Koʼág̃ama jajepreparavaʼerã
1. Mbaʼe oportunidápa jaguereko Conmemoración tiémpope, ha mbaʼépa jajapomavaʼerã?
1 Káda áño, Conmemoración tiémpope, jareko peteĩ oportunida ijojahaʼỹva: ikatu ñamombaʼeguasuve Ñandejárape (Sal. 109:30). Ha jahechauka hag̃ua jaagradeseha Jehovápe omeʼẽ haguére Itaʼýra ñanderehehápe, jajapóta opa ikatúva japredikave hag̃ua márzope. Upévare, koʼág̃ama jajepreparavaʼerã (Pro. 21:5).
2. Mbaʼépa heʼi heta ermáno oikuaávo abril 2011-pe ikatu hague ojejapo 30 órante pe prekursorádo auxiliárpe? Mbaʼéichapa nde reñeñandúraʼe?
2 Prekursorádo auxiliar. Pe áño ohasavaʼekuépe ñanembovyʼaiterei jaikuaávo abrílpe ikatu hague jajapo 30 órante pe prekursorádo auxiliárpe. Peteĩ mitãrusu omombeʼu: “Che ningo ndajapói gueteri che prekursorádo rregulár natermináiti rupi che eskuéla. Péro abrílpe ajapóta che prekursorádo auxiliar de 30 óra, ha añehaʼãta akompleta 50”. Avei peteĩ ermána ombaʼapóva tódo él día, heʼi: “Treinta óra? Ahupytýta katuete ningo upéva!”. Peteĩ prekursóra rregularkue orekóva 80 áño rasa, ohendúvo pe anúnsio, heʼi: “Aretereíma ningo ajapose jey che prekursorádo! Jehová oikuaa porã mbaʼeichaitépa avyʼavaʼekue ajapórõ guare upéva”. Upe méspe avei heta maranduhára, ndaikatúiramo jepe ojapo iprekursorádo, oñehaʼãmbaite ombaʼapove Jehová servísiope.
3. Mbaʼérepa iporãta jajapórõ ñande prekursorádo auxiliar marzo, abril ha máyope?
3 Márzope jareko jeýta peteĩ oportunida jaiporavo hag̃ua jajapótapa 30 térã 50 óra pe prekursorádo auxiliárpe. Avei sábado 17 de marzo guive ñasẽta ñainvita opavavépe ñanemoirũ hag̃ua Conmemoraciónpe, ojejapótava ág̃a 5 de abril. Hiʼãite ningo umi ojapóva iprekursorádo auxiliar márzope ikyreʼỹ ojapo hag̃ua avei umi 50 óra abril ha máyope.
4. Mbaʼépa ikatu jajapo ñambaʼapove hag̃ua Jehová servísiope? Ha mbaʼépa jahupytýta jajapóramo upéva?
4 Peñembyaty jey vove pestudia hag̃ua pende rogayguándi, iporãta pehecháramo mbaʼépa ikatu pejapo pembaʼapove hag̃ua Jehová servísiope Conmemoración tiémpope (Pro. 15:22). Ejerurékena Jehovápe tapenderovasa peñehaʼã haguére (1 Juan 3:22). Avei nemanduʼavaʼerã rembaʼapovéramo Jehová servísiope, remombaʼeguasuvetaha chupe ha revyʼavéta (2 Cor. 9:6).