Jajapo estúdio oñakãrapuʼãva, óga rokẽme ha teléfono rupive
1. Maʼerãpa jajapo peteĩ estúdio vívliko?
1 Ajépa javyʼa ñamoñepyrũ jave peteĩ estúdio! Péro jatopáramo peteĩ tapicha ostudiaséva la Biblia, upépe oñepyrũramo ñane rembiapo. Jajapo peteĩ estúdio oiko hag̃ua pe tapichágui peteĩ kristiáno añeteguáva (Mat. 28:19, 20). Mbaʼépa ikatu ñanepytyvõ upévape?
2. Mbaʼeichaguápa peteĩ estúdio ojejapóva óga rokẽme ha teléfono rupive, ha mbaʼérepa iporã?
2 Tapichakuéra hembiapoitereíva. Heta tapicha hembiapoitereive koʼág̃a ymave guarégui. Oĩ umi oñepyrũva ostudia la Biblia péro ndoiporuséiva una óra upearã. Ñaipytyvõ hag̃ua umívape, ojeʼe ñandéve ikatuha ñamoñepyrũ peteĩ estudio pe óga rokẽme, térã teléfono rupive. Ñepyrũrã, umichagua estúdio ikatu jajapo mbykymínte, ñahesaʼỹijohápe umi téysto vívliko iñimportantevévante. Jaiporukuaa peteĩ térã mokõi párrafonte peteĩ puvlikasióngui. Ikatu jaiporu Mbaʼépa omboʼe la Biblia? Oĩma heta puvlikadór ojapóva estúdio óga rokẽme ha teléfono rupive, ha umívape jaguerohory!
3. Mbaʼérepa ñañehaʼãvaʼerã jastudia pukumie jahávo pe óga rokẽme?
3 Péro jasegisépa jajapo pe estúdio óga rokẽmente? Nahániri. Ñanderechakuaavaʼerã, ha ani ñandeareterei pe óga rokẽme ñañepyrũramóvo peteĩ estúdio. Upéicharõ jepe, Nuestro Ministerio del Reino mayo 1990, páhina 8-pe, heʼi: “Pe estúdio osegítaramo, ha pe óga jára oikuaasevéramo, ikatu ñambopukuve”. Upéva iñimportánte. Peteĩ mitã iñembyahýi are vaʼekue, ñamongaru raẽ mante michĩ mimi ikatu peve okaru porã jey. Péro naimbaretemoʼãi ha ndokakuaaporãmoʼãi jasegínteramo ñamongaru michĩ mimi. Upéicha avei, peteĩ tapicha ostudiavaʼerã hekópe porã oikótaramo chugui Ñandejára siérvo ikatupyrýva (Heb. 5:13, 14).
4. Mbaʼérepa iporãve ojestudiáramo ogapýpe?
4 Estúdio ojejapóva ogapýpe. Ikatúramo jajaposeve pe estúdio peteĩ ogapýpe térã ikatuhápe ojestudia porã. Upéicha pe ostudiáva oaprende porãvéta ha ikatúta ontendeve Ñandejára Ñeʼẽ (Mat. 13:23). Pe omboʼéva ikatúta avei oiporu porãve pe informasión oipytyvõ hag̃ua pe óga járape. Ha pe estúdio ipukuvéramo ikatu oñehesaʼỹijo porãve Ñandejára Ñeʼẽ, ikatu hag̃uáicha pe óga jára imbareteve ijeroviápe (Rom. 10:17).
5. Mbaʼéichapa ikatu ñambohasa ogapýpe peteĩ estúdio ojejapóva óga rokẽme?
5 Mbaʼéichapa ikatu ñambohasa ogapýpe peteĩ estúdio ojejapóva óga rokẽme? Rejapo rire umi estúdio mbyky mimi, ikatu vovéntema remokyreʼỹkuaa pe óga járape pestudia pukuve hag̃ua. Reporandukuaa chupe: “Ikatúpa jaguapy ñahesaʼỹijo porãve hag̃ua ko mbaʼe iñimportánteva?”, térã “Netiempomiépa jahecha porãve hag̃ua ko téma koʼág̃a?” Pe óga jára ndaikatúiramo, resegintevaʼerã pe estúdio mbykymi pe óga rokẽme. Opyta porã vove, eñehaʼã jey rembohasa hag̃ua pe estúdio ogapýpe.
6. Maʼerãpa japredikavaʼerã, ha mbaʼéichapa pe informasión osẽva koʼápe ikatu ñanepytyvõ?
6 Jaheka aja umi omeresévape, ani ñanderesarái maʼerãpa jajapo peteĩ estúdio vívliko. Ñaipytyvõse umi tapicha ipyʼaporãvape oservi hag̃ua Jehovápe. Jajerure Jehovápe ovendesi hag̃ua pe predikasión jajapóva upearã (2 Tim. 4:5).