Peteĩ aty guasu ñanembovyʼátava jaikuaavévo Jehovágui
1. Mbaʼéichapa Jehová oñangareko ñanderehe jaikuaa porãve hag̃ua chupe?
1 Jehová ningo pyʼaporãme oñangareko ñanderehe ha ñanepytyvõ jaikuaa porãve hag̃ua Chupe. Upéicha rupi ñande jaikuaa heta mbaʼe Ñandejáragui péro hetaiterei oĩ ndoikuaaietéva chupe (Isa. 65:13). Heta mbaʼe Jehová omoĩ jaikuaa porãve hag̃ua chupe. Umíva apytépe ñane asambléa de distríto ojejapóva káda año. Jajepreparamapañaína jaha hag̃ua umi tres día ko ñande aty guasu héravape: “Ñandejára espíritu ñanesãmbyhy”? Hetaiterei mbaʼe ningo jaikuaavéta hína upépe!
2. Mbaʼe mbaʼérepa ñapensamavaʼerã ñande aty guasurã?
2 Voimi reheve ñapensamavaʼerã mbaʼépa jajapóta. “Ikatupyrýva rembiapo mbaʼe porã memete” (Pro. 21:5). Jahaséramo umi tres día ko ñande aty guasuhápe, jajeruremavaʼerã voimi reheve permíso ñane patrónpe. Ha jarekómapa japyta hag̃ua? Jarahavaʼerã ñande karurã ani hag̃ua ñasẽ ñande aty guasuhágui jakaru hag̃ua. Jahechamavaʼerã avei mbaʼéichapa jajapóta umi tres día ñag̃uahẽ hag̃ua voimi reheve. Upéicharõmante ñane tiémpota jahecha hag̃ua moõpa jaguapýta, japurahéi hag̃ua purahéi ñepyrũgua ha ñahendu hag̃ua avei pe ñemboʼe ojejapótava oñepyrũ hag̃ua ñande aty guasu.
3. Mbaʼeichagua aópa ikatu japrepara ñande aty guasurã?
3 Ñañatendevaʼerã avei ñañemonde hag̃ua hekopete (1 Tim. 2:9, 10). Ñande aty guasu jave opyta porã ñandéve japredika hag̃ua umi oikóvape upe jerére. Nañaiméiramo jepe pe aty guasuhápe, ñañemonde porã vaʼerã ha jareko ñandejehe ñande tarjeta de solapa. Ndajaikomoʼãi umi hénte oikoháicha, jaikóta uvei oñeñeʼẽ porã hag̃uáicha ñanderehe.
4. Mbaʼépa ñanepytyvõta ñañatende porã hag̃ua asambleahápe?
4 Ñañatende porã vaʼerã. Ni michĩmi ningo ndajajavyséi umi mbaʼe ojeʼétava ko ñande aty guasuhápe, ajépa? (Pro. 22:17, 18.) Ñañatende porãvéta jaleéramo umi téysto pe diskursánte heʼíva ha ñaanotáramo umi mbaʼe iñimportantevéva. Upe rire, pyhare ikatu jaiporu ñaanotavaʼekue ñañemongeta hag̃ua umi mbaʼe iñimportantevéva ojeʼevaʼekuére. Heta vésema jahecha ñande aty guasuhápe umi mitã oguapývo ojoykerepa hapichakuérandi, ha oñemongeta hikuái asambléa aja térã omensahea. Jarekóramo mitã michĩva térã mitãrusu jepe, ñamboguapyvaʼerã ñanendive asambleahápe. Ha ani jaheja oho oguapy hapicha ijaveguávandi haʼekuéra año.
5. Mbaʼéichapa ikatu javyʼave ñande aty guasuhápe?
5 Jahasa porã ñane ermanokuérandi. Ñane rembiʼu ningo hevévaicha voi jaʼúramo ñane amigokuéra ndive (Pro. 15:17). Upéicha avei javyʼave ñande aty guasuhápe ñaime rupi ñane ermanokuéra ndive. Upévare, ojepytuʼu aja jepi, ñande voi ñañembojavaʼerã ñane ermanokuérare ñañemongeta hag̃ua hendivekuéra (Sal. 133:1). Péro ñande aty guasu omoakãva heʼi vove jaguapypáma hag̃ua, nañañemongetaveimavaʼerã ha jaháma jaguapy ñahaʼarõ oñepyrũ pe prográma.
6. Emombeʼu peteĩ mbaʼe rehasavaʼekue, ha ohechaukáva mbaʼéichapa ikatu japredika ñande aty guasu oikoha rupi.
6 Ñaimevaʼerã japredika hag̃uáicha. Ñande aty guasu jave opyta porã jepi japredika hag̃ua. Oĩ ermáno osẽva jepi osena térã hoʼu hag̃ua eládo ha mbaʼe asambléa rire ha upeichaha rupi sapyʼánte oñeporandu ñandéve ñande solápa rehe. Upeichahápe, oñeñemongeta porã jepi tapichakuéra ndive Ñandejára rehe. Ha oĩ katu ohóva voi ñande aty guasuhápe.
7. Mbaʼérepa iporãta jaha ág̃a ñande aty guasuhápe?
7 Heta tiémpo ningo oñembaʼapo jepi ojeprepara hag̃ua ñande aty guasu oikotaha ha umi diskúrso oñemeʼẽtava upépe. Koʼã mbaʼe ojejapóva ohechauka mbaʼeichaitépa Jehová ñanderayhu. Jahapaitékena ko ñande aty guasuhápe ha ñaikumby porã umi mbaʼe Jehová ñanemboʼéva! Jajapóramo upéicha ‘vyʼapópe japurahéita, ha pyʼarorýgui ñanerenyhẽta’ (Isa. 65:14).
[Rrekuádro oĩva páhina 4-pe]
Marandukuéra Aty Guasu rehegua
◼ Mbaʼe órapa oñepyrũta. Oñepyrũta 9:20 káda pyhareve ha ikatúta ojeike la 8:00 guive. Oñepyrũvo ipu umi kántiko, hiʼãma enterove jaguapypa. Ko ñande aty guasu opáta 4:55 viernes ha sábado kaʼaru, ha domingo katu opáta 4:00.
◼ Moõpa jahejakuaa ñane mbaʼyru. Oĩta peteĩ ermáno ohechaukáva moõpa ikatu jaheja ñane mbaʼyru ha og̃uahẽvape omohendáta ohóvo. Jarekovaʼerã ñande solápa jaike hag̃ua upépe. Ndatuichái rupi sapyʼánte pe lugár ojehejataha mbaʼyrukuéra, ñañemongetavaʼerã jaha hag̃ua oñondivepa peteĩ áutope. Ha aníkena jahejátei ñane mbaʼyru óga ahéno renondépe térã upérupi reínte.
◼ Jaguapy hag̃ua. Ñañongatuvaʼerã lugár ñande rogayguakuérapente, térã umi ohóvape ñanendive áutopente.
◼ Ñane rembiʼurã. Jaguerahákena ñande karurã, anítei ñasẽ jajogua jaʼuvaʼerã. Upéicha jajapóramo ndaiporimoʼãi ombaʼevendéva ñande aty guasu jajapoha jerére. Ikatu jagueraha ñane rembiʼurã peteĩ mbaʼyrúpe ñamoĩ hag̃uáicha ñane asiénto guýpe. Ha jaguerahákena peteĩ mbaʼyru michĩvapente. Ndovaléi avei jagueraha votélla de vídrio térã vevída.
◼ Ojepaga hag̃ua umi mbaʼe ojeporúvare. Ojejapo hag̃ua ko aty guasu heta ojegasta. Jahechauka hag̃ua ñamombaʼeha, ikatu ñameʼẽ pláta obra mundial-pe g̃uarã ñane Salón del Réinope térã ñande aty guasu oikohápe. Oñemeʼẽtaramo cheque, ojejapovaʼerã Asociación Torre de Vigía rérape.
◼ Oĩramo hasýva térã oñeñandu vaíva. Umi ombaʼapóva emerhénsiape heʼi oñehenói reiha chupekuéra umi provléma michĩvare. Oĩramo peteĩ hasyetéva asambleahápe oñehenói raẽ vaʼerã peteĩ akomodadórpe. Haʼe ohenóita pyaʼe porã Primeros Auxilios-pe. Upépe ikatu oñeñatende pe hasývare. Ha haʼekuéra ndaikatúiramo oipytyvõ katu, heʼíta mbaʼépa ikatu ojejapo. Tekotevẽtaramo katu oñehenóita ambulánsiape.
◼ Umi nohenduporãivape g̃uarã. Ikatúta ojeporu rrádio FM oñehendu hag̃ua pe prográma. Oñepyrũvo pe asambléa oĩta peteĩ marandu upéva rehegua. Upéva oiporútava oguerahavaʼerã peteĩ rrádio ha peteĩ audífono.
◼ Ojegrava hag̃ua. Ñande aty guasuhápe noñemoĩrivaʼerã mbaʼeveichagua gravadóra pe sistéma eléktrikore, ni pe sistéma de sonídore, ha ndajaiporuivaʼerã omolestátaramo ótrope.
◼ Fóto. Renohẽtaramo fóto, aníkena reiporu flash pe prográma aja.
◼ Selulár ha komunikadór. Umíva ñamoĩvaʼerã ani hag̃uáicha oporomolesta.
◼ Formulário Sírvase visitar. Oĩramo peteĩ oikuaasevéva la Biblia omboʼéva, ñamyenyhẽvaʼerã pe formulário Sírvase visitar (S-43). Iporãta upéicharõ káda puvlikadór ogueraháramo peteĩ térã mokõi formulário ñande aty guasúpe. Upe rire ikatu oñemeʼẽ Departamento de Publicaciones-pe térã kongregasión sekretáriope (ehecha Nuestro Ministerio del Reino de febrero de 2005, páhina 6).
◼ Rreunionkuéra. Ñande aty guasu prográmape noñemoĩri ojejapo hag̃ua Estúdio de Lívro de Kongregasión, Eskuéla dél Ministério Teokrátiko ha Rreunión de Servísio. Péro Estúdio de Lívro ojejapovaʼerã jepiverõguáichante pe semána oikotahápe ñande aty guasu. Ndopytaporãi avei oñeñembyatypáramo Salón del Reino-pe ojejapo hag̃ua oñondivepa pe estúdio de lívro.
◼ Akomodadór. Oñemokyreʼỹ umi ermáno ikatupyrývape, koʼýte umi ansiáno térã siérvo ministeriálpe, ombaʼapo hag̃ua ko departaméntope ha oipytyyvõ hag̃ua ermanokuérape. Ko mbaʼe Jehová oguerohoryeterei.