¿Mbaʼérepa tekotevẽ ñakambiaʼimi jepi japredika lája?
1. ¿Mbaʼépa tekotevẽ jajapo jaikuaávo ko múndo pyʼỹinte okambiaha?
1 Peteĩ teátrope pyʼỹi oñekambia umi mbaʼe ombojeguáva pe esenário ha umi oaktuáva upépe. Upéicha avei ko múndo pyʼỹinte okambia, ha upévare tekotevẽ ñakambiaʼimi jepi japredika lája, por ehémplo pe óra ñasẽha ha umi presentasión jajapóva jepi (1 Cor. 7:31). Péro, ¿ñaimépa hína ñakambia hag̃uáicha umi mbaʼépe?
2. ¿Mbaʼépa jajapo vaʼerã jaha hag̃ua Jehová organisasión ohoha gotyo?
2 Japredika lája. Ymaite guive kristianokuéra oñehaʼã okambia opredika lája omog̃uahẽ hag̃ua pe marandu porã hapichakuérape. Jesús omondórõ guare idisipulokuérape opredika hag̃ua, ñepyrũrã heʼi chupekuéra: “Ani pegueraha vosa tape rehe g̃uarã ni pláta” (Mat. 10:9, 10). Péro tiémpo rire okambia upe heʼi vaʼekue, oikuaágui ojepersegitaha chupekuéra ha tekotevẽtaha oho mombyry opredika hag̃ua (Luc. 22:36). Upéicha avei, umi áño ohasa vaʼekuépe Jehová organisasiónpe oñekambia ohóvo ojepredika lája, ikatu hag̃uáicha oñemog̃uahẽ umi héntepe pe marandu porã. Por ehémplo, yma ojeporu vaʼekue tarhéta de testimónio, prográma de rrádio ha áuto iparlánteva. Koʼág̃arupi heta hendápe ijetuʼuve jatopa hag̃ua umi héntere hógape, upévare ojeʼe jey jey ñandéve tekotevẽha japredika oimehápe ha umi lugár oĩhápe hetave hénte, ikatu hag̃uáicha ñamombeʼu pe marandu porã umi ndajajuhúivare hógape ñasẽ jave japredika. Ha jatopa hag̃ua umi ombaʼapóvare un diaite, ojeʼe ñandéve ñasẽ hag̃ua kaʼaruete. Jahechaháicha Jehová kárro okambia ohóvo hape. ¿Jahápa hína hapykuéri? (Ezeq. 1:20, 21.)
3. ¿Mbaʼépa ikatu jajapo oho porãve hag̃ua ñandéve predikasiónpe?
3 Umi presentasión. ¿Mbaʼépa oipyʼapy koʼág̃arupi umi héntepe? ¿Oipyʼapýpa chupekuéra pláta, ifamília térãpa umi gérra? Jaikuaáramo umi mbaʼe oikóva ha ohasáva hikuái, ñanepytyvõta japrepara porã hag̃ua umi presentasión jaiporútava predikasiónpe (1 Cor. 9:20-23). Umi hénte omombeʼu jave ñandéve umi mbaʼe oipyʼapýva chupekuéra, iporãvéta ñañeʼẽramo hendivekuéra upévare, jasegi rangue jajapo pe presentasión japrepara vaʼekue.
4. ¿Mbaʼérepa tekotevẽterei pyaʼe jajapo Jehová organisasión heʼíva?
4 Koʼẽrõitéma oñepyrũta pe jehasa asy guasu ohechaukátava oñehundi potaitemaha ko múndo aña. “Saʼipaitéma ningo pe tiémpo hembýva.” (1 Cor. 7:29.) Upévare, tekotevẽterei pyaʼe jajapo Jehová organisasión heʼíva. Upéicharõ añoite ikatúta jaaprovecha porã pe tiémpo hembýva Ñandejára servísiope.