Pe predikasión Ñandejára Rréinogui: Peteĩ priviléhio ijojahaʼỹva

¹ Hetaiterei millones ñande rapichakuéra ko Yvy ape ári oiporu umi mbaʼeita Jehová omoĩva ikatu hag̃uáicha jaikove (Mat. 5:45). Upéicharõ jepe, ndahetái oĩ osẽva opredika pe marandu porã Ñandejára Rréino rehegua, peteĩ priviléhio ijojahaʼỹva, ohechauka hag̃ua oguerohoryha ijapoharépe (Mat. 24:14). Ha mbaʼeichaitépa nde remombaʼe ko priviléhio?

² Pe predikasión Ñandejára Rréinogui omombaʼe Ñandejárape ha omeʼẽ esperánsa ha pyʼaguapy heta ñande rapichápe, oiko asyetereivahína koʼã tiémpo pohýi jahasávape (Heb. 13:15). Umi ohendu porãva pe marandu ikatúta oikove opa ára g̃uarã (Juan 17:3). Mbaʼeichagua tembiapo piko ikatu omeʼẽ upeichagua mbaʼe porã? Pe apóstol Páblope g̃uarã pe predikasión haʼevaʼekue peteĩ tesóro, ha pe opredikaháicha ohechauka mbaʼeichaitépa haʼe omombaʼe pe priviléhio (Hech. 20:20, 21, 24; 2 Cor. 4:1, 7).

³ Ñamombaʼe pe priviléhio ijojahaʼỹva. Ikatu jahechauka ñamombaʼeha pe priviléhio ñañehaʼãramo jajapo porã ñane predikasión. Ñañehaʼãpa japrepara porã peteĩ presentasión ikatútava opoko ñande rapicha korasõre? Ikatúpa ñandekatupyryve jaiporúvo Ñandejára Ñeʼẽ ha ñañemongetávo ñande rapichakuéra ndive? Ñambaʼapopaitépa pe território oñemeʼẽva ñandéve? Ñamoñepyrũkuaa ha jajapokuaápa estúdio vívliko? Umi kristiáno ungidoicha, yma guare ha koʼag̃agua, ñanekyreʼỹ ñamombaʼégui hekópe porã ñane predikasión, ha jaguerohoryeterei pe priviléhio (Mat. 25:14-23).

⁴ Oúramo nde ári umi provléma og̃uahẽva ñande eda vove, térã nderasy katúramo, térã reguerekóramo ótro provléma hasýva rembohovái hag̃ua, oñemombaʼeterei pe reñehaʼãva rejapo predikasionhápe. Ñandejára Ñeʼẽ heʼi porã ñandéve Jehová omombaʼetereiha pe ñañehaʼãva jajapo jaservi hag̃ua chupe, oiméramo jepe ñande rapicha nomombaʼéi pe jajapóva (Luc. 21:1-4).

⁵ Pe predikasión Ñandejára Rréinogui tuicha ñanembopyʼaguapy. Peteĩ ermána oguerekóva 92 áño heʼi: “Tuichaitépa chembovyʼa apensáramo umi 80 áño aservímava Jehovápe—ambyasyʼỹre mbaʼeve! Ikatúramo aiko jey, aikose jeýta upeichaite, ‘pórke pe pyʼaporã mborayhúgui oguerekóva Ñandejára iporãve pe tekovégui’ (Sal. 63:3). Ñamombaʼékena ñande avei pe priviléhio omeʼẽva ñandéve Ñandejára: pe predikasión Ñandejára Rréinogui.