte káda áutope.

◼ Jaguapy hag̃ua. Ikatu ñañongatu lugár oguapy hag̃ua ñande rogayguakuéra, térã umi ohóva ñanendive ñande áutope.

◼ Ñane rembiʼurã. Jaguerahákena ñane rembiʼurã, ani hag̃ua ñasẽ asajekue jaheka pe jaʼuvaʼerã. Ikatu jagueraha peteĩ mbaʼyru ñamoĩ hag̃ua ñane asiénto guýpe. Pe asambléa oikohápe ndaikatúi jagueraha mbaʼyru tuichaitereíva, votélla de vídrio ni vevída alkoólika.

◼ Kontrivusión. Ojejapo hag̃ua peteĩ asambléa de distríto heta ojegasta. Jahechauka hag̃ua ñamombaʼeha upéva, ikatu ñamoĩ ñane kontrivusión obra mundial-pe g̃uarã ñane Salón del Réinope térã pe asambléa oikohápe. Oñemoĩramo cheque, ojejapovaʼerã Asociación Torre de Vigía rérape.

◼ Aksidénte ha emerhénsia. Umi ombaʼapóva emerhénsiape heʼi oñehenói reiha chupekuéra umi provléma michĩvare. Oĩramo peteĩ hasyetéva asambleahápe oñehenói raẽ vaʼerã peteĩ akomodadórpe. Haʼe ohenóita pyaʼe porã Primeros Auxilios departaméntope. Upépe oĩ umi ikatúva oñatende pe hasývare. Haʼekuéra ndaikatúiramo oipytyvõ, heʼíta mbaʼépa ikatu ojejapo. Tekotevẽramo, ohenóita hikuái 911-pe.

◼ Umi nohenduporãivape g̃uarã. Ikatúta ojeporu rrádio FM oñehendu hag̃ua hiʼag̃uiha rupi pe prográma. Oñepyrũvo pe asambléa oĩta peteĩ marandu upéva rehegua. Upéva oiporútava oguerahavaʼerã peteĩ rrádio FM ha peteĩ aurikulár omoĩ hag̃ua ijapysápe.

◼ Ojegrava hag̃ua. Pe asambléa oikohápe ndaikatúi oñemoĩ mbaʼeveichagua gravadóra pe sistéma eléktrikore, ni pe sistéma de sonídore, ha ikatu ojeporu nomolestáiramo avavépe.

◼ Fóto oguenohẽsévape g̃uarã. Renohẽtaramo fóto, aníkena reiporu flash pe prográma aja.

◼ Selulár ha komunikadór. Umíva oñemoĩvaʼerã ani hag̃uáicha oporomolesta.

◼ Ojejapo hag̃ua rrevisíta. Ojetopáramo asambléa aja peteĩ oikuaasevéva, ojeporuvaʼerã pe formulário Sírvase visitar (S-43-S). Puvlikadorkuéra ikatu ogueraha asambleahápe peteĩ térã mokõi. Oĩta avei formulário pe Departaménto de literatúrape. Umi oñemyenyhẽva ikatu ojeheja Departaménto de literatúrape, térã reho rire pe asambléagui ikatukuaa remeʼẽ pe sekretáriope ne kongregasiónpe (Ehecha Nuestro Ministerio del Reino febrero de 2005, páhina 6).

◼ Rrestauránte. Oĩ rrestauránte ohaʼarõva oñemeʼẽ 15 térã 20 pór siénto propína pe mósope, ojapo porãramo hembiapo.

◼ Hotel. 1) Reiporútaramo peteĩ hotel reñongatukavaʼerã umi koty reikotevẽtavante, ha ndoikeivaʼerã peteĩ kotýpe hetave pe hotel oipotávagui. 2) Ndereiporumoʼãiramo peteĩ koty reñongatukavaʼekue reikuaaukavaʼerã upéva pyaʼe porã pe hotel-pe. 3) Egueraha reiporúta javénte pe karríto omoĩva pe hotel. 4) Ani rekosina nde kotýpe pe hotel ndoipotáiramo. 5) Eheja propína káda día pe koty oñangarekóvape g̃uarã. 6) Ani reiporu vai pe tembiʼu oñemoĩva rambosag̃ua, térã pe kafe ha iélo oñemoĩva reiporu hag̃ua reime aja pe hotel-pe. 7) Reñemongeta vove upépe ombaʼapóva ndive, rehechaukavaʼerã pe frúto Ñandejára espíritu omoheñóiva, espesialménte oñembaʼapo jave nde kuatiáre reike hag̃ua pe hotel-pe ha resẽta jave.