Jaikuaaukákena Jehová rembiapokuéra porãita
1. Mbaʼépa ñanemomýi ñañeʼẽ meme hag̃ua opavavépe Jehováre?
1 ‘Nde niko Jehová, nde tuicha ha nde pokatu, nde pópe oĩ opa mbaʼe ha nde reko mimbipa ndaijojahái! Opa mbaʼe oĩva yvy ári ha yvágape ne mbaʼénte voi.’ (1 Cró. 29:11.) Mbaʼépa jajapovaʼerã jahayhúgui Jehovápe ha jaagradeségui chupe opa mbaʼére? ‘Ñamombeʼuvaʼerã Ñandejára rembiapokuéra porãita, pe ñanerenoivaʼekue ñasẽ hag̃ua pytũnguýgui ha jaike hag̃ua pe oporohesapeha porãite asýpe’ (1 Ped. 2:9). Ñañeʼẽ memevaʼerã Ñandejára ijojahaʼỹva ojapovaʼekuére. Opyta porãitereíta ñandéve jaikuaauka hag̃ua Jehová rembiapokuéra porãita ko marzo, abril ha máyope.
2. Mbaʼépa ojejapotahína Conmemoración mboyve ha máva mávapa ikatu ojapo?
2 Ñamosarambíta invitasión Conmemoracionrã. Lunes 2 de abril ñamombaʼeguasuvétantema Jehovápe ñanemanduʼa jeývo Jesucristo Séna Paha rehe. Ág̃a 17 de marzo guive 2 de abril peve ñamosarambitahína opárupi ko invitasión Conmemoracionrã. Oñemokyreʼỹ opavavépe ojapo hag̃ua opa ikatúva omosarambi hag̃ua ko invitasión. Upe vove opyta porãta umi estudiantekuérape ojapo hag̃ua tekotevẽva osẽma hag̃ua omombeʼu pe marandu porã. Oĩramo ne estudiánte térã ne família ikatúmava opredika, reñeʼẽvaʼerã umi ansiáno ndive.
3. Mbaʼépa ikatu jaʼe ñaporoinvitávo Conmemoracionrã?
3 Ko invitasión ñamosarambíta jajapohaguéicha pe asambléa de distríto ‘Koʼẽrõitéma Ñanesasõtape!’ g̃uarã. Heta invitasión oñemondóta opavave kongregasiónpe, oñemeʼẽ hag̃uáicha 50 puvlikadorkuérape ha 150 prekursorkuérape. Ñameʼẽ hag̃ua ko invitasión ikatu jaʼe: “Agueru ndéve ko invitasión rehomi hag̃ua peteĩ rreunión iñimportantetereívape, ojejapóva jepi káda áño. Kóvape rejuhúta mbaʼe órapa ojejapóta ha mbaʼe rehépa oñeñeʼẽta”. Ñaipytyvõvaʼerã umi ñande rapicha oikuaasevévape. Jaiporukuaa pe lívro Mbaʼépa omboʼe la Biblia? páhina 206, oñeñeʼẽhápe Cena del Señor rehe. Sábado ha domingo ñaikuaveʼẽta ñande rrevísta ha hendive ñameʼẽta pe invitasión. Ñaanotavaʼerã oĩramo oikuaasevéva ha jaha jey javisita chupe.
4. Mbaʼéichapa ñamosarambíta pe invitasión Conmemoracionrã?
4 Ikatútaramo, ñandete voi ñameʼẽvaʼerã ko invitasión óga jarakuérape. Ñaanotavaʼerã ndajajuhuihápe avavére ha ñañehaʼã jaha jey ótro día. Perekóramo heta invitasión pene kongregasiónpe, ofalta vove una semána Conmemoracionrã ikatúntema peheja umi óga jára ndaiporihápe. Péro ndapehejaivaʼerã upe mboyve. Aníkena ñanderesaráitei ñameʼẽ hag̃ua ko invitasión ñande rrevisíta, ñane estudiánte, ñane hentekuérape, ñanendive ombaʼapóvape, ñane vesínope ha ambue ñande rapichápe.
5. Mbaʼérepa iporã ñamohenda jahávo opa mbaʼe ikatu hag̃uáicha jajapo precursorado auxiliar?
5 Precursorado auxiliar. Ikatúpa reiporuve ne tiémpo reñeʼẽve hag̃ua Jehová rembiapokuéra porãita rehe, rejapo rupi precursorado auxiliar marzo, abril ha máyope? Katuete tekotevẽta remohenda porã umi ne rembiapo káda diagua ikatu hag̃uáicha rejapo nde prekursorádo (Efe. 5:15-17). Resẽvéramo predikasiónpe, revyʼavéta ha rehupytýta heta mbaʼe porã Jehovágui (Pro. 10:22). Hiaguĩmbaitéma ohóvo pe Conmemoración, ñañembosakoʼimavaʼerã hína jahávo (Pro. 215).
6. Mbaʼépa ñanemboʼe pe ermána guaiguĩmi ojapovaʼekue precursorado auxiliar pe áño ohasavaʼekuépe?
6 Peteĩ ermána orekóva 90 áño, ojapo precursorado auxiliar pe áño ohasavaʼekuépe. Haʼe heʼi: “Che ningo añangarekoseterei plantakuérare ha añemitỹséma kuri. Péro ahechakuaa tekotevẽha amotenonde pe mbaʼe iñimportantevéva. Amotenondeségui Ñandejára servísio, ajapo precursorado auxiliar márzope”. Mbaʼépa ohupyty upe haguére? Haʼe omombeʼuve: “Haʼetevaicha chéve avyʼavéva kongregasiónpe ha upéicha añemoaguĩve Jehováre”. Ñapensamína avei mbaʼépa ñamotenondeñaína ha jajapo tekotevẽva pe ermána ojapo haguéicha.
7. Ijetuʼúpa ndéve rejapo hag̃ua precursorado auxiliar?
7 Anichevaʼerã niko hasyeterei rehupyty hag̃ua 50 óra. Eñemboʼe Ñandejárape ha ehecha porã umi mbaʼe rejapovahína káda día. Ehecha mbaʼe órapa ikatúta repredika ha reanota ne kalendáriope. Ndete reikuaáta mbaʼéichapa opyta porãvéta ndéve. Ikatu naneresãivéi térã ndaikatuvéima rejapo ymaguaréicha. Upéicharõ jepe ikatúnte avei repredika michĩmimi jepe káda día. Rembaʼapoitereíramo térã rehóramo gueteri eskuélape, ikatúnte avei rejapo nde precursorado auxiliar, repredika rupi pyharekue térã sábado ha domingo.
8. Mbaʼépa oipytyvõ peteĩ ermáno ha hembirekópe ojapo hag̃ua precursorado auxiliar?
8 Heta oĩ ojapóva precursorado auxiliar ifamília ndive. Areʼíma hína peteĩ ermáno ha hembireko opensahague ojapóvo precursorado auxiliar ha haʼetévaicha chupekuéra ndaikatumoʼãiva. Mbaʼépa ojapo hikuái amo ipahápe? Péicha omombeʼu hikuái: “Rojerure Jehovápe orepytyvõmi hag̃ua, jahecha ndorojapóipa ore precursorado auxiliar”. Opensa ha omohendapa porã rupi mbaʼeichaitépa ikatu ojapo, osẽ porã chupekuéra. Upe rire heʼi hikuái: “Iporãitereíko, hetaiterei mbaʼe porã ningo rohupyty upe haguére. Peñehaʼãmína avei pejapo ore rojapohaguéicha, katuetei osẽ porãmbáta peẽme avei”.
9. Mbaʼépa ikatu pejapo pene família ndive pesẽve hag̃ua predikasiónpe umi més oúvape?
9 Peñemongetamína ág̃a pestudia vove pene família ndive, pehecha hag̃ua mbaʼépa ikatu pejapo pesẽve hag̃ua predikasiónpe umi més oúvape. Ndaikatúitaramo enterove pejapo precursorado auxiliar, peñopytyvõramo peteĩva jepe ikatu ojapo pende apytégui. Upeichaʼỹrõ ikatu pepensa pesẽve hag̃ua predikasiónpe pene família ndive. Ñamosarambitahína heta marandu porã.
10. Mbaʼérepa iporã ñamombeʼu ermanokuérape jajaposehañaína precursorado auxiliar hiʼaguĩ vove pe Conmemoración?
10 Ñañopytyvõkena. Ikatu niko ñañomokyreʼỹ. Ñamombeʼu meméramo jajaposeha precursorado auxiliar, ikatu omokyreʼỹ avei ótrope ojapo hag̃ua. Umi ojapomavaʼekue ikatu ñanepytyvõ jahecha hag̃ua mbaʼeichaitépa ikatu jajapo (Pro. 15:22). Rejapótaramo precursorado auxiliar, einvitamína umi ermáno ikatútavape nemoirũ ko tembiapo iporãitévape.
11. Mbaʼéichapa umi ansiáno ikatu oporomokyreʼỹ ojejapo hag̃ua precursorado auxiliar?
11 Heta ansiáno ojapo opa mbaʼe tekotevẽva ikatu hag̃uáicha ojapo avei precursorado auxiliar (Heb. 13:7). Ñanemokyreʼỹeterei ningo jahecháramo ojapo hikuái upéicha ha oñemongetáramo ñanendive umi mbaʼére. Oĩ ermáno oikotevẽva oñemokyreʼỹ térã oñepytyvõʼimínte chupe ojapo hag̃ua pe precursorado auxiliar. Pe ermáno oñangarekóva territóriore ikatu ojapove rreunión oñesẽ hag̃ua ojepredika, ikatu hag̃uáicha opavave osẽ ombaʼapopa rire térã kláse rire jepe. Ohecháta avei opavave oreko hag̃ua território ha puvlikasión oñekuaveʼẽvaʼerã. Káda semána oñemombeʼuvaʼerã rreunionhápe moõguipa oñesẽtahína predikasiónpe.
12. Mbaʼépa ikatu jajapo ndopytaporãmoʼãiramo ñandéve jajapo hag̃ua precursorado auxiliar?
12 Ndopytaporãmoʼãiramo jepe ñandéve jajapo hag̃ua pe precursorado auxiliar, ikatu ñamokyreʼỹ ótrope ha ñañemboʼe hesekuéra osẽ porã hag̃ua (Pro. 25:11; Col. 4:12). Ikatu ñamohemby ñane tiémpo ñamoirũve hag̃ua chupekuéra predikasiónpe oimeha árape. Térã ñasẽ vove, japyta japredikamie hendivekuéra.
13. Mboy precursor auxiliar-pa ojehupytysehína Paraguaype ha mbaʼépa ikatu jajapo ñane kongregasiónpe jahupyty hag̃ua upéva?
13 Ñañehaʼãkena jahupyty hag̃ua 1.200 precursor auxiliar ko abril oúvape. Sucursal Paraguaypegua omombeʼu áño 2000-pe ojehupytyhague 914 precursor auxiliar. Upévare jahechakuaa ko abril oúvape ikatuha jahupytyñaína 1.200 precursor auxiliar. Upéva ikatutahína jahupyty kongregasiónpe, káda seis ermáno apytégui peteĩ oñehaʼãramo ojapo. Heta kongregasiónpe oĩ hetave puvlikadór ikatútava ojapo precursorado auxiliar ha ndahasymoʼãi ojehupyty hag̃ua pe oñehaʼarõva. Epensamíntena mbaʼéichaitépa javyʼáta ha ñañomokyreʼỹta kongregasiónpe ñañemoĩramo japredikajoa oñondivepa.
14. Mbaʼérepa opyta porãta abrílpe jajapo hag̃ua precursorado auxiliar?
14 Mbaʼérepa opyta porãta abrílpe jajapo hag̃ua precursorado auxiliar? Abril oikemíre ningo ojejapotahína pe Conmemoración ha opyta porãta ñandéve javisita jey hag̃ua umi tapicha ouvaʼekuépe. Ñaikuaveʼẽta chupekuéra ñande rrevísta ha jaha jey vove javisita katu jahechaukakuaa chupekuéra pe lívro Mbaʼépa omboʼe la Biblia?, jahecha hag̃ua nañañepyrũipa jastudia hendivekuéra. Péicha, jajapo rupi abrílpe ñande precursorado auxiliar, ikatúta ñamoñepyrũ heta estúdio vívliko ñande rapichándi. Avei abril orekohína cinco domingo ha heta arete. Upévare ñambaʼapóramo jepe térã jaháramo gueteri eskuélape, opyta porãta ñandéve jajapo hag̃ua ñande prekursorádo.
15. Mbaʼérepa jajapuravaʼerã hiʼaguĩ vove ohóvo pe Conmemoración?
15 Káda áño ohasávo pe Conmemoración hiʼaguĩve ohóvo pe ára paha. Saʼipaitéma ningo pe tiémpo hembýva ñande rapichakuéra oikuaa hag̃ua Ñandejára ijojahaʼỹvape (1 Cor. 7:29). Ohasa vove pe Conmemoración, ohasátama avei pe tiémpo opyta porãitéva ñandéve ñamombaʼeguasu hag̃ua Ñandejára Jehovápe. Koʼág̃a guive ñañembosakoʼimavaʼerã hína ñañeʼẽ hag̃ua ikatuhaguéicha Jehová rembiapokuéra porãita rehe ko marzo, abril ha mayo oúvape.
[Rrekuádro oĩva páhina 4-pe]
Ikatútapa jahupyty 1.200 precursor auxiliar ko abrílpe?
◼ Ehecha mbaʼépa remotenondereína
◼ Peñemongeta pene família ndive pehupytysévare
◼ Emombeʼu ermanokuérape mbaʼépa rejaposereína