Oñemoĩ ñande pópe peteĩ mbaʼe ijojahaʼỹva
1 Apóstol Pablo omombaʼetereivaʼekue Ñandejára omondohaguére chupe omombeʼu hag̃ua pe marandu porã. Haʼe ombojojavaʼekue upe tembiapo peteĩ ‘tesórore’ (2 Cor. 4:7). Heta ohasa asy vaʼekue ojapohaguére Ñandejára ojeruréva chupe. Haʼe naikaneʼõi voi, kyreʼỹme omombeʼu marandu porã opavavépe. Heta oviahavaʼekue ha umichaha rupi sapyʼánte ijetuʼueterei hendive. Mbaʼéichapa ikatu jajapo Pablo ojapohaguéicha ñamombaʼe rupi ñane predikasión? (Rom. 11:13.) Mbaʼérepa jaʼe ñane predikasión haʼeha peteĩ tesóro ijojahaʼỹva?
2 Peteĩ mbaʼe ijojahaʼỹva. Umi tesóro ojerekóva ko Yvy ape ári katuete ogueru heta jehasa asy. Ha ndoikoʼaréi ningo, ojereko ajánte ojeiko porã ha upéi opa jeýma. Ñane predikasión katu ogueru heta mbaʼe porã opa ára g̃uarã, ñandéve ha umi ñanerendúvape (1 Tim. 4:16). Japredika rupi, ñande rapicha ipyʼa porãva ikatu oikuaa Jehovápe, okambia hekove ha upéicha ohaʼarõ pe jeikove opaʼỹva (Rom. 10:13-15). Javyʼave ñamombaʼéramo ñane predikasión. Ñañandu ára ha ára jajapoha iporãva, ha vyʼápe ñahaʼarõ umi mbaʼe porã oĩva ñane renonderãme (1 Cor. 15:58).
3 Jahechaukákena ñamombaʼeha ñane predikasión. Jahechaukáta ñamombaʼeha peteĩ mbaʼe, ñaiméramo jajapo hag̃uáicha hesehápe oimeraẽ mbaʼe. Iporãitépa jaiporu ñane tiémpo ha ñande puʼaka ñamombaʼeguasu hag̃ua Jehovápe! (Efe. 5:16, 17.) Ñane tiémpo jaiporúva Ñandejára servísiope ohechaukavaʼerã ñamombaʼeveha chupe opa mbaʼégui. Jareko ningo peteĩ mbaʼe iporãitereíva ñande rapichápe g̃uarã. Upévare, kyreʼỹme ñamombeʼúta ko marandu porã oimeraẽvape ha oimehápe.
4 Umi tesóro iporãva ningo oñemoĩ opavave ohecha hag̃uáme, noñemokañýi. Jahecháramo ñane predikasión peteĩ mbaʼe ijojahaʼỹváicha, ñamotenondéta opa mbaʼe jajapóvape (Mat. 5:14-16). Jajapo memékena kyreʼỹme Pablo ojapohaguéicha ha jahechauka ñamombaʼeha ñane predikasión peteĩ tesóroicha.