Jarregákena pe semílla okakuaa hag̃ua
1. Mbaʼérepa jarregavaʼerã pe semílla ñañotỹvaʼekue ñande rapicha korasõme?
1 Ñañepyrũvo ñañemongeta ñande rapichándi Ñandejára Ñeʼẽre, haʼete ñañotỹva ikorasõme peteĩ semílla, ha jaikuaaháicha jarregamantevaʼerã upe semílla heñói hag̃ua (1 Cor. 3:6). Upévare tekotevẽ jajapo rrevisíta jarrega hag̃ua pe semílla jaiporúvo pe y oúva Ñandejára Ñeʼẽgui. Péicha jajapóramo oñembohapo, okakuaa ha hiʼa porãvéta.
2. Mbaʼépa ikatu jajapo jaha jey hag̃ua ñañemongeta pe ogajárandi?
2 Embaʼeporandu rembohovái hag̃uáicha upe rire. Rejeprepara vove predikasionrã repensamavaʼerã mbaʼépa reporandúta umi héntepe rembohovái hag̃ua chupekuéra ótro rehóvape. Iporãta rembaʼeporandúramo reñemongetapa mboyvemi pe ogajárandi, ha ere chupe arakaʼépa ikatúta reho jey hendápe. Heta ermáno oiporu umi porandu oĩva lívro Mbaʼépa omboʼe la Biblia?-pe, ikatu hag̃uáicha omoñepyrũma upe rire peteĩ estúdio vívliko.
3. Mbaʼe mbaʼépa reanotavaʼerã oĩramo peteĩ nerendu porãva?
3 Eanotákena. Reñemongetapa rire pe ogajárandi pyaʼe porã reanotavaʼerã héra, moõpa oiko, fécha, óra, mbaʼe rehépa peñeʼẽ ha mbaʼe puvlikasiónpa reheja chupe, oiméramo rehejáraʼe. Iporãta avei reanotáramo mbaʼe rrelihionguápa, ifamíliapa ha oĩpa peteĩ mbaʼe oipyʼapýva chupe térã oikuaasevéva. Koʼã mbaʼe nepytyvõta rejeprepara porãve hag̃ua reho jey vove hendápe. Aníke nderesarái reanota hag̃ua arakaʼépa ere chupe reho jeytaha hendápe ha mbaʼe porandúpa rembohovaivaʼerã chupe.
4. Mbaʼérepa nañanekaneʼõivaʼerã ñaipytyvõséramo umi hénte ohendu porã vaʼekuépe?
4 Aníke nekaneʼõ. Satanás ningo oñehaʼãmbaitéta ‘oipeʼa pe ñeʼẽ umi hénte pyʼapýgui’ (Mar. 4:14, 15). Upévare, nderetopavéiramo pe ogajárare ani nekaneʼõ. Ikatu reheja chupe peteĩ notaʼi térã remondo chupe kárta. Péicha ojapo peteĩ prekursóra, haʼe ostudia ñepyrũ vaʼekue peteĩ kuñakaraíndi hóga renondépe, péro upe rire ndotopavéi hese, upémarõ omondo chupe peteĩ kárta. Upéi otopa jeývo hese pe kuñakarai heʼi chupe omombaʼetereiha imbaʼeporã haguére hendive. Jarregárõ pe marandu porã ñañotỹvaʼekue ñande rapichakuéra korasõme javyʼaitereíta jahechávo heñói, okakuaa ha upéi ‘hiʼaha 30, 60 ha ambue katu 100 voi’ (Mar. 4:20).