Ndépa rereko peteĩ território nembaʼerã?
1. Maʼerãpa oñemeʼẽ ñandéve peteĩ território?
1 Upéva hína pe território oñemeʼẽva ndéve repredika hag̃ua. Opyta porãramo, sapyʼaitépe reg̃uahẽta ha reñemoĩma repredika, tahaʼe neaño térã ambue puvlikadór ndive. Upéicharõ jepe, ikatu jave resẽvaʼerã repredika avei ermanokuérandi. Tuicha mbaʼéramo pende território kongregasiónpe katu, koʼýte reipytyvõta rerekóramo peteĩ nembaʼéva. Jajapóramo upéicha ñaipytyvõñaína oñemog̃uahẽ hag̃ua pe marandu porã opavavetépe (Hech. 10:42).
2. Mbaʼérepa iporã jareko peteĩ território ñanembaʼéva japredika hag̃ua?
2 Mbaʼe porã jahupytýva. Oĩ ermáno orekóva iterritório ag̃ui imbaʼapohágui, opyta porãgui chupekuéra opredika hag̃ua karu órape térã ombaʼapopa rire. Oĩ avei osẽva ifamíliandi opredika una óra rupi ivesinokuérape Estúdio de Lívro mboyve. Umi estúdio ha rrevisíta ojuhúva hiʼag̃ui chuguikuéra ha noikotevẽmoʼãi heta tiémpo térã plátare ojapo hag̃ua. Ikatu rupi upéicha ojejapo hetave óra, oĩ ermáno ojapóva sapyʼánte iprekursorádo auxiliar, térã oiko chuguikuéra precursor regular voi katu. Jarekóramo avei ñande território, jaikuaa porãve ogajarakuérape ha haʼekuéra ojepokuaave avei ñanderehe. Japredikáramo umi mbaʼe oipyʼapývare chupekuéra, ñag̃uahẽvéta ikorasõme.
3. Mbaʼépa ohupyty pe ermána ojerurehaguére peteĩ território imbaʼerã?
3 Peteĩ superintendénte de sirkuíto heʼi peteĩ prekursórape ojerure hag̃ua iterritoriorã. Upe rire pe prekursóra heʼi: “Ajapo pe heʼivaʼekue chéve, ha sapyʼaitérõ g̃uarã aikuaa porãma umi che territóriope oĩva ha horyeterei chéve hikuái. Aikuaáma avei mbaʼe órapa opyta porãve apredika hag̃ua chupekuéra. Ha mbaʼépa ahupyty upévare? Un méspe ajapomivaʼekue treinta y cinco rrevisíta ha koʼág̃a g̃uarã ajapo ochenta ári ha siete estúdio vívliko”.
4. Mávapepa jajerurevaʼerã ñande territoriorã ha mbaʼéichapa ñambaʼapovaʼerã pype?
4 Mávapepa rejerurevaʼerã. Reipotáramo peteĩ território nembaʼerã, reñeʼẽvaʼerã pe ermáno território rehe oñatendéva ndive. Reinvitakuaa avei ambue puvlikadórpe opredika hag̃ua nendive. Rerahavaʼerã reanota hag̃ua umi noĩriva hógape ha eñehaʼã ejapopa cuatro mésepe. Ndaikatumoʼãiramo rejapopa, ikatu rejerure pe Estúdio de Lívro omoakãvape térã ambue ermánope nepytyvõ hag̃ua. Cuatro mése rire ikatu remeʼẽ, térã rejerure jey nde territoriorã. Upéicharamo jepe, ndahaʼéi repytaitétava upe território reheve. Aremi rire remeʼẽ jey vaʼerã ikatu hag̃uáicha ótro ojerure avei ombaʼapo hag̃ua pype. Ndatuicháiramo pende território kongregasionpegua, ikatu rejerure pe estúdio de lívro omoakãvape omeʼẽ hag̃ua ndéve michĩmi rembaʼapo hag̃ua pype.
5. Mbaʼépa jajapovaʼerã ikatu hag̃uáicha japredika ojejerureháicha ñandehegui?
5 Ojeʼevaʼekue ñandéve japredika hag̃ua “opárupi ko yvy jerekuévo” ha upéva hetaiterei (Mat. 24:14). Upévare ñambaʼapo porã vaʼerã oñondivepa. Japredikáramo ñane ermanokuéra ndive ha ñande territóriope avei, ñaipytyvõñaína ñamog̃uahẽ hag̃ua hetave tapichápe pe marandu porã.