Ñamotenondékena predikasión
1. Mbaʼéichapa Jesús ohechauka omombaʼeha predikasión?
1 Jesús omombaʼeterei Ñandejára rembipota, upévare omyerakuã meme vaʼekue pe marandu porã. Oguata hetaiterei kilómetro Palestina tuichakuére opredika hag̃ua hetave tapichápe. Haʼe nopensaivaʼekue ijehénte ha ovyʼa orekomívare, upéicha rupi oiporu itiémpo opredikave hag̃ua (Mat. 8:20). Peteĩ jey, umi hénte ojokose chupe omonguera hag̃ua umi hasývape, péro haʼe heʼi: ‘Ahavaʼerã avei ambue tavakuéra rupi amombeʼu hag̃ua umi mbaʼe porã Ñandejára rréino ojapótava. Upearã ningo añembouvaʼekue’ (Luc. 4:43, NM).
2. Mbaʼérepa Jesús omombaʼetevaʼekue predikasión?
2 Mbaʼérepa Jesús omombaʼetevaʼekue predikasión? Ñepyrũrã oipotaiterei rupi oñemomarangatu Ñandejára réra (Mat. 6:9). Ha ohayhuetereígui Itúvape iñeʼẽrendu chupe, upéicha okumpli hembipota (Juan 14:31). Avei ojepyʼapy rupi umi héntere ha oipytyvõségui chupekuéra opredika kyreʼỹ vaʼekue (Mat. 9:36, 37).
3. Mbaʼépa ñanepytyvõta jasegi hag̃ua Jesús ehémplo?
3 Jasegíkena iñehémplo. Ko múndo ningo hetaiterei tiémpo oiporu ñandehegui ha oikuaveʼẽ ñandéve heta mbaʼe, upéicha rupi ijetuʼu jahecha hag̃ua pe predikasión Jesús ohecha haguéicha (Mat. 24:37-39; Luc. 21:34). Péro, mbaʼépa ñanepytyvõta jasegi hag̃ua iñehémplo? Jahechavaʼerã mbaʼe mbaʼépa iñimportanteve ha ñamotenonde umíva, avei ñamboykevaʼerã tiémpo ñañembosakoʼi ha ñasẽ meme hag̃ua predikasiónpe (Fili. 1:10). Tekotevẽ avei javyʼa jahupytývarente ha ani jaiporupaite umi mbaʼe oĩva ko múndope (1 Cor. 7:31).
4. Mbaʼérepa ñamotenondevaʼerã predikasión?
4 Iñarandúva ningo omotenonde umi mbaʼe iñimportantevéva ha ndoikói operde rei itiémpo. Pór ehémplo, ohechárõ opuʼã peteĩ torménta vai pyaʼe ojeprepara oñangareko hag̃ua ifamíliare ha oavisa ivesinokuérape. Ñande avei tekotevẽ ñanearandu, Armagedón opuʼã peteĩ torménta vaícha ha og̃uahẽpotaitemahína (Sof. 1:14-16; 1 Cor. 7:29). Upévare, ñañangarekovaʼerã ñandejehe ha umi mbaʼe ñamboʼévare kongregasiónpe térã ambue hendápe. Jajapóramo upéicha ha ñamotenonde predikasión, ikatúta jajesalva ñande ha avei umi ñanerendúva (1 Tim. 4:16).