Ñamombaʼékena Jehová servísio
1. Mbaʼépa opensa heta hénte umi opredikávare?
1 Ko múndo oĩvape Satanás poguýpe, heta hénte opensa umi ivýrovante opredikaha (1 Cor. 1:18-21). Ha upe ojeʼéva ningo ñaimoʼãʼỹre ikatuhína ñanemokangy ha nañanekyreʼỹvéi japredika hag̃ua (Pro. 24:10; Isa. 5:20). Péro mbaʼérepa jaʼekuaa tuichaiterei mbaʼeha jaiko Jehová testígoramo? (Isa. 43:10.)
2. Mbaʼérepa jaʼekuaa ñane predikasión haʼeha ‘peteĩ tembiapo imarangatúva’?
2 ‘Peteĩ tembiapo imarangatúva’. Apóstol Pablo heʼivaʼekue pe predikasión haʼeha ‘peteĩ tembiapo imarangatúva’ (Rom. 15:15, 16). Ha upeichaite ningo, japredikávo ñambaʼapoñaína Ñandejárandi ha ñaipytyvõ oñemomarangatu hag̃ua héra (1 Cor. 3:9; 1 Ped. 1:15). Jehovápe g̃uarã ñane predikasión haʼe peteĩ ‘sakrifísio omombaʼeguasúva chupe’, upévare jaʼekuaa ko tembiapo iñimportantetereiha (Heb. 13:15).
3. Mbaʼérepa ñamombaʼevaʼerã pe tembiapo oñemeʼẽva ñandéve?
3 Tuichaiterei mbaʼe ningo ñamoherakuã pe marandu porã, ha naentéroi ikatu ojapo upéva. Katuete umi ánhel ojaposeterei avei ko tembiapo (1 Ped. 1:12). Ha oñemeʼẽrire chupekuéra, okumplivaʼerãmoʼã hekopete. Péro Jehová ñandéve omeʼẽ ko tembiapo ijojahaʼỹva. Ñapensamíntena, ñande jajoguáva peteĩ ‘mbaʼyru ñaiʼũgui ojejapóvape’, ikatuhína jajapo ko mbaʼe porãite (2 Cor. 4:7).
4. Mbaʼéichapa ikatu jahechauka ñamombaʼe añeteha ñane predikasión?
4 Ñamotenondékena. Ñamombaʼe añetéramo predikasión, ñañemotiémpota káda semána ñasẽ hag̃ua ñamombeʼu pe marandu porã ha ñamotenondéta ñande rekovépe (Fili. 1:10). Ñamoĩ chupe ñambopuha peteĩ orkéstape, ojekuaáva ko múndo tuichakuére. Upéva ningo tuichaiterei mbaʼe, upévare jajeprepara porãta ñambopukuaa hag̃ua ha ñañehaʼãta ñañembokatupyryve jahávo. Péicha avei ñasẽ vove predikasiónpe, jajeprepara porã vaʼerã ‘jaiporu hag̃ua hekopete Ñandejára Ñeʼẽ’ ha ñañehaʼã ñañembokatupyryve jahávo ñaporomboʼe hag̃ua (2 Tim. 2:15; 4:2).
5. Máva mávapa omombaʼeterei ñane predikasión?
5 Aníkena jaheja ñanemokangy umi hénte heʼíva. Oĩ ningo hetaiteve ñande territóriope oagradeséva jaha haguére javisita chupekuéra. Ñandéve g̃uarã iñimportanteve hína Jehová ñandeguerohory, ndahaʼéi yvyporakuéra. Ha jajerovia Haʼe katuete omombaʼetereiha ñane rembiapo (Isa. 52:7).