Tekotevẽterei jastudia la Biblia ñaneañohápe ha ñane famíliandi
1. Mbaʼépa ojapo pe Cuerpo Gobernante ha mbaʼérepa?
1 Síglo primérope ojapo haguéicha pe Cuerpo Gobernante oñangareko porã koʼág̃a Jehová rembiguaikuérare (Hech. 15:6, 28). Hiʼag̃uimbaitéma ningo pe jehasa asy guasu ha upévare tekotevẽterei ñañemoag̃uive Jehováre ára ha ára. Mbaʼéichapa jaiporúta ñane tiémpo ñamboykéva koʼág̃a jaha hag̃ua estúdio de lívrope? Iporãta enterove jaiporúramo jastudiave hag̃ua la Biblia ñane famíliandi. Upéicharõmante jaipyguara porãta Ñandejára Ñeʼẽ ha ñaaprendéta heta mbaʼe ñanepytyvõtava jajesalva hag̃ua (Sal. 1:1-3; Rom. 11:33, 34).
2. Mbaʼépa jajapovaʼerã jastudia hag̃ua ñane família ndive?
2 Jastudia hag̃ua ñane famíliandi. Tuvakuéra omboʼevaʼerã ifamíliape Jehová oipotaháicha. Upearã iporã omoĩ peteĩ óra ohesaʼỹijo hag̃ua hendivekuéra Ñandejára Ñeʼẽ (Deu. 6:6, 7). Umi nomendáiva oiporuvaʼerã avei ko tiémpo ohesaʼỹijo porã hag̃ua la Biblia. Iporã ningo káda úno ‘jaiporu porã’ ñane tiémpo ñahesaʼỹijo hag̃ua Ñandejára Ñeʼẽ ha jajepyʼamongeta hese. Upéicharõmante ñanembaretéta ñambohovái hag̃ua koʼã ára ijetuʼúva (Efe. 5:15, 16).
3, 4. Mbaʼépa ikatu jastudia ha mbaʼéichapa ñanepytyvõta?
3 Mbaʼépa ikatu jastudia. Pe Índice de las publicaciones Watch Tower ha CD-ROM Watchtower Library tuicha ñanepytyvõta igustove hag̃ua jastudia ñane famíliandi. Ikatu avei ñahesaʼỹijo Ñemañaha umi párte oĩháme konsého familiakuérape g̃uarã, pór ehémplo “Tuvakuéra omboʼe hag̃ua ifamíliape”. Jahechakuaa avei ¡Despertad! heʼihápe “Los jóvenes preguntan” térã umi informasión oñeʼẽva Ñandejára rembiapokue porãitáre.
4 Jaleekuaa avei la Biblia mbeguekatu porã, upéva ñanepytyvõta opyta porãve hag̃ua ñane akãme opa mbaʼe Ñandejára ñanemboʼéva (Heb. 4:12). Ikatu avei jahecha ñane famíliandi umi vidéo oguenohẽva testigos de Jehová. Jahechaháicha, heta mbaʼe ikatu jajapo ñahesaʼỹijo hag̃ua oñondivepa Ñandejára ñanemboʼéva. Ñaporandumína ñane famíliape mbaʼéichapa ostudiaseve hikuái.
5. Mbaʼérepa tekotevẽterei jastudia ñaneañohápe ha ñane famíliandi?
5 Mbaʼérepa tekotevẽterei koʼág̃a jaikuaave Ñandejárape. Ñañemoag̃uivéramo Ñandejárare, jajapóta heʼiháicha ñandéve la Biblia: ‘Pejepytasókena ha pehechatapeína mbaʼéichapa Jehová peneguenohẽ jejopy vaígui’ (Éxo. 14:13). Tuvakuéra ningo oikotevẽ Ñandejárare omongakuaa porã hag̃ua ifamília “koʼã tekove aña ha mbaʼe vai apoha apytépe” (Fili. 2:15). Mitãnguéra oikotevẽ oñepytyvõ chupekuéra ani hag̃ua ojapo ivaíva, ojapoháicha ikompañerokuéra eskuélape (Pro. 22:3, 6). Umi omendáva katu oñemboja meme vaʼerã Jehováre omombarete hag̃ua chupekuéra (Ecl. 4:12). Upéicharõ, jaiporu porãkena ñane tiémpo ikatu hag̃uáicha ‘ñamombarete mbareteve ñande jerovia marangatu’ (Jud. 20, BNP).