Jahechaukákena ñanekyreʼỹha Jehová ha Jesúicha Konmemorasión tiémpope
1. ¿Mbaʼépa oñehaʼãmbaite jepi ojapo testígo de Jehová Konmemorasión tiémpope?
1 Jehová ikyreʼỹeterei okumpli hag̃ua hembipota. Isaías 9:7 ohechauka mbaʼépa Jehová ojapóta Irréino rupive, ha opakuévo heʼi voi haʼe ojaposetereimaha umi mbaʼe. Jesús osegi vaʼekue avei Itúa ehémplo, ha kyreʼỹme odefende pe añetegua (Juan 2:13-17; 4:34). Káda áño, Konmemorasión tiémpope, hetaiterei puvlikadór oparupigua ko yvy ape ári oñehaʼãmbaite osegi Jehová ha Jesús ehémplo ha kyreʼỹme omboyke tiémpo osẽve hag̃ua predikasiónpe. Ha nde, ¿rejapótapa avei upéva ko áñope?
2. ¿Mbaʼépa jajapóta kyreʼỹme sábado 7 de marzo guive?
2 Ñaporoinvitákena. Ko áñope ñañepyrũta jarreparti umi invitasión sábado 7 de marzo. Upévare, iporã jahecháma koʼág̃a guive mbaʼéichapa ñamohendáta hína ñane tiémpo ikatu hag̃uáicha ñambaʼapo kyreʼỹ predikasiónpe ko kampáña aja. Entéro kongregasión oñehaʼãmbaitéta hína okuvripa iterritório. Ñanemanduʼa vaʼerã tekotevẽha avei ñainvita ñane hentekuérape, kompañéro de traváho ha de eskuélape, ñande rrevisíta ha ñane estudiantekuérape; upearã ikatu jaipuru pe invitasión térã ñane páhina jw.org.
3. ¿Mbaʼéichapa ikatu ñambaʼapove Jehová servísiope marzo ha abrílpe?
3 Prekursorádo auxiliár. Konmemorasión tiémpope, ikatu avei jahechauka ñanekyreʼỹha ñasẽvévo predikasiónpe. Marzo ha abrílpe, katuete oĩta heta ojapóva iprekursorádo auxiliár. Koʼã méspe ikatúta jaiporavo jajaposépa 30 óra térãpa 50. Jajapo vove ñande estúdio de família térã estúdio personál, iporã jahecha mbaʼépa ikatu jajapo ñasẽve hag̃ua predikasiónpe ha ñañemboʼe Jehovápe ñanepytyvõ hag̃ua (Prov. 15:22). Ñañehaʼãmbaitéramo ñambaʼapove Jehová servísiope koʼã méspe, ñamokyreʼỹta avei ñane ermanokuérape ojapo hag̃ua upéva. Ha iñimportanteveha katu, jahechaukáta ñanekyreʼỹha Jesúicha (Mar. 6:31-34).
4. ¿Mbaʼe iporãvapa jahupytýta ñanekyreʼỹramo Jehová ha Jesúicha?
4 Ñanekyreʼỹramo Jehová ha Jesúicha Konmemorasión tiémpope, jahupytýta hetaiterei mbaʼe porã. Por ehémplo, heta hénte oĩva ñande territóriope ohendúta pe mensáhe oĩva la Bíbliape. Avei, javyʼaitereíta jaikuaágui ñambaʼapoha Jehovápe g̃uarã ha ñaipytyvõha ñande rapichakuérape (Hech. 20:35). Iporãveha katu, ñambovyʼáta Ñandejára ha Itaʼýrape.