Ñamoirũ Jesucrístope hekopete

1. Mbaʼéichapa ñande aty guasu ko áñope g̃uarã ñanepytyvõta jajapo hag̃ua opa mbaʼe hekopete?

¹ La Biblia heʼi Mburuvicha Guasu Jehováre, hekoitépe ojapoha opa mbaʼe (Sal. 104:1). Jesús katuete oñeʼẽ ha ojapóvami opa mbaʼe omombaʼeguasu hag̃ua Itúvape ha umi mbaʼe Haʼe oipotáva (Juan 17:4). Enterove ikatúta jajapo Jesús ojapohaguéicha ha ñamombaʼeguasu Jehovápe ñande Aty Guasu hiʼag̃uimbaitémavape “Ñamoirũ Jesucrístope”.

2. Mbaʼéichapa ñamombaʼeguasu Jehovápe ñañehaʼãramo jaha viernes guive ñande aty guasúpe?

² Ñamombaʼeguasu Jehovápe hekopete. Jajapóta upéva jajepreparávo koʼág̃ama voi jaha hag̃ua ñande aty guasúpe ha ñaikumby hag̃ua umi mbaʼe Jehová ñanemboʼétava. Ñañeʼẽmapa ñane patrón ndive ha jahechámapa jaha hag̃ua viernes guive ñande aty guasúpe? Rehechámapa reho hag̃ua voimi reheve reheka hag̃ua moõpa reguapýta, ha upéicha repurahéi ha reñemboʼe hag̃ua avei oñemoñepyrũvo? Reikuaámapa mbaʼépa regueraháta nde karurã upe aty guasu jave ikatu hag̃uáicha reime ermanokuéra ndive upépe? Oñepyrũvo pyhareve térã kaʼaru ñande aty guasu, pe omoakãvahína heʼíta ñandéve jaguapýma hag̃ua oñemoĩ mboyve pe músika, nañañemongetaveimavaʼerã ha jaguapýma ñahaʼarõ oñepyrũ pe prográma.

3. Mbaʼéichapa jajapysaka porãramo ojeʼévare jahechauka ñamombaʼeha ñande aty guasu?

³ Jajapysaka porãramo umi diskúrsore ñamombaʼeguasúta avei ñande Ru yvagapeguápe. Peteĩ periodísta oho rire ñande aty guasuhápe, heʼi oimeraẽva ohecharamotaha “mbaʼéichapa enterove ojapysaka porã kirirĩhápe umi oñeʼẽvare ha ojekuaa hesekuéra oikuaaseveha Ñandejára rapégui”. Heʼi avei “hetaiterei mitã oĩ [...], ha nañaimoʼãiramo jepe ilája porã ha oheka hikuái umi téysto Ñandejára Ñeʼẽme”. Oñemeʼẽ aja diskursokuéra noñeñeʼẽivaʼerã vyroreíre, noñemondoivaʼerã mensáhe, ndojekarúi térã ndojeguataivaʼerã pasíllore. Umi mitãkuimbaʼe ha mitãkuñanguéra oguapyvaʼerã ituvakuéra ykére. Upéicharõ, ituvakuéra oipytyvõta chupekuéra oñatende hag̃ua ojeʼévare hína (Deu. 31:12; Pro. 29:15). Péicha jahechaukáta ñamombaʼeha ñande rapichakuérape ha umi mbaʼe porã Ñandejára ñanemboʼevahína.

4. Mbaʼérepa ñañemondevaʼerã hekope porã jaha jave ñande aty guasúpe?

⁴ Ñañemondékena hekopete. Oĩ heta omombaʼevaʼekue peteĩ diskúrso hérava “Ñande reko porãkena opa árape kristiáno teéicha”, ha oñemeʼẽvaʼekue ñande aty guasúpe pe áño ohasavaʼekuépe. Upe diskúrsope ojehechauka porã kuri ñande jaservíva Ñandejárape ñañehaʼãvaʼerãha jahechauka ñande reko porãha ñañemonde ha ñañembojeguávo hekopete. Ko áñope ñañatende porã jey vaʼerã ko mbaʼére. Ñane ñemondére jahechaukañaína jahayhúpa Jehovápe ha tuicha mbaʼépa ñandéve g̃uarã ñañeʼẽ hérape. Akóinte ñañemondevaʼerã peteĩ ‘omombaʼévaicha Ñandejárape’ (1 Tim. 2:9, 10).

5. Mbaʼéichapa ikatu jahechauka jaserviha Ñandejárape nañaiméi jave ñande aty guasuhápe?

⁵ Ñañemondevaʼerãpa hekopete jaha hag̃ua ñande aty guasuhápente? Ñanemanduʼavaʼerã oĩtaha heta ohecháva ñande tarhéta upe táva jahahápe ñande aty guasurã. Mbaʼéichapa ñane ñemonde ohechaukavaʼerã ñande ndahaʼeiha oimehaichagua. Upévare, japytuʼu jave, tahaʼe jaháramo jaguata asambléa rire, ñañemonde porã vaʼerã, ojekuaavaʼerã ñanderehe jahaha upe távape ñande aty guasurã, ha ndajaiporuivaʼerã kasõ vakéro, kasõ mbyky térã kamiséta. Upéicharõ, hetaitereípe ñamog̃uahẽta pe marandu porã. Ñambopyʼarory Jehovápe ñande aóre ojekuaáramo jaserviha chupe.

6. Mbaʼeichagua mbaʼe porãpa jahupytýta jajapóramo opa mbaʼe hekopete?

⁶ Umi mbaʼe porã jahupytýva. Jajapóramo opa mbaʼe hekopete ñande aty guasu jave, ikatúta japredika oimehápe ha imanduʼa porãta avei ñanderehe umi ñanderecháva. Opávo peteĩ aty guasu, peteĩ mburuvicha heʼi: “Ndahecháiva gueteri peichaite peve heko porãva. Peẽ ningo peiko Ñandejára oipotahaichaite”. Jajapóramo hekopete opa mbaʼe jahechaukáta ñañomombaʼe ha jajoayhuha, ha péicha ñamombaʼeguasúta Jehovápe (1 Ped. 2:12). Jahechaukáta avei tuicha mbaʼeha ñandéve g̃uarã jaikuaave ñande Ru yvagapeguápe (Heb. 12:28). Ñañehaʼãmbaitékena jajapo opa mbaʼe hekopete ñahaʼarõ aja ñande Aty Guasu ‘Ñamoirũ Jesucrístope’.

[Rrekuádro oĩva páhina 3-pe]

Marandukuéra Aty Guasu rehegua

◼ Mbaʼe órapa oñepyrũta. Oñepyrũta 9:20 káda pyhareve ha ikatúta ojeike la 8:00 guive. Oñepyrũvo ipu umi kántiko, hiʼã enterovéma jaguapypa ikatu hag̃uáicha oñepyrũ porã. Ko ñande aty guasu opáta 5:05 viernes ha sábado kaʼaru, ha domingo katu opáta 4:10.

◼ Moõpa jahejakuaa ñane mbaʼyru. Oĩta peteĩ ermáno ohechaukáva moõpa ikatu jaheja ñane mbaʼyru ha oñeg̃uahẽháicha oñemohendáta ohóvo. Jarekovaʼerã ñande solápa jaikéta vove upépe. Ndatuichái rupi sapyʼánte pe lugár ojehejataha mbaʼyrukuéra, ñañemongetavaʼerã ikatumíva jaha hag̃ua peteĩ áutopente. Ha aníkena jahejátei ñane mbaʼyru óga ahéno renondépe térã upérupi reínte.

◼ Jaguapy hag̃ua. Ikatu ñañongatu lugár oguapy hag̃ua ñanendive ñande rogayguakuéra, térã umi ohóvape ñanendive áutope.

◼ Ñane rembiʼurã. Jaguerahákena ñande karurã, anítei ñasẽ jajogua jaʼuvaʼerã. Upéicha jajapóramo ndaiporimoʼãi ombaʼevendéva ñande aty guasu jajapoha jerére. Ikatu jagueraha peteĩ mbaʼyrúpe ñamoĩ hag̃uáicha ñane asiénto guýpe. Pe aty guasu oikohápe ndaikatúi jagueraha mbaʼyru tuichaitereíva, votélla de vídrio térã vevída.

◼ Ojepaga hag̃ua umi mbaʼe ojeporúvare. Ojejapo hag̃ua ko aty guasu heta ojegasta. Jahechauka hag̃ua ñamombaʼeha, ikatu ñameʼẽ pláta obra mundial-pe g̃uarã ñane Salón del Reino-pe térã pe aty guasu oikohápe. Oñemeʼẽtaramo cheque, ojejapovaʼerã Asociación Torre de Vigía rérape.

◼ Oĩramo hasýva térã oñeñandu vaíva. Umi ombaʼapóva emerhénsiape heʼi oñehenói reiha chupekuéra umi provléma michĩvare. Oĩramo peteĩ hasyetéva asambleahápe oñehenói raẽ vaʼerã peteĩ akomodadórpe. Haʼe ohenóita pyaʼe porã Primeros Auxilios-pe. Upépe ikatu oñeñatende pe hasývare. Haʼekuéra ndaikatúiramo oipytyvõ, heʼíta mbaʼépa ikatu ojejapo. Tekotevẽtaramo katu oñehenóita 911-pe.

◼ Umi nohenduporãivape g̃uarã. Oĩ ikatutaha ojeporu rrádio FM oñehendu hag̃ua pe prográma. Oñepyrũvo pe asambléa oĩta peteĩ marandu upéva rehegua. Upéva oiporútava oguerahavaʼerã peteĩ rrádio ha peteĩ aurikulár.

◼ Ojegrava hag̃ua. Pe asambléa oikohápe ndaikatúi oñemoĩ mbaʼeveichagua gravadóra pe sistéma eléktrikore, ni pe sistéma de sonídore, ha ndajaiporuivaʼerã omolestátaramo ótrope.

◼ Fóto. Renohẽtaramo fóto, aníkena reiporu flash pe prográma aja.

◼ Selulár ha komunikadór. Umíva ñamoĩvaʼerã ani hag̃uáicha ñaporomolesta.

Nóta: Ko Ñane Rembiapo Rréino Reheguápe oĩramo jepe prográma káda semánape g̃uarã, ñande aty guasu “Ñamoirũ Jesucrístope” oikóta rupi, ikatuhína oñekambia tekotevẽháicha. Ko aty guasu mboyve, Rreunión de Servísiope 15 minútope oñehesaʼỹijovaʼerã umi marandu ñande aty guasu rehegua, osẽva ko Ñane Rembiapo Rréino Reheguápe. Un més térã dos mése ñande aty guasu rire, ojeporuvaʼerã 15 térã 20 minúto Rreunión de Servísiope ojehecha hag̃ua umi mbaʼe iñimportantevéva oñemeʼẽvaʼekue Asambleahápe (ikatu ojeporu pe tiémpo oñemeʼẽva ojehecha hag̃ua“kongregasión oikotevẽva”). Natekotevẽi jahechapaite opa mbaʼe ojeʼevaʼekue ñande aty guasuhápe. Iporãvéta jaiporu umi párte oñeʼẽvaʼekue ñane predikasión rehe. Ko párte ojapovaʼerã pe superintendénte de servísio. Ejerure umi nerendúvape tomombeʼu mbaʼéichapa oiporu hikuái pe informasión opredika jave, térã mbaʼéichapa oiporúta upéva.