Nde ikatu repredika opárupi!

1. a) Mbaʼépa heʼise japredika opárupi? b) Mávapa ñande apytégui oikuaa Jehovápe ojepredika rupi chupe oikohárupi?

¹ Mboy ermánopa oĩ ne kongregasiónpe ostudiáva la Biblia ojepredika rupi chupe oikohárupi? Ni nderegueroviamoʼãi oĩha heta ermáno oikuaáva Jehovápe ojepredika rupi chupe upéicha. Ñande avei japredikavaʼerã opárupi, upéva heʼise ñamyerakuãvaʼerãha Ñandejára marandu mamo jaikohárupi. Pór ehémplo eskuélape, koléhiope, ñambaʼapohápe, jahávo ñambaʼejogua, javiaha jave, javisitávo ñane hentekuérape, ñane vesínope ha umícha. Japredikárõ opárupi ikatuhína ñaipytyvõ heta héntepe. Peteĩ grúpo oĩháme 238 Testígo, 95 rupi ojevautisa ojepredikágui chupekuéra oikohárupinte.

2. Mbaʼe ehémplopa jatopa Ñandejára Ñeʼẽme ohechaukáva ojepredika hague opárupi?

² La Biblia omombeʼu síglo primérope ndojepredikái hague ogahárupinte. Pór ehémplo, Jesús ohasárõ guare Samaria rupi, opredika peteĩ kuña oguenohẽvape y Jacob ykuágui (Juan 4:6-26). Peteĩ kuimbaʼe ombaʼapóva rréina Etiopiaygua palásiope olee ohóvo Isaías kuatiañeʼẽ, ha upévo Felipe oñepyrũ hag̃ua oñemongeta hendive oporandu chupe: “Hesakã porãpa ndéve upe remoñeʼẽva rehóvo?” (Hech. 8:26-38). Avei apóstol Pablo oĩrõ guare kárselpe Filípospe, opredikavaʼekue peteĩ guárdia kárselpe (Hech. 16:23-34). Upe rire oĩ jeýrõ guare préso peteĩ ógape, torýpe ‘omog̃uahẽ umi ohóvape hendápe. Kyhyjeʼỹme omyerakuã Ñandejára sãmbyhy ha oñemoñeʼẽ Jesucrístore’ (Hech. 28:30, 31). Nde avei ikatu rejapo haʼekuéra ojapo haguéicha, neotĩramo jepe. Jahechamína mbaʼéichapa.

3. Mbaʼépa ñanemomýita ñañeʼẽ hag̃ua Ñandejára rembipotáre ñaneotĩramo jepe?

³ Mbaʼéichapa ñamoñepyrũkuaa. Heta vése ijetuʼu ñañepyrũ hag̃ua ñañemongeta peteĩ ndajaikuaáiva ndive. Ha jaikuaáramo jepe ñande rapichápe, ñaneotĩ rupi sapyʼánte ndajapredikái chupe. Mbaʼépa ñanemomýita ñañeʼẽ hag̃ua Ñandejára rembipotáre ñaneotĩramo jepe? Jajepyʼamongetavaʼerã umi mbaʼe omeʼẽvare ñandéve Jehová ñañemoag̃ui hag̃ua hese, mbaʼeichaitépa imbaʼeporã ha mbaʼéichapa umi hénte oĩva mombyry chugui naiñesperansavéi (Jon. 4:11; Sal. 40:5; Mat. 13:52). Avei jajerurevaʼerã Jehovápe ñanembopyʼaguasu hag̃ua (1 Tes. 2:2). Peteĩ ermáno ohovaʼekue Escuela de Galaádpe heʼi: “Ijetuʼu jave chéve añemongeta hag̃ua che rapichándi añemboʼe Jehovápe, upéva katuete chepytyvõ”. Nde avei reñemboʼe mbykymi vaʼerã Jehovápe rehasáramo ko situasiónre (Neh. 2:4).

4. Mbaʼépa ikatu jajapo japredika mboyve ñande rapichápe, ha mbaʼérepa?

⁴ Japredikátaramo jaikohárupi natekotevẽi katuete jaiporu peteĩ presentasión térã jalee peteĩ téysto ñamoñepyrũ hag̃ua. Ikatúnte ñañemongeta raẽ hendive ambue mbaʼére, japredikáma rangue chupe. Heta ermáno heʼi oñeñandu porãveha opredika hag̃ua ojapo rire upéicha. Péro jatopáramo peteĩ noñeʼẽséiva ñanendive, ñanembaʼerechakuaavaʼerã ha jajedespedi porãnte chugui.

5. Mbaʼépa ojapo peteĩ ermána opredika hag̃ua oikohárupi?

⁵ Peteĩ ermána iñotĩva, oiko jepi opredika ombaʼejogua jave, haʼe omaña umi héntere ha hory chupekuéra. Ohechakuaáramo haʼekuéra horyha avei, oñeʼẽ mbykymi. Ha umi hénte oñeʼẽramo avei chupe, haʼe oñemongetáma hendivekuéra. Avei ojapysaka porã heʼívare hikuái, oikuaa hag̃ua mbaʼe témarepa ikatu opredika. Upéicha ko ermána ohejáma heta puvlikasión umi héntepe ha omoñepyrũma peteĩ estúdio.

6. Mbaʼéichapa ikatu ñañepyrũ ñañemongeta ñande rapichándi?

⁶ Mbaʼépa jaʼekuaa. Mbaʼépa jaʼekuaa ñañepyrũ mboyve ñañemongeta? Jesús ojerurevaʼekue y pe kuñáme oĩrõ guare pe póso ykére (Juan 4:7). Ñande avei ikatúnte jasaluda térã ñambaʼeporandu ñande rapichápe ñañepyrũ hag̃ua. Ha ñañemongetávo jaʼekuaa peteĩ mbaʼe oĩva la Bíbliape oikuaaseve hag̃ua Ñandejára rembipota (Ecl. 11:6). Heta ermáno heʼínte peteĩ mbaʼe ogustátava umi héntepe, ikatu hag̃uáicha haʼekuéra upe rire ombaʼeporandu. Pór ehémplo ñahaʼarõ aja doktórpe ikatu jaʼe: “Avyʼaitéta ningo opa vove umi mbaʼasy!”.

7. Mbaʼéichapa ñanepytyvõta jajesareko porãramo?

⁷ Tekotevẽ avei jajesareko porã ñande jerére. Pór ehémplo oĩramo mitã ojeporta porãva, ikatu jaguerohory pe oñangarekóvape hese ha jaʼe: “Mbaʼe piko rejapo ojeporta porãite hag̃ua?”. Peteĩ ermána ohendu jepi mbaʼe rehépa oñeʼẽ umi ombaʼapóva hendive. Ha upe rire omeʼẽ chupekuéra informasión ou porãtava káda únope. Pór ehémplo oikuaárõ guare peteĩ ikompañéra de traváho omendataha, ogueraha chupe peteĩ rrevísta ¡Despertad! ohechaukáva mbaʼéichapa ikatu ojejapo porãve peteĩ kasamiénto. Upéicha ko ermána oñemongeta la Bíbliare hendive.

8. Mbaʼéichapa ikatu jaiporu ñane puvlikasión ñañepyrũ hag̃ua ñañemongeta ñande rapichándi?

⁸ Ikatu avei ñañepyrũ ñañemongeta ñande rapichándi ñañemoĩramo jalee ñane puvlikasión ótro ñanderechatahápe. Peteĩ ermáno oiporavo rrevísta Ñemañaha térã ¡Despertad!-gui peteĩ artíkulo ogustátava umi héntepe, ha olee kirirĩháme. Ohechakuaávo ótro omañaha irrevístare ombaʼeporandúma chupe térã omombeʼu peteĩ mbaʼe oleéva. Ojapo rupi upéicha ko ermáno hetápema opredika. Ñande avei jahejakuaapeteĩ puvlikasión ohechatahápe ñane kompañéro de traváho térã eskuelapegua, upéicha haʼekuéra ikatu oikuaaseve ha ombaʼeporandu.

9, 10. a) Mbaʼépa jajapokuaa japredika hag̃ua umi héntepe mamo ñaimeháme? b) Mbaʼéichapa nde rejapo upéva?

⁹ Ñande voi ñambohapevaʼerã. Tekotevẽterei ningo japredika koʼã tiémpope, upévare ndajaikoivaʼerã ñahaʼarõ ijárõ g̃uarã ñandéve jajapo hag̃ua ko tembiapo. Síno ñande voi ñambohapevaʼerã ha japredika umi héntepe mamo ñaimeháme. Upearã ñapensa raẽ vaʼerã mbaʼeichagua héntepa ikatu jatopa upe jaikohárupi ha mbaʼépa ikatu jaʼe ñañemongeta hag̃ua hendivekuéra. Avei jaguerahavaʼerã peteĩ Biblia ha ndofaltaivaʼerã ñandéve puvlikasión ñameʼẽ hag̃ua umi ñanerendu porãvape (1 Ped. 3:15).

¹⁰ Heta puvlikadór oheka ládo opredika hag̃ua oikohárupi. Pór ehémplo, peteĩ ermána oiko peteĩ edifísio ndaikatuihápe ojeike ojepredika. Upémarõ haʼe oho jepi pe lugár ojepytuʼuhápe oarma hag̃ua umi rrompekavésa orekóva paisáhe neporãva. Umi hénte oñembojávo hendápe ha oguerohory umi paisáhe, haʼe oaprovecha ha omombeʼu chupekuéra Ñandejára koʼẽrõitéma ojapotaha “yvága pyahu ha yvy pyahu” (Rev. 21:1-4, ÑÑB). Ha nde, mbaʼépa ikatu rejapo repredika hag̃ua umi héntepe mamo oĩháme hikuái?

11. Mbaʼépa ikatu jajapo jatopáramo ñanerendu porãva?

¹¹ Ñanerendu porãramo. Jatopáramo peteĩ ñanerendu porãva jaaprovechavaʼerã. Pór ehémplo, jahechakuaáramo ikatuha ñañeʼẽ chupe jaʼekuaa: “Igustoiterei ningo ñañemongeta nendive. Moõ piko ikatu rotopa jey ñañemongetave hag̃ua?”. Heta ermáno omeʼẽntema idireksión ha iteléfono número, ha heʼi: “Avyʼaiterei ningo ikatu haguére ñañemongeta. Reikuaasevéramo koʼã témagui ikatu cherenói térã reho voi cherendápe. Koʼápe heʼi moõpa chetopakuaa”. Péro ani ñanderesarái, ndaikatumoʼãiramo ñaipytyvõ ñande rapichápe, pyaʼe ñamyenyhẽvaʼerã pe formulário Sírvase visitar (S-43) ha ñameʼẽ pe sekretário ñane kongregasionguápe, ohecha hag̃ua mbaʼépa ikatu ojejapo oñepytyvõ hag̃ua chupe.

12. a) Mbaʼérepa ñaanotavaʼerã mboy órapa jajapo japredika jave jaikohárupi? b) Mbaʼépa ojehupyty ojejapo haguére upéicha? (Ehecha pe rrekuádro heʼihápe “Umi mbaʼe ojehupytýva ojepredikávo ojeikohárupi”.)

¹² Ñanemanduʼavaʼerã tekotevẽha ñaanota jahávo mboy órapa jajapo japredika jave jaikohárupi, ndajahupytýiramo jepe una óra. Pór ehémplo, káda puvlikadór opredikáramo cinco minúto pór día, un méspe ojehupytýta diecisiete millones de óra!

13. Mbaʼépa ñanemomyivaʼerã japredika hag̃ua jaikohárupi?

¹³ Ñande japredika jaikohárupi jahayhúgui Ñandejárape ha ñande rapichakuérape (Mat. 22:37-39). Haʼe ningo peteĩ ‘mburuvicha heko jajaipáva ha ipuʼakapa’, upévare ñamombaʼeterei chupe ha jaikuaauka hembipota (Sal. 145:7, 10-12, ÑÑB). Avei jahayhu añete rupi ñande rapichakuérape jaaprovecha opaichagua oportunida japredika hag̃ua oĩ reheve tiémpo (Rom. 10:13, 14). Ñapensa mimíramo mbaʼéichapa ikatu ñañepyrũ ñañemongeta umi héntendi ha jajeprepara upearã, enterovéva japredikakuaa jaikohárupi. Ha ikatu voi ñaipytyvõñaína peteĩ ipyʼaporãvape oikuaa hag̃ua Jehovápe.

[Komentário oĩva páhina 4-pe]

Ñepyrũrã ikatu ere nde réra ha eñemongeta hendive ambue mbaʼére

[Komentário oĩva páhina 5-pe]

Heta puvlikadór oñehaʼa oheka ládo opredika hag̃ua upe oikohárupi

[Rrekuádro oĩva páhina 5-pe]

Mbaʼépa rejapokuaa reñepyrũ hag̃ua reñemongeta

◼ Ejerure Jehovápe tanepytyvõ reñepyrũ hag̃ua

◼ Eheka umi hénte hory ha ndojapuráiva

◼ Emaña hesekuéra, nderory ha ere peteĩ mbaʼe ogustátava chupekuéra

◼ Ejapysaka porã

[Rrekuádro oĩva páhina 6-pe]

Umi mbaʼe ojehupytýva ojepredikávo ojeikohárupi

• Peteĩ ermáno omyatyrõka aja hiʼáuto tallérpe, opredika umi oĩvape upépe ha omeʼẽ chupekuéra pe invitasión diskúrso puvlikorã ojejapótava peteĩ aty guasúpe. Un áño haguépe, ótro aty guasu aja osaluda porãiterei chupe peteĩ ermáno haʼe ndoikuaáiva. Upe rire ohechakuaa haʼeha pe kuimbaʼe oĩvaʼekue tallérpe. Ko karai ohókuri ohendu pe diskúrso ha ojerure peteĩ estúdio. Koʼág̃a haʼe ha hembireko ojevautisáma.

• Peteĩ ermána mbohapy imembýva oikuaa ypy vaʼekue Jehovápe ojepredika rupi chupe oikohárupinte, upémarõ haʼe ohechakuaa iñimportanteha avei ojapo upéicha. Upévare katuete opredika umi hénte oikuaávape imembykuéra rupive, tahaʼe ivesinokuéra, eskuélape térã ojejapo jave rreunión tuvakuérandi. Haʼe oñepresenta jave, akóinte heʼi mbaʼeichaitépa la Biblia oipytyvõ chupe omongakuaa porã hag̃ua imembykuérape ha upe rire oñeʼẽ jey ótro témare. Upéicha oreko jeývo oportunida oñemongeta hag̃ua hendivekuéra oiporu meméma la Biblia heʼíva. Ko ermána oipytyvõma doce tapichápe ojevautisa hag̃ua.

• Peteĩ vendedor de seguro og̃uahẽ peteĩ ermána rógape, ha haʼe oaprovecha opredika hag̃ua. Ko ermána oporandu chupe ikatúrõpa ojeaseguráne ponove hasy, ovyʼa ha oikove hag̃ua opa árare. Haʼe heʼi ojeasegurataha katuete ha oporandu mbaʼeichagua segúrorepa oñeʼẽhína. Pe ermána omombeʼu Ñandejára oprometéva ha omeʼẽ chupe peteĩ puvlikasión. Pe karai oleepaite peteĩ kaʼarúpe ha upe rire oñepyrũ ostudia. Upéi oho rreunionhápe ha tiémpo rire ojevautisa.

• Peteĩ ermána oviahárõ guare aviónpe oñepyrũ oñemongeta peteĩ kuñakaraíndi oguapýva ijykére ha amo ipahápe opredika chupe. Og̃uahẽ rire, pe ermána omeʼẽ chupe idireksión ha iteléfono número, ha omokyreʼỹ chupe ojerure hag̃ua peteĩ estúdio og̃uahẽ jey vove hógape testígo de Jehová. Un día rire mokõi testígo og̃uahẽ hógape ha pe kuñakarai oñepyrũ ostudia la Biblia, pyaʼe oñakãrapuʼã ha ojevautisa. Upe riremínte mbohapy estúdioma haʼe ojapo.

• Peteĩ ermáno orekóva 100 áño ha ndaikatúiva ohecha, oiko peteĩ óga oñeñangarekohápe umi ijedávare. Haʼe oiko oikónte ha heʼi: “Ñaikotevẽ Ñandejára Rréinore”. Upévare heta enferméra ha ambue oikóva upépe ombaʼeporandu chupe. Upémarõ haʼe oaprovecha ha omyesakã mbaʼépa pe Rréino. Ótro día peteĩ ombaʼapóva upépe oporandu chupe mbaʼépa ojapóta Ñandejára múndo pyahúpe. Haʼe heʼi: “Ahecha ha aguata jeýta, ha ahapýta che sílla de rruéda”. Ndohechavéima rupi, ko ermáno ojerure jepi pe kuñakaraípe olee hag̃ua chupe umi rrevísta. Ha peteĩ jey, ohórõ guare ovisita chupe itajýra, ko kuñakarai oporandu ikatúpa ogueraha hógape koʼã rrevísta. Avei peteĩ enferméra omombeʼu pe ermáno rajýpe: “Ore koʼág̃a roʼéma avei: ‘Ñaikotevẽ Ñandejára Rréinore’”.

• Oforma aja fíla peteĩ rrestaurántepe, peteĩ ermána ohendu mbaʼéichapa oñemongeta polítikare únos kuánto kuimbaʼe ijedáva. Peteĩva heʼírõ guare umi goviérno ndaikatuiha osolusiona umi hénte provléma, pe ermána opensa: “Aaprovecháta kóva”. Oñemboʼe mbykymi Jehovápe ha oñemboja hendapekuéra. Ñepyrũrã oñepresenta ha upe rire omombeʼu chupekuéra Ñandejára Goviérno osolusionataha yvyporakuéra provléma, ha oikuaveʼẽ chupekuéra peteĩ folléto. Upe javete ou pe herénte. Pe ermána oimoʼã heʼitaha chupe oho hag̃ua upégui, péro ipahápe heʼi ohendu hague chupekuéra oñemongetávo ha oipotaha avei peteĩ folléto. Upévo ou avei peteĩ kuña ombaʼapóva upépe, hesay pororopa ojapysaka rire hesekuéra ha omombeʼu haʼe ostudia hague la Biblia ha koʼág̃a ostudiase jeyha.