Ñande ndahaʼéi testígo sapyʼagua
1. Mbaʼépa ñanemboʼe Jesús opredikárõ guare peteĩ kuñáme?
1 Peteĩ jey Jesús oho opredika Galiléape, ha órare oguata rire opyta peteĩ tavaʼípe oĩva Samaria oñesẽnguévo. Haʼe ikaneʼõiterei ha ijyʼuhéi, upémarõ oguapy peteĩ póso ykére opytuʼu hag̃ua, hemimboʼekuéra oho aja ojogua tembiʼurã. Oĩ aja upépe ou peteĩ kuña ogueraha hag̃ua y, ha Jesús oaprovecha ha opredika chupe (Juan 4:5-14). Haʼe ndohejái ohasa ni peteĩ oportunida opredika hag̃ua, mbaʼéicha rupípa? La Biblia heʼi Jesús haʼeha ‘testígo jeroviapy ha añetetéva’ (Rev. 3:14). Ñande avei ñahaʼangaséramo chupe jaikovaʼerã testígo teéicha koʼẽ koʼẽre (1 Ped. 2:21).
2. Mbaʼépa jajapovaʼerã japredika hag̃ua opárupi?
2 Jajepreparákena. Iñimportanteterei ningo jajeprepara porã ha jagueraha puvlikasión mamo jahahápe japredika hag̃ua opárupi. Heta ermáno ogueraha tratádo ha oheja umi negosioháre, estasión de servísiope ha ambue tapicha otopávape (Ecl. 11:6). Pór ehémplo peteĩ ermána oviaha meméva akóinte ogueraha peteĩ Biblia michĩva ha pe lívro Mbaʼépa omboʼe la Biblia? ikatu hag̃uáicha oñemongeta ijykereguándi.
3. Mbaʼéichapa ikatu ñañepyrũ ñañemongeta ñande rapichándi?
3 Ñande ñambohapevaʼerã. Japredikátaramo oimehápe natekotevẽi derechoitéma voi ñañeʼẽ ñande rapichápe la Bíbliare. Pór ehémplo Jesús opredikárõ guare pe kuña Samariayguápe, ndeʼíri chupe oñepyrũre voi haʼeha pe Mesías, upéva rangue ojerure raẽ chupe y hoyʼu hag̃ua. Jaʼekuaa upéicharõ Jesús ombohape hague opredika hag̃ua pe kuñáme (Juan 4:7-9). Péicha ojapovaʼekue avei peteĩ ermána. Haʼe ohechakuaa ikatuha opredika hapichakuérape oporandúrõ hikuái mbaʼéicha rupípa ndofestehái peteĩ arete. Haʼe ndeʼíri derechoite haʼeha testígo de Jehová, síno heʼi: “Adesidi ndafestehamoʼãiha”. Upéva ombokuriosoiterei umi héntepe ha heta oĩ oporandúva chupe mbaʼéicha rupípa odesidi upéicha. Pe ermána oaprovecha ha oñepyrũma opredika.
4. Mbaʼérepa nemokyreʼỹ Mateo 28:18-20 heʼíva?
4 Jesús heʼivaʼekue ñamyerakuãvaʼerãha pe marandu porã oparupiete. Haʼe omohuʼãmavaʼekue hembiapo ko yvy ape ári, upéicharamo jepe omombaʼe ha ojesareko meme ñane predikasiónre (Mat. 28:18-20). Ñande ndahaʼeihína testígo sapyʼagua, upévare ñahaʼangákena Jesúspe ikatu hag̃uáicha japredika oimehápe (Heb. 10:23).