Mbaʼépa ikatu jajapove septiembre guive
1. Mbaʼépa iporãta jajapo septiembre guive?
1 Jaservi porãsevéramo Ñandejárape, jahechavaʼerã mbaʼépa ikatu jajapove. Jaikuaámapa mbaʼépepa ñambaʼapovéta ág̃a septiembre guive? Ikatu jajapose precursorado auxiliar un més jepe. Upearã koʼág̃ama voi ñañembosakoʼivaʼerã. Péro, mbaʼérepa iporã jajapose precursorado auxiliar?
2. Mbaʼérepa iporã jajapo precursorado auxiliar?
2 Mbaʼérepa iporã jajapo precursorado auxiliar. Jajapóramo ñasẽvéta japredika ha ‘péicha jajapovéta’ Ñandejárape g̃uarã (1 Tes. 4:1). Jajepyʼamongetáramo opa mbaʼe Jehová ojapovaʼekuére ñanderehehápe, ñamombeʼuséta upéva ñande rapichápe (Sal. 34:1, 2). Jaikuaa avei Jehová ohechaha ha ovyʼaha ñañehaʼãramo ñasẽve predikasiónpe (Heb. 6:10). Ha javyʼaiténingo jaikuaávo ñambovyʼaha Jehovápe ñañehaʼãmbaitéramo ñambaʼapove chupe g̃uarã! (1 Cró. 29:9.)
3, 4. Mbaʼépa jahupytýta jajapóramo precursorado auxiliar?
3 Katuete ningo peteĩ mbaʼe jajapo pyʼỹiramo osẽ porãve ñandéve. Upévare ñasẽvéramo predikasiónpe, ñañemongeta porãvéta umi óga jára ndive, hetave ndive ñañeʼẽta ha jaiporukuaavéta la Biblia. Ñamombaretevéta ñande jerovia ñañeʼẽvéramo hese. Ha oiméramo ndajastudiái la Biblia avavéndi, ikatu jajapo jave ñande prekursorádo jajuhu peteĩ ostudiaséva. Heta puvlikadór omombeʼu oikohague hese upéicha.
4 Ñanepytyvõta avei ani hag̃ua jajapo pe jajapóva jepi voínte jaservívo Jehovápe. Peteĩ ermáno ohejavaʼekue iprekursorádo rregulár ohechakuaa ombaʼapoitereiha oikóvo. Upévare ojapo precursorado auxiliar. Haʼe heʼi: “Che jepe naimoʼãi un méspe peichaite chekyreʼỹveha aservi hag̃ua Ñandejárape. Añehaʼã ajapo meme upe guive, ha aremi rire ajapo jey precusorado regular”.
5. Mbaʼépa ikatu jajapo ñaimoʼãramo ndaikatumoʼãiha jajapo prekursorádo?
5 Ñamboykékena umi mbaʼe ñandejokóva. Oĩ umi ndojedesidíriva ojapo hag̃ua iprekursorádo oimoʼãgui ndaikatupyryiha predikasiónpe. Ñañeñandúramo upéicha, ñanemanduʼavaʼerã Jehová ñanepytyvõtaha. Haʼe oipytyvõvaʼekue Jeremíaspe, ha avei Moiséspe ojapo hag̃ua hembipota. Moisés ningo ‘imbegue ha ikũ atãvaʼekue oñeʼẽ hag̃ua’ (Jer. 1:6-10; Éxo. 4:10-12). Upévare, ñaimoʼãramo ndaikatumoʼãiha jajapo ñande prekursorádo, jajerurevaʼerã Jehovápe ñanepytyvõ hag̃ua.
6. Mbaʼéichapa ikatúta jajapo prekursorádo ñanderasykatu térã ñane rembiapo hetáramo jepe?
6 Jakyhyjépa jajapo hag̃ua prekursorádo ñanderasykatu térã nañanetiémpoi rupi? Ñanderasykatu mbaʼéramo, jahántevaʼerã hese ikatumiháicha ha upéicha jajapo avei ñande prekursorádo. Ha ñane rembiapo hetaitereíramo, ikatu ñambotapykuénte umi nañaikotevẽiva. Oĩ katu umi ermáno ombaʼapóva pyhareve guive kaʼaru peve ha ojapo hag̃ua precursorado auxiliar ojeruréva vakasión uno térã dos día (Col. 4:5).
7. Mbaʼérepa iporã ñanemanduʼa prekursorádo rehe ñane ñemboʼépe?
7 Mbaʼéichapa ikatu jajapo. Ñañemboʼe jave Jehovápe, ñamombeʼuvaʼerã jaservi porãseveha chupe ha jaipotaha ñanepytyvõ osẽ porã hag̃ua umi mbaʼe jajapovañaína (Rom. 12:11, 12). Haʼe ñanepytyvõta ñamohenda porã hag̃ua ñane tiémpo (Sant. 1:5). Ha nañanekyreʼỹmbáiramo katu, jaʼevaʼerã chupe tañanepytyvõ javyʼa hag̃ua predikasiónpe (Luc. 10:1, 17).
8. Mbaʼéichapa ikatu ñanepytyvõ Proverbios 15:22 heʼíva jajapo hag̃ua precursorado auxiliar?
8 Ñañeʼẽvaʼerã ñanderogayguakuéra ndive precursorado auxiliar rehe (Pro. 15:22). Enterove ñañopytyvõramo, ikatu peteĩ jepe ojapo prekursorádo. Ñañemongetavaʼerã avei ermanokuérandi, koʼýte umi oĩva ndive ñane situasiónpe avei. Katuete ñanekyreʼỹvéta upe rire jajapo hag̃ua prekursorádo.
9. Mbaʼe méspepa opyta porãta jajapo hag̃ua precursorado auxiliar?
9 Jahechamína ñane kalendário jaikuaa hag̃ua septiembre guivépa ikatúta jajapo ñande prekursorádo. Ñambaʼapóramo pyhareve guive kaʼaru peve térã jaháramo koléhiope, ikatu jaiporavo umi més orekóva arete térã umi orekóva cinco fín de semána. Jahechakuaa septiembre, diciembre, marzo ha agosto oguerutaha cinco fín de semána. Ág̃a máyope jarekóta cinco sábado, ha júniope cinco domingo. Nañaneresãíriramo, jahechavaʼerã mbaʼe méspepa opyta porãvéta ñandéve. Ikatu avei jaiporavo pe més outahápe superintendénte de sirkuíto. Upéicharõ ikatúta ñaime 30 minúto umi precursor regular rreunionhápe. Ha pe áño oúvape Conmemoración hoʼáta 22 de marzo. Upévare opyta porãta avei jajapo hag̃ua prekursorádo marzo, abril ha máyope. Jaiporavo rire mbaʼe méspepa jajapose ñande prekursorádo, jahechavaʼerã mbaʼéichapa jajapóta jahupyty hag̃ua 50 óra.
10. Mbaʼépa jajapokuaa ndaikatumoʼãirõ jajapo prekursorádo?
10 Jahechakuaáramo ndaikatumoʼãiha jajapo precursorado auxiliar ág̃a septiembre guive, ñanekyreʼỹvaʼerã predikasiónpe umi prekursór ikyreʼỹháicha. Ñañehaʼã memékena predikasiónpe. Jaikuaáningo Jehová ovyʼataha ohecháramo ñañehaʼãmbaiteha jaservi porã chupe (Gál. 6:4). Ñamokyreʼỹmíkena enterove ojapótavape prekursorádo ha jajepytaso ijykerekuéra. Ijáramo ñandéve, ñamboykékena ñane rembiapo ñasẽve hag̃ua káda semána japredika umi prekursór ndive.
11. Mbaʼépa jajapovaʼerã jaikuaágui mbykymaha ñane tiémpo?
11 Ñande jaservíva Jehovápe jaikuaa mbykymaha ñane tiémpo. Upévare jajapovaʼerã ojeʼehaguéicha ñandéve ha ñamombeʼu ñande rapichápe pe marandu porã. Ndajajapóiramo ikatu heta ñande rapicha omano, ha mbykýma ñane tiémpo ñaipytyvõ hag̃ua chupekuéra (1 Cor. 7:29-31). Jahayhúgui Ñandejárape ha ñande rapichakuérape japredikáta ikatuhaguéicha. Ñañehaʼãmbaite ha ñamohenda porãramo ñane rembiapokuéra, ikatúta jajapo precursorado auxiliar un més jepe ág̃a septiembre rire.