Mbaʼéichapa ikatu ñañomokyreʼỹ predikasiónpe
1 Enterove ñamombaʼe ‘pe ñeʼẽ hendapete heʼíva’ ñandéve ñande rapicha ñanemokyreʼỹ hag̃ua (Pro. 25:11). Mbaʼépa ikatu jajapo jaʼéva rupive ñamokyreʼỹ hag̃ua ñane ermanokuérape predikasiónpe?
2 Jaʼéva oporomokyreʼỹ ha oporomombaretevaʼerã. Ñañeʼẽramo ñane ermanokuéra ndive Ñandejára rehe ñaime jave predikasiónpe, ñamokyreʼỹ ha ñamombaretéta chupekuéra (Sal. 37:30). Ikatu hína ñamombeʼu mbaʼéichapa japredikáraʼe peteĩ óga járape térã ñañeʼẽ umi mbaʼe porã ramoite jahasavaʼekuére predikasiónpe (Hech. 15:3). Ikatu avei ñanemanduʼa ñaaprendevaʼekuére jaleekuévo la Biblia, umi rrevísta osẽramóva térã rreunionhápe ojeʼevaʼekuére. Ñañeʼẽkuaa avei pe diskúrso púvliko ñahenduvaʼekuére.
3 Ndaigustoietereíningo oĩramo óga jára ombaʼeporandúva ñandéve ha ndajaikuaáiramo mbaʼépa jaʼéta chupe. Péro jaha rire upégui ikatu ñañeʼẽ upévare ñane irũ ndive. Sapyʼami jepe jahechakuaa mbaʼépa ikatu jajapo oiko jeýramo ñanderehe péicha. Upearã jaiporukuaa pe lívro Razonamiento. Ha oiméramo ñandegustáraʼe mbaʼéichapa opredika ñane irũ, ovyʼáta katuete jaguerohorymíramo chupe.
4 Ñande voi ñañepyrũvaʼerã. Oĩramo ñande estúdio de lívrope peteĩ ermáno aremíma ndopredikavéiva ñanendive, ikatu ñainvita chupe ñanemoirũ hag̃ua predikasiónpe. Katuete ñañomokyreʼỹta jajapóramo upéicha (Rom. 1:12). Ha umi precursor regular ha auxiliar ovyʼa avei ñamoirũmíramo chupekuéra predikasiónpe. Ha ovyʼavétantema hikuái ñamoirũramo chupekuéra pyharevete voi térã kaʼaru. Koʼã órape ningo saʼive oñesẽ jepi ojepredika. Ha ñamokyreʼỹta umi prekursórpe ñamoirũramo chupekuéra. Oĩpa peteĩ ermáno hasykatúgui ndaikatúiva osẽ meme predikasiónpe? Ñaipytyvõta chupe jaguerahamíramo ñanendive jajapo hag̃ua peteĩ estúdio mbaʼe (Pro. 27:17).
5 Jaguerohory ha ñamombaʼéramo ñande rapichápe peteĩ mbaʼe michĩmívare jepe, ñamokyreʼỹta katuete chupe. Upévare, ñanemanduʼamíkena koʼã mbaʼére japredika jave ñande rapicha ndive ikatu hag̃uáicha jasegi ñañomokyreʼỹ (1 Tes. 5:11).