Japredika ñasẽ porã hag̃uáicha pe hénte oĩha rupi
1. Ojapohaguéicha umi kristiáno ypykue, mbaʼéichapa kristianokuéra koʼag̃agua opredika avei pe hénte oĩha rupi, ha mbaʼéichapa osẽ hikuái?
1 Ojapohaguéicha umi disípulo ypykue, kristianokuéra koʼag̃agua oñehaʼã avei oñeʼẽ opavave tapicha ndive pe marandu porãgui ikatuhápe otopa hesekuéra (Hech. 16:13; 17:17; 20:20, 21). Oñehaʼãgui opredika pe hénte oĩha rupi, otopa hikuái umi tapicha ohendusévape, umi ndaikatumoʼãiva ojetopa ojeho vove ojepredika ogaha rupi.
2. Mbaʼérepa ñanderechakuaavaʼerã japredika jave pe hénte oĩha rupi, ha mbaʼépa ikatu jajapo oñembaʼapo porãve hag̃ua?
2 Tekotevẽ ñanderechakuaa japredika jave pe hénte oĩha rupi. Iporãve jepi ñambaʼapo jajehechaukaitereiʼỹre. Pór ehémplo, oĩramo hetaiterei puvlikadór opredikáva peteĩ hendápe, térã oikéva peteĩ negósio guasúpe, ikatu oĩ umi oñepyrũva ojepyʼapy ñanderetaitereígui. Upévagui ikatu nomombaʼéi pe predikasión jajapóva, ha oĩ umi nohenduséiva. Mbaʼépa ikatu jajapo ani hag̃ua umícha oiko? Umi kongregasión oguerekóva heta lugár umichagua ojapo chuguikuéra território oñembaʼapo porãve hag̃ua (1Cor. 14:40). Avei, ojejapo hag̃uáicha opa mbaʼe hendápe porã, ñambaʼapovaʼerã ñane kongregasión territóriope añónte, ndojejapói mbaʼéramo arréglo oñepytyvõ hag̃ua ótra kongregasiónpe Comité de Servicio de Congregación rupive (Ehecha Nuestro Ministerio del Reino, noviembre 1998, páhina 6, párrafo 18, 19).
3. Mbaʼéichapa ikatu jajapo ñañepyrũ porã hag̃ua ñañemongeta japredika jave pe hénte oĩha rupi?
3 Ñañepyrũ hag̃ua ñañemongeta. Jesús oñemongetárõ guare peteĩ kuñakarai ndive peteĩ ykua ypýpe, oñepyrũ hag̃ua oñeʼẽ mbykymínte, ha mbegue mbeguépe oñemongeta pukuve ohechakuaávo pe kuñakarai oikuaaseveha (Juan 4:7-26). Sapyʼánte ñande ikatu jajapo upeichaite avei. Oĩ puvlikadór ohecháva tekotevẽha omomaitei raẽ pe tapichápe, oñeʼẽʼimi raẽ umi mbaʼe ikatúvagui oipyʼapy chupe, ha upéi ae oñeʼẽ Ñandejára Rréinogui. Oñepyrũ raẽ oñeʼẽ umi mbaʼe oikoramóvagui, ha upéicha ndahasýi oñepyrũ hag̃ua oñemongeta. Ohendu porã pe tapicha oñeʼẽ jave. Upéi ikatúma ohechauka umi mbaʼe porã heʼíva Ñandejára Ñeʼẽ (Rom. 15:4).
4. Mbaʼéichapa ikatu ñaipytyvõ peteĩ oikuaasevévape?
4 Ñaipytyvõ pe oikuaasevévape. Ñañemongeta porãramo peteĩ tapicha ndive, ha jahecháramo oikuaaseveha, ñañehaʼãvaʼerã ñaipytyvõve chupe. Mbaʼéichapa ikatu jajapo upéva? Reñemongetapámarõ rehóvo, ikatu renohẽ nde livréta ha ere: “Avyʼaitépa ko ñañemongetahaguére. Ikatúnepa vaicha ndéve ñañemongeta jey?”. Térã ikatu ere: “Aipotaitépa releemi peteĩ artíkulo aikuaa porãva ndegustataha. Ikatúpa agueraha ndéve nde rógape térã rembaʼapohápe?”. Oĩ katu puvlikadór oporandúnteva: “Mbaʼe númeropepa ikatu rohenói?”. Pyʼỹinte upéva osẽ porã.
5. Mbaʼépa ñañehaʼãvaʼerã jajapo japredika jave pe hénte oĩha rupi?
5 Heta oĩ oipotavaʼekue peteĩ estúdio vívliko ojetopa rire hesekuéra pe hénte oĩha rupi. Pe estúdio ikatu ojejapo hógape, ombaʼapohápe, pe hénte oĩha rupi, térã teléfono rupive. Ñañehaʼãkena ñamoñepyrũ peteĩ estúdio vívliko japredika jave pe hénte oĩha rupi.