Ñamombaʼeguasu Jehovápe ñande rogayguakuéra ndive
1 Ñandejára Ñeʼẽ omombeʼu yma umi família ojapoha oñondivepa tembiapo ogapypegua ha hetave mbaʼe. Péro, iporãveha omombaʼeguasuvaʼekue hikuái Jehovápe oñondivepa (Lev. 10:12-14; Deu. 31:12). Koʼág̃a rupi, heta hendápe enterovénte ojepokuaa oiko iñakãre. Upéicharõ jepe, ñande kristianokuéra jahechakuaa tekotevẽha jajapo heta mbaʼe ñande rogaygua ndive, ha koʼýte jaservi oñondivepa Ñandejárape. Ha haʼe voi omoñepyrũvaʼekue familiakuéra. Upévare oiméne ovyʼaite ohechávo tuvakuéra ha taʼyrakuéra omombaʼeguasujoa chupe oñondivepa.
2 Japredika oñondivepa. Jajoayhuve ñande rogayguakuéra ndive japredikáramo oñondivepa pe marandu porã. Upéicha rupi, umi ansiáno pyʼỹi osẽvaʼerã opredika hembireko ha itaʼyrakuéra ndive, ndahaʼéi umi puvlikadór ndive añónte (1 Tim. 3:4, 5). Umi superintendénte hembiapo hetáramo jepe, opredika jepi avei hembireko ndive.
3 Mitãnguéra osẽva opredika ituvakuéra ndive, oñembokatupyryvéta. Haʼekuéra ohecha mbaʼeichaitépa ituvakuéra ovyʼa ha ohayhu Jehovápe ha hapichakuérape (Deu. 6:5-7). Ha upéva oipytyvõta umi okakuaapámavape jepe. Peteĩ famíliape oĩ mbohapy mitãkuimbaʼe, pe imitãvéva oreko 15 áño ha pe ijypykue katu 21 áño, haʼekuéra osẽ meme gueteri opredika ituvakuéra ndive. Itúva heʼi: “Akóinte romboʼe chupekuéra peteĩ mbaʼe jepe. Roñehaʼã ovyʼa hag̃ua hikuái predikasiónpe ha ikyreʼỹ hag̃ua opytávo”.
4 Jajeprepara oñondivepa. Heta ermanokuéra ohechakuaa iporãha ojeprepara hogayguakuéra ndive osẽ hag̃ua opredika. Mitãnguéra ningo ovyʼa oñensajáramo hendivekuéra itúva, isy térã iñermanokuéra. Upearã, ojopyru hikuái oiko hag̃ua puvlikadór térã óga járaramo. Oĩ umi família ostudiapa rire oñondive oñensajáva sapyʼaitemi jepe.
5 Javyʼave jajapóramo oñondivepa umi mbaʼe iporãva ha iñimportánteva. Upévare, iporãiterei jaháramo ñane família ndive japredika, jajapo rrevisíta ha estúdio. Ñamombaʼeguasúvo Jehovápe ñanderogayguakuéra ndive, vyʼapópe jaʼéta: “Che ha maymáva che rogaygua romombaʼeguasúta Ñandejárape” (Jos. 24:15).