Aporomoirũ porãpa predikasiónpe?

1. Mbaʼérepa iporãve japredika mokõi mokõi?

¹ Jesús omondórõ guare 70 hemimboʼépe omyerakuã hag̃ua pe marandu porã, heʼi chupekuéra oho hag̃ua ‘mokõi mokõi’ (Luc. 10:1). Upéicha oñopytyvõ ha oñomokyreʼỹ hikuái opredika jave. Ñande avei koʼág̃a ñasẽ japredika mokõi mokõi. Mbaʼéichapa ikatu ñaipytyvõ ñane irũme?

2. Mbaʼéichapa jahechaukakuaa ñaporomboʼe porãha japredika jave, ha mbaʼérepa jajapovaʼerã upéva?

² Ñañatende porã. Jajapysaka porã vaʼerã ñane irũre opredika jave (Sant. 1:19). Haʼe oleérõ peteĩ téysto jahekavaʼerã avei ñande Bíbliape jalee hag̃ua. Ñamaña hesekuéra oñeʼẽ jave ha jajapysaka umi mbaʼe ojeʼévare, upéicha jahechauka ñaporomboʼe porãha. Ha avei upéva omokyreʼỹta pe ogajárape ojapysaka porã hag̃ua.

3. Mbaʼéicha javépa ikatu ñaipytyvõ ñane irũme?

³ Ñañeʼẽ tekotevẽ javénte. Jahechaukákena ñamombaʼeha ñane irũme ha ani ñañeʼẽjokótei chupe opredika jave (Rom. 12:10). Péro peichahágui ndoikuaavéirõ mbaʼépa heʼíta térã ojeruréramo ñandéve ñaipytyvõ hag̃ua chupe, upépe ae iporã ñañeʼẽ. Anínte ñakambia chugui itéma, jasegi guei ñañeʼẽ haʼe omoñepyrũvaʼekuére (Pro. 16:23; Ecl. 3:1, 7). Upéicha ñamyesakã porãvéta heʼivaʼekue ñane irũ (1 Cor. 14:8).

4. Mbaʼépa jajapovaʼerã javyʼave hag̃ua japredika jave?

⁴ Umi 70 tapicha Jesús omondovaʼekue mokõi mokõi ‘vyʼapópe ou jey’ opredikahágui (Luc. 10:17). Ñande avei vyʼapópe jajúta predikasióngui ñamoirũ porãramo ñane irũme. Upévare jajapysaka porãkena ha tekotevẽ javénte ñañeʼẽ.