“¡Ndajuhuvéi ningo hese hógape!”

Oiméne jaʼémava péicha ndajatopavéirõ guare peteĩ ñanerendu porã vaʼekuére predikasiónpe. Sapyʼánte jaha jey jeýramo jepe, núnka ndajatopái hese ha ndaikatuvéi jarrega pe semílla ñañotỹ vaʼekue (1 Cor. 3:6). ¿Mbaʼépa ikatu jajapo péicha jave? Oĩ puvlikadór ohaíva jepi peteĩ kárta térã peteĩ notaʼi ha oheja chupe hokẽ guýpe. Ótro katu ojerure voi pe ogajárape inúmero de teléfono ndotopavéi mbaʼérõ g̃uarã hese. Upearã heʼi: “¿Ikatúpa aanotami ne número añekomunika hag̃ua nendive?”. Ikatu ñakonta peteĩ rrevisíta káda japredika peteĩ persónape, tahaʼe teléfono, kárta, korréo elektróniko, mensáhe térã peteĩ notaʼi rupive. Péicha jajapóramo, ñaipytyvõ hína upe persónape oaprendeseve hag̃ua la Bíbliagui, ndopytaguasúiramo jepe hógape.