Mbaʼéichapa Jehová ñanembokatupyry?

1. Mbaʼérepa Jehová ohekomboʼe isiervokuérape?

¹ Jehová ningo pe ‘Mboʼehára Ijojahaʼỹva’, ha chupe g̃uarã iñimportanteterei ombokatupyry isiervokuérape (Isa. 30:20). Ojapórõ guare Jesúspe, Jehová oñepyrũma oporohekomboʼe (Juan 8:28). Ha Adán naiñeʼẽrendúiramo jepe, Haʼe osegi ohekomboʼe mborayhúpe yvyporakuéra imperféktope (Isa. 48:17, 18; 2 Tim. 3:14, 15).

2. Mbaʼe tembiapo ijojahaʼỹvapa ojejapo koʼág̃a rupi?

² Koʼág̃a rupi Jehová omoakã peteĩ tembiapo ijojahaʼỹva, neʼĩrava gueteri ojejapo upéicha ko yvy tuichakuére. Proféta Isaías heʼivaʼekue voi hetaiterei hénte ha oparupigua ohotaha pe ‘montáña Jehová róga oĩháme’ (Isa. 2:2). Maʼerãpa? Jehová ohekomboʼe hag̃ua chupekuéra ha péicha oguata hag̃ua hikuái tape porãre (Isa. 2:3). Áño de servísio 2010-pe testigos de Jehová opredika ha oporomboʼe 1.600 millones de óra. Avei káda semána ko múndo tuichakuére oñembokatupyry chupekuéra ciento cinco mil kongregasiónpe, ha pe tembiguái jeroviaha ha iñarandúva oguenohẽ quinientos idióma rasápe umi puvlikasión.

3. Mbaʼéichapa ndéve nepytyvõ umi mbaʼe Jehová omboʼéva?

³ Ñañehekomboʼe porã. Hetaitéma ningo ñanepytyvõ umi mbaʼe Jehová ñanemboʼéva! Upéicha rupi jaikuaa mbaʼéichapa héra Ñandejára ha ojepyʼapyha ñanderehe (Sal. 83:18; 1 Ped. 5:6, 7). Avei ombohovái ñandéve koʼã porandu iñimportantetéva: Mbaʼérepa jahasa asy ha ñamano? Mbaʼépa jajapovaʼerã javyʼa hag̃ua? Ha maʼerãpa jaikove? Péro ndahaʼéi upéva añónte, Jehová ñanerekomboʼe avei ñanderekoporã hag̃ua ha upéicha jahupyty hetave mbaʼe porã (Jos. 1:8).

4. Mbaʼe mbaʼépa Jehová oiporu ñanerekomboʼe hag̃ua, ha mbaʼérepa tekotevẽ jaaprovechapaite umíva?

⁴ Jehová ohekomboʼeve avei umi isiérvo oñakãrapuʼãsévape iservísiope. Páhina 4 guive 6 peve oĩ peteĩ lísta ohechaukáva umi eskuéla Jehová oiporúva oporombokatupyry hag̃ua. Péro oiméramo ndaikatúi reike peteĩ eskuéla ndegustávape, reñehaʼãmbaitevaʼerã reñembokatupyry umi ikatúvape reike. Ha mbaʼépa ikatu ojapo umi mitãrusu? Chupekuéra ningo imboʼehára ha ambue hapicha pyʼỹi omboliga oho hag̃ua universidápe. Upévare ñande ñamokyreʼỹvaʼerã koʼã mitãrusúpe oheja hag̃ua Jehová ombokatupyry chupekuéra ha péicha oñakãrapuʼãve iservísiope. Jaaprovecháramo umi mbaʼe oiporúva ñanembokatupyry hag̃ua javyʼáta koʼág̃ama voi ha amo gotyove pe múndo pyahúpe (Sal. 119:105; Juan 17:3).

Umi mbaʼe Jehová oiporúva oporombokatupyry hag̃ua

Kúrso ojelee ha ojeskrivikuaa hag̃ua

• Maʼerãpa ojejapo: Ojelee ha ojeskrivikuaa hag̃ua, upéicha umi ohóva upépe ikatúta ostudia la Biblia ha omboʼe hapichakuérape.

• Mboy tiémporepa: Oñekotevẽháicha.

• Moõpa ojejapo: Salón del Réinope.

• Mávapa ikatu oike: Oimeraẽ maranduhára térã umi oikuaasevéva mbaʼépa omboʼe la Biblia.

• Mbaʼéichapa ikatu ojeike: Ansianokuéra ohechavaʼerã tekotevẽpa ojejapo upe kongregasiónpe, ha oinvita opavave ohosévape.

Eskuéla Jaiporukuaa Hag̃ua la Biblia

• Maʼerãpa ojejapo: Oñembokatupyry hag̃ua umi maranduhárape opredika porãve ha omboʼe hag̃ua hekoitépe hapichakuérape.

• Mboy tiémporepa: Akóinte ojejapo.

• Moõpa ojejapo: Salón del Réinope.

• Mávapa ikatu oike: Opavave maranduhára. Avei oñeinvita umi oho memévape rreunionhápe, omombaʼe ha oikóva la Biblia heʼiháicha.

• Mbaʼéichapa ikatu ojeike: Eñeʼẽvaʼerã pe omoakãvandi Eskuéla Jaiporukuaa Hag̃ua la Biblia.

Kúrso oñeñeʼẽ hag̃ua ambue idiómape

• Maʼerãpa ojejapo: Oñembokatupyry hag̃ua umi maranduhárape ikatu hag̃uáicha opredika ambue idiómape.

• Mboy tiémporepa: Cuatro térã cinco mése. Ojejapo jepi sábado pyharevekue ha ipuku una térã dos óra.

• Moõpa ojejapo: Salón del Reino hiʼag̃uivévape.

• Mávapa ikatu oike: Umi maranduhára ijerovia mbaretéva ha opredikaséva ambue idiómape.

• Mbaʼéichapa ikatu ojeike: Sukursál ohechavaʼerã mbaʼéichapa ojejapóta oñekotevẽramo.

Salón del Reino Ñemopuʼã

• Maʼerãpa ojejapo: Oñemopuʼã térã oñemyatyrõ hag̃ua Salón del Reino. Ndahaʼéiramo jepe peteĩ kúrso, oñehekomboʼe umi ermánope ojapokuaa hag̃ua heta mbaʼe ikatu hag̃uáicha ombaʼapo upépe.

• Mboy tiémporepa: Odepende mboy tiémpopa ikatu opyta pe ermáno oñekuaveʼẽva.

• Moõpa ojejapo: Umi lugár oñatendehápe pe Comite Regional de Construcción. Avei oiko jave yvyryrýi, ama guasu térã ambue mbaʼe vai oñeinvita umi ermáno oñekuaveʼẽvape oho hag̃ua oipytyvõ upe oikohápe sarambi.

• Mávapa ikatu oike: Umi ojevautisámava ha heʼíva hese ansianokuéra ikatuha ojapo porã upe tembiapo. Ikatu kuimbaʼe térã kuña, ha natekotevẽi katuete ojapómava voi ko tembiapo.

• Mbaʼéichapa ikatu ojeike: Ejerurevaʼerã umi ansiánope Cuestionario para trabajadores voluntarios en Salones del Reino (S-82) ha emyenyhẽ.

Eskuéla Prekursorkuérape g̃uarã

• Maʼerãpa ojejapo: Oñehekomboʼe hag̃ua prekursorkuérape ikatu hag̃uáicha ‘ojapo porã hembiapo’ (2 Tim. 4:5).

• Mboy tiémporepa: Dos semána.

• Moõpa ojejapo: Sukursál oiporavo ha ojejapo jepi peteĩ Salón del Reino hiʼag̃uivévape.

• Mávapa ikatu oike: Umi ojapómava un áño iprekursorádo rregulár.

• Mbaʼéichapa ikatu ojeike: Superintendénte de sirkuíto ohecha mávapa ikatu oike ha haʼéntema oporoanota.

Eskuéla umi Vetelíta Pyahúpe g̃uarã

• Maʼerãpa ojejapo: Oñepytyvõ hag̃ua umi vetelíta pyahúpe ikatu hag̃uáicha ojapo porã hembiapo.

• Mboy tiémporepa: Una óra káda semána, dieciséis semána aja.

• Moõpa ojejapo: Betélpe.

• Mávapa ikatu oike: Umi vetelíta ha voluntário ombaʼapómava un áño térã hetave.

• Mbaʼéichapa ikatu ojeike: Sukursálpe ojehecha mávapa oikevaʼerã ha haʼekuérantema oporoanota.

Escuela del Ministerio del Reino

• Maʼerãpa ojejapo: Oñembokatupyry hag̃ua umi ansiáno ha siérvo ministeriálpe ikatu hag̃uáicha ojapo porã hembiapokuéra omoakã ha oñangarekóvo kongregasiónre (Hech. 20:28). Ko eskuéla ojejapo sapyʼapyʼa, Cuerpo Gobernante ohecha vove oñekotevẽha.

• Mboy tiémporepa: Koʼág̃a rupi ojejapo un día imédio ansianokuérape g̃uarã, ha un día umi siérvo ministeriálpe g̃uarã.

• Moõpa ojejapo: Salón del Reino hiʼag̃uivévape térã umi lugár ojejapohápe Aty Guasu.

• Mávapa ikatu oike: Umi ansiáno ha siérvo ministeriál.

• Mbaʼéichapa ikatu ojeike: Superintendénte de sirkuíto oporoinvita.

Eskuéla Ansianokuérape g̃uarãa

• Maʼerãpa ojejapo: Oñepytyvõ hag̃ua umi ansiánope ikatu hag̃uáicha ojapo porã hembiapo Jehová servísiope.

• Mboy tiémporepa: Cinco día.

• Moõpa ojejapo: Sukursál oiporavo ha ojejapo jepi peteĩ Salón del Reino hiʼag̃uivévape térã umi lugár ojejapohápe Aty Guasu.

• Mávapa ikatu oike: Umi ansiáno.

• Mbaʼéichapa ikatu ojeike: Sukursál oporoinvita.

Eskuéla umi Superintendénte ha Hembirekópe g̃uarãb

• Maʼerãpa ojejapo: Oñepytyvõ hag̃ua umi superintendénte de sirkuíto ha distrítope ikatu hag̃uáicha oñatende ha oñangareko porãve umi kongregasiónre, avei ‘oñeʼẽ ha oporomboʼekuaave hag̃ua’ (1 Tim. 5:17; 1 Ped. 5:2, 3).

• Mboy tiémporepa: Dos mése.

• Moõpa ojejapo: Sukursál oiporavohápe.

• Mávapa ikatu oike: Superintendénte de sirkuíto ha distríto.

• Mbaʼéichapa ikatu ojeike: Sukursál oinvita umi superintendénte ha hembirekópe.

Eskuéla Vívlika umi Kuimbaʼe Soltérope g̃uarãc

• Maʼerãpa ojejapo: Oñembokatupyry hag̃ua umi ansiáno ha siérvo ministeriál soltérope ikatu hag̃uáicha ombaʼapove Jehová servísiope. Osẽvo ko eskuélagui oñemondo chupekuéra umi território oñekotevẽvehápe hetãme térã oipytyvõ hag̃ua ambue tetãme oñekuaveʼẽramo upearã.

• Mboy tiémporepa: Dos mése.

• Moõpa ojejapo: Sukursál oiporavo ha ojejapo jepi peteĩ Salón del Reino hiʼag̃uivévape térã umi lugár ojejapohápe Aty Guasu.

• Mávapa ikatu oike: Umi kuimbaʼe soltéro orekómava 23 áño ha ndohasáiva gueteri 62 áño, hesãiva, oipytyvõséva ermanokuérape ha oserviséva mamo oñekotevẽvehápe maranduhára (Mar. 10:29, 30). Avei ojapomavaʼerã dos áño kontinuadoite oservi hague ansiáno térã siérvo ministeriálramo.

• Mbaʼéichapa ikatu ojeike: Sapyʼánte aty guasu dos diaguápe ojejapo peteĩ rreunión ojeʼehápe mbaʼéichapa ikatu ojeike.

Eskuéla Vívlika umi Omendávape g̃uarãd

• Maʼerãpa ojejapo: Oñembokatupyry hag̃ua umi omendávape ikatu hag̃uáicha ombaʼapove Jehová servísiope. Osẽvo ko eskuélagui oñemondo chupekuéra umi território oñekotevẽvehápe hetãme térã oipytyvõ hag̃ua ambue tetãme oñekuaveʼẽramo upearã.

• Mboy tiémporepa: Dos mése.

• Moõpa ojejapo: Ñepyrũrã ojejapo Centro Educativo de la Watchtówerpe, oĩva Patterson, Nueva Yórkpe. Amo gotyove ojejapóta ko eskuéla sukursál heʼihápe, ha oiméne ojeporavóta umi Salón del Reino térã umi lugár ojejapohápe Aty Guasu.

• Mávapa ikatu oike: Umi omendáva ha orekóva 25 áño ha ndohasáiva gueteri 50 áño, hesãiva, ojapómava dos áño kontinuadoite oservi hague de tiémpo kompléto ha ohechaukáva ojaposeha Isaías heʼi haguéicha: “Ápe aime, chejokuái chéve” (Isa. 6:8). Avei ojapomavaʼerã dos áño omenda hague ha oĩvaʼerã oservi hag̃uáicha oñekotevẽvehápe.

• Mbaʼéichapa ikatu ojeike: Sapyʼánte aty guasu un diaguápe ojejapo peteĩ rreunión ojeʼehápe mbaʼéichapa ikatu ojeike.

Escuela Bíblica de Galaad de la Watchtower

• Maʼerãpa ojejapo: Oñembokatupyry hag̃ua umi prekursór ha ambue oservívape de tiémpo kompléto ikatu hag̃uáicha oiko chuguikuéra misionéro.

• Mboy tiémporepa: Cinco mése.

• Moõpa ojejapo: Centro Educativo de la Watchtower, oĩva Patterson, Nueva Yórkpe.

• Mávapa ikatu oike: Umi omendáva ha ojapómava dos áño kontinuadoite oservi hague de tiémpo kompléto, tres áño ojevautisa hague ha dos áño omenda hague, orekóva 21 áño ha ndohasáiva gueteri 38 áño. Oñeʼẽkuaavaʼerã ingléspe ha hesãivaʼerã. Ikatu avei oike ko eskuélape umi prekursór oservíva tetã ambuépe misioneroramoguáicha, umi superintendénte, vetelíta, umi ohovaʼekue Eskuéla Vívlika umi Kuimbaʼe Soltérope g̃uarã térã Escuela de Entrenamiento Ministeriálpe ha avei umi ohovaʼekue Eskuéla Vívlika umi Omendávape g̃uarã.

• Mbaʼéichapa ikatu ojeike: Sapyʼánte aty guasu tres diaguápe ojejapo peteĩ rreunión ojeʼehápe mbaʼéichapa ikatu ojeike. Péro ne retãme ndojejapóiramo upe rreunión ha rehose ko eskuélape, rehaivaʼerã sukursálpe reikuaa hag̃ua mbaʼépa ikatu rejapo.

Eskuéla umi Oĩvape g̃uarã Comité de Sucursálpe ha Hembirekópe g̃uarã

• Maʼerãpa ojejapo: Oñepytyvõ hag̃ua umi oĩvape Comité de Sucursálpe ikatu hag̃uáicha omoakã porãve umi tembiapo Betélpe ha oñatende hag̃ua kongregasionkuéra oikotevẽvare. Avei oñemoakã porãve hag̃ua umi sirkuíto ha distríto, traduksión, impresión, puvlikasionkuéra ñemondo ha ambue departaménto (Luc. 12:48b).

• Mboy tiémporepa: Dos mése.

• Moõpa ojejapo: Centro Educativo de la Watchtower, oĩva Patterson, Nueva Yórkpe.

• Mávapa ikatu oike: Umi oĩva Comité de Sucursal térã Comité de Paíspe, ỹrõ umi oñeasignáva oservi hag̃ua upearã.

• Mbaʼéichapa ikatu ojeike: Cuerpo Gobernante oinvitavaʼerã umi ermáno ha hembirekópe.

[Nóta]