Ñañehaʼãkena ñamoñepyrũ estúdio
1. Mbaʼéichapa ikatu jajapo Mateo 28:19, 20 heʼíva?
1 Jesús heʼivaʼekue ‘ñamboʼe hag̃ua umi héntepe oiko hag̃ua chuguikuéra hemimboʼe’ (Mat. 28:19, 20). Ha ikatu hag̃uáicha ñakumpli porã ko tembiapo, koʼág̃a ñamboyke peteĩ fín de semána káda més jajapo hag̃ua upéva. Péro ndahaʼéi umícha javénte ñaikuaveʼẽvaʼerã estúdio, síno ñañehaʼãvaʼerã ñamoñepyrũ ija vovéntema ñandéve. Jahechamína mbaʼépa ikatu ñanepytyvõ.
2. Máva mávapepa ikatu ñaikuaveʼẽ estúdio?
2 Ñaikuaveʼẽkena. Ñanemanduʼavaʼerã hetave héntepe ñaikuaveʼẽramo estúdio, hetave oportunida jaguerekoha jastudia hag̃ua hendivekuéra (Ecl. 11:6). Ñañehaʼãmapa ñañepyrũ peteĩ estúdio ñañemongeta ypy guive pe ogajára ndive? Pór ehémplo Estados Unídospe peteĩ kongregasión oñehaʼã ojapo upéva un més aja ha omoñepyrũ hikuái 42 estúdio. Ñandékena ñaikuaveʼẽ avei estúdio ñande rapichakuérape. Pyʼỹinte oĩ ñanerendu porãva ha upévare javisita meme chupekuéra. Péro anítei ñaimoʼã haʼekuéra oikuaamaha voi ñande ñambostudiaha umi héntepe ha upévare natekotevẽiha jaʼe chupekuéra mbaʼeve. Heʼíramo jepe ñandéve ndostudiaseiha jasegintevaʼerã javisita chupekuéra. Avei ikatu ñaikuaveʼẽ estúdio ñane kompañéro de traváho térã kolehiopegua, ñane vesíno ỹrõ ñane hentekuérape. Ikatu avei ñaporandu ñane estudiántepe orekópa peteĩ iñamígo térã ihénte ostudiaséva la Biblia.
3. Mbaʼépa ikatu jaiporu ñamoñepyrũ hag̃ua estúdio, ha mbaʼéicha javépa jaiporukuaa?
3 Mbaʼépa ikatu jaiporu? Pe tratádo Ndépa reñeporandúmava koʼã mbaʼe? ikatu jaiporu ñamoñepyrũ hag̃ua estúdio. Japredika jave ñameʼẽkuaa umi ñanerendúvape, ndohejáiramo jepe ótra puvlikasión. Ko tratádo ningo ideprovechoiterei japredika jave negosioháre, kállere, kárta rupive, javisita jeývo umi ohendu porã vaʼekuépe térã ndaipóriramo pe ogajára. Ikatu avei jagueraha javiaha jave, jaha jave ñambaʼejogua térã ñambaʼapo hag̃ua. Pe tratádo ohechauka mbykymi páhina 4-pe mbaʼéichapa ñambostudiavaʼerã umi héntepe jaiporúvo lívro Mbaʼépa omboʼe la Biblia?
4. Mbaʼéichapa ikatu jaiporu tratádo Reñeporandúmavapa ñamoñepyrũ hag̃ua peteĩ estúdio?
4 Mbaʼéichapa ikatu jaiporu? Ñameʼẽ rire pe tratádo umi héntepe, jahechauka chupekuéra umi porandu oĩva páhina únope, ha ikatu jaʼe: “Mavaitévapa reikuaaseve koʼãvagui?”. Upe rire jahechauka chupe mbaʼéichapa oñembohovái pe tratádope ha jalee mbykymi páhina 4 oñekuaveʼẽhápe estúdio. Upéi jahechauka moõpa oñeʼẽve upe témare lívro Mbaʼépa omboʼe la Biblia?, ñaikuaveʼẽ chupe pe lívro ha jahecha arakaʼépa ikatu jaha jey ñañemongetave hag̃ua.
5. Mbaʼérepa akóinte jajesarekovaʼerã ñamoñepyrũ hag̃ua estúdio?
5 Oĩ gueteri heta oikuaaséva la Biblia omboʼéva, upévare akóinte jajesarekovaʼerã ñamoñepyrũ hag̃ua estúdio ha ñaipytyvõ umi héntepe oguata hag̃ua pe tape porãre. Upéva ningo peteĩ tembiapo iporãitereíva. Aníkena ñanderesarái hetavépe ñaikuaveʼẽramo estúdio, hetave oportunida jaguerekotaha javyʼa hag̃ua (Mat. 7:13, 14).