Ñaipytyvõkena ñane irũme
1. ¿Mbaʼéichapa ikatu jasegi Apóstol Pablo ehémplo ñasẽ jave japredika ñane ermanokuérandi?
1 Apóstol Pablo oĩ jave iñermanokuéra ndive akóinte oñehaʼã ‘omokyreʼỹ’ chupekuéra (Rom. 1:12). Ha ñande, ¿jaaprovechápa ñasẽ jave predikasiónpe ñamokyreʼỹ hag̃ua ñane ermanokuérape? Ñasẽ jave ñane ermánondi jajapo aktivida, iporãta ñamombeʼu chupe umi mbaʼe ñanepytyvõ vaʼekue jajapo porãve hag̃ua ñane rembiapo Jehová servísiope, ha ani jahánte hendive ñamoirũ hag̃ua chupe.
2. ¿Mbaʼéichapa ikatu ñaipytyvõ ñane irũme ipyʼaguasu hag̃ua, ha mbaʼérepa iporã jajapo upéva?
2 Ñaipytyvõkena ñane irũme ipyʼaguasu hag̃ua. Oĩ puvlikadór ochuchupáva opredikáta jave, ha upéva ojehechakuaa jepi hováre térã iñeʼẽre. Koʼã ermáno ikatu hína ipyʼaguasuve jaʼéramo chupekuéra ñamombaʼeha oñehaʼã haguére ojapo porã hembiapo predikasiónpe. ¿Mbaʼépa ikatu avei oipytyvõ chupekuéra ipyʼaguasu hag̃ua? Por ehémplo, peteĩ superintendénte omombeʼu jepi iñirũme haʼe ochuchuha avei, ha upéicha jave oñemboʼeha Jehovápe ombopyʼaguapy hag̃ua chupe. Ótro ermáno katu heʼi: “Jahechauka hag̃ua ñaimeha trankílo japukavymínte vaʼerã. Péro achuchu jave ni upéva nosẽi chéve, ha añemboʼe rirémante che pyʼaguapymie”. ¿Oĩpa peteĩ mbaʼe nepytyvõ vaʼekue ndepyʼaguasuve hag̃ua repredika jave? Oiméramo upéicha, iporãta remombeʼúramo upéva ne irũme.
3. ¿Mbaʼe mbaʼérepa ikatu ñañemongeta ñane irũ ndive ñasẽ jave jajapo aktivida?
3 Ñamombeʼúkena ñane irũme umi mbaʼe oipytyvõtava chupe. Sapyʼánte ningo jaiporu jepi peteĩ introduksión iporãva ñañemongeta hag̃ua umi héntendi predikasiónpe, térã ñakambiaʼimi umi presentasión osẽva ñane puvlikasiónpe ikatu hag̃uáicha ogustave chupekuéra. ¿Mbaʼérepa nañamombeʼúi koʼã mbaʼe ñane irũme? (Prov. 27:17.) Jahakuévo jajapo peteĩ rrevisíta ikatu jaʼe pe ñanemoirũvape mbaʼépa jahupytyse hína ha avei mbaʼéichapa ñañehaʼãta ñakonsegi upéva. Jajapopa rire peteĩ estúdio katu, jaʼekuaa ñane irũme mbaʼéicha rupípa ñamyesakã porãve peteĩ idéa térã peteĩ versíkulo, ñamombeʼukuaa avei chupe mbaʼérepa jaiporu diferénte método ñamboʼe hag̃ua káda estudiántepe.
4. ¿Mbaʼérepa iñimportánte ñaipytyvõ umi opredikávape ñanendive?
4 Umi kristiáno síglo primérope guare opredika meme vaʼekue ha oñehaʼã oipytyvõ umi héntepe, péro ndahaʼéi upévante, haʼekuéra voi oñopytyvõ ha oñomokyreʼỹ (Hech. 11:23; 15:32). Por ehémplo, apóstol Pablo omboʼe vaʼekue heta mbaʼe Timotéope ha upéi heʼi chupe omombeʼu hag̃ua avei ótrope umi mbaʼe oaprende vaʼekue (2 Tim. 2:2). Ñande avei ñamombeʼúramo ñane ermanokuérape umi mbaʼe ñaaprendéva, ñaipytyvõta hína chupekuéra opredika hag̃ua kyreʼỹme ha avei omboʼe porãve hag̃ua umi héntepe. Ha iñimportantevéva katu, péicha jajapóramo ñambovyʼáta ñande Ru yvagapeguápe (Heb. 13:15, 16).