Ñañehaʼãkena jajapo disípulo
1. ¿Mbaʼéichapa ikatu ñaipytyvõ umi héntepe ojesalva hag̃ua?
1 Pe áño de servísio ohasa vaʼekuépe, umi infórme ohechauka porãiterei Jehová puévlo kyreʼỹme opredikaha oikóvo ha oñehaʼãha omog̃uahẽ enterovépe pe marandu porã oñeʼẽva Ñandejára Rréinore (Mat. 24:14). Hetaiterei persónape oñemog̃uahẽ pe mensáhe vívliko ojepredika rupi ogahárupi, ojejapógui umi kampáña espesiál ojerreparti hag̃ua umi tratádo ha invitasionkuéra ha ojepredika rupi umi lugár hetahápe hénte. Péro umi hénte ojesalva hag̃ua, ñaipytyvõ vaʼerã chupekuéra oiko hag̃ua chuguikuéra Jesús disípulo. Upearã iñimportánte ñamboʼe ñande rapichakuérape la Biblia (1 Tim. 2:4).
2. ¿Mbaʼépa iporãta ñañeporandu ani hag̃ua ñanderesarái jaofrese hag̃ua estúdio?
2 Jaofresékena estúdio vívliko. Peteĩ persóna oikuaasevéramo la Biblia omboʼéva, ¿jajerurépa chupe inúmero de teléfono ha ñañehaʼã ñañeʼẽ jey hendive jaofrese hag̃ua chupe estúdio? ¿Arakaʼépa ñañehaʼã raʼe ñamoñepyrũ hag̃ua estúdio predikasiónpema voi? ¿Jaofresémapa estúdio vívliko umi hénte orresivívape ñande rrevísta káda mes? ¿Jajepokuaápa jahechauka umi vidéo ¿Mbaʼérepa restudia vaʼerã la Biblia? ha ¿Mbaʼéichapa rojapo peteĩ estúdio vívliko? ñane kompañerokuéra de koléhio, de traváho, ñane vesíno ha ñane hentekuérape? Japredika jave pe karríto reheve, ¿ñamombeʼúpa entéro umi orahávape umi puvlikasión jaipurúva jepi jajapo hag̃ua estúdio ikatuha ojerure avei peteĩ estúdio de la Biblia grátis?
3. ¿Mbaʼépa ñaikotevẽ ñamboʼe porã hag̃ua la héntepe?
3 Jehová ha Jesús ñanepytyvõ. Jesús omandárõ guare idisipulokuérape ojapo hag̃ua disípulo, heʼi chupekuéra “tapeho”. Péicha ohechauka iñimportanteha jakuʼe ha ñande voi jaha jaheka umi héntepe. Péro haʼe nañanderejái ñaneaño, síno opromete oĩtaha ñanendive (Mat. 28:19, 20). Jehová omeʼẽ ñandéve ijespíritu sánto ha umi erramiénta ñaikotevẽtava jajapo hag̃ua ko tembiapo. Ha ndahaʼéi upévante, ñanemboʼe avei mbaʼéichapa jaipuru vaʼerã umíva ñamboʼe hag̃ua la héntepe (Zac. 4:6; 2 Cor. 4:7). Upévare jajerure vaʼerã Jehovápe tañanemokyreʼỹ jajapose hag̃ua ko tembiapo iñimportantetéva (Filip. 2:13).
4. ¿Mbaʼérepa ñañehaʼã vaʼerã jajapo hag̃ua disípulo?
4 Ñande ningo javyʼaiterei japredika haguére pe marandu porã. Péro koʼýte javyʼáta ñaipytyvõramo umi persónape oikuaa hag̃ua la Biblia omboʼéva ha oguata hag̃ua ‘pe tape oporoguerahávare jeikove opaveʼỹvape’ (Mat. 7:14; 1 Tes. 2:19, 20). Ha iporãveha katu, ñañehaʼãvo ñaipytyvõ umi héntepe oiko hag̃ua chugui Jesús disípulo, ñambovyʼa hína Jehovápe. Haʼe ningo ndoipotái “avave oñehundi; oipota guei enterove oñarrepenti” (2 Ped. 3:9).