‘Penekyreʼỹkena pytu marangatu rupive’
1. Mbaʼéichapa jaservivaʼerã Jehovápe?
1 Ñande ñanekyreʼỹvaʼerã jaservívo Jehovápe, ani la jajapónte chupe ogustáva jaikuaa rupi iporãha. La Biblia heʼi voi: ‘Penekyreʼỹkena pytu marangatu rupive. Ha pejapopa Jehová heʼíva guive peẽme’ (Rom. 12:11, ÑÑB). Upéicharamo jepe oĩ heta mbaʼe ikatúva ñanemokangy ha upéi ñandekaiguéma japredika hag̃ua. Mbaʼépa ikatu jajapo ñanekyreʼỹ jey hag̃ua? (2 Tim. 1:6, 7.)
2. Mbaʼépa jahupyty jastudiávo la Biblia ñaneaño?
2 Ñahesaʼỹijovaʼerã la Biblia ñaneaño. Peteĩ maranduhára katupyry ohayhu Ñandejára léi ha ovyʼaiterei voi oaprende jave ohóvo chugui (Sal. 119:97). Ajépa ñandepyʼarory ha ñanekyreʼỹete ñahesaʼỹijóvo la Biblia ñaneaño! Upéicha ningo ñaaprende jahávo heta mbaʼe neporãmba jepéva ha jahayhuve Jehovápe. Avei ñamombeʼuseve ñande rapichakuérape umi mbaʼe ñaaprendéva ñamyerakuã hag̃ua Ñandejára réra oparupiete ha ñamombaʼeguasu hag̃ua chupe (Heb. 13:15). Ñanekyreʼỹramo japredika jave jahechauka ñamombaʼeha upe tembiapo.
3. Mbaʼéichapa ikatu ñanepytyvõ Ñandejára pytu marangatu?
3 Jajerure Ñandejárape ipytu marangatu. Ñande ningo ndaikatumoʼãi jaservi porã Jehovápe ñandejehegui reínte, ipytu marangatu añoite ikatu ñanepytyvõ upearã (1 Ped. 4:11). Ñandejára ningo “ipuʼaka mbarete” ha ñañembojáramo hese katuete ñanembaretevéta japredika hag̃ua pyʼaguasúpe (Isa. 40:26, 29-31). Apóstol Pablo ohasárõ guare heta mbaʼe ijetuʼúva heʼivaʼekue ‘Ñandejára oipytyvõ’ hague chupe (Hech. 26:21, 22). Upéicha avei Ñandejára pytu marangatu tuicha ikatu ñanemokyreʼỹ japredika hag̃ua, upévare jajerurékena Chupe ñañemboʼe jave (Luc. 11:9-13).
4. Mbaʼépa ikatu jahupyty ñanekyreʼỹramo japredika hag̃ua, péro mbaʼépa ñañatendevaʼerã?
4 Ñanekyreʼỹramo japredika hag̃ua, ñane ermanokuéra ikyreʼỹta avei (2 Cor. 9:2). Ha umi hénte ñanerendusevéta, koʼýte ñañeʼẽramo chupekuéra ñande pyʼaite guive. Péro ñanembaʼerechakuaavaʼerã jajapohápe koʼã mbaʼe ha torýpe ñañemongeta hendivekuéra (Tito 3:2). Ani ñanderesarái akóinte jarrespetavaʼerãha chupekuéra ha umi mbaʼe odesidíva.
5. Mbaʼéichapa ñamyerakuãvaʼerã pe marandu porã?
5 Ñandejára pytu marangatu ñanemokyreʼỹ akóinte ñamyerakuã hag̃ua pe marandu porã. Avei ñahesaʼỹijóvo la Biblia ñaneaño ha ñañemboʼévo Jehovápe ñande pyʼaite guive ñanembareteve jajapo porã hag̃ua ko tembiapo. Jajapóramo koʼã mbaʼe ñanekyreʼỹvéta ha japredikáta “espíritu sánto puʼaka reheve” (1 Tes. 1:5, ÑÑB).