Umi mbaʼe jaikuaaséva

◼ Mávapepa jahejavaʼerã umi puvlikasión?

Opavave ohendu porãvape. Jahechakuaáramo upe japredikávape ogustaha pe marandu jagueraháva, iporãta jahejáramo chupe umi rrevísta, peteĩ folléto, peteĩ lívro térã ambue puvlikasión, omeʼẽ saʼíramo jepe pe kontrivusión térã nomeʼẽiramo voi (Job 34:19; Rev. 22:17). Péro nañameʼẽivaʼerã ñane puvlikasión porãite umi nomombaʼéivape (Mat. 7:6).

Ha mbaʼéichapa ikatu jaikuaa ogustápa pe marandu upe japredikávape? Jahechavaʼerã oñatendepahína ñanderehe ha oñemongetasépa. Ombohováipa ñaporandu jave chupe peteĩ mbaʼe? Heʼípa ñandéve mbaʼépa opensa? Oñatendépa ñanderehe jalee jave la Biblia ha jahechaukávo chupe? Oiméramo upéicha, ohechauka omombaʼeha Ñandejára Ñeʼẽ. Sapyʼánte iporãvéta ñaporandúramo voi chupe oleétapa térã nahániri pe puvlikasión jahejaséva chupe. Ñañatende porã vaʼerã japilla hag̃ua añetehápepa ogusta pe marandu upe japredikávape. Upévare, japredika jave kállere, nañameʼẽivaʼerã opa ohasávape ñande ykére peteĩ puvlikasión. Ndajaikuaaporãiramo ogustápa upe ñanerendúvape pe marandu, ikuentavéta ñameʼẽnterõ chupe peteĩ tratádo.

Jaikuaa hag̃ua mboy puvlikasiónpa jagueraháta Salón del Rréinogui nodependéi mboy kontrivusiónpa ñameʼẽta hese, síno mboýpa ñaikotevẽta predikasiónpe. Umi kontrivusión ningo noñemeʼẽi umi puvlikasiónre, síno ojepaga hag̃ua opa mbaʼe oñekotevẽva oho porã hag̃ua hese ñane rembiapo. Jaagradeséramo koʼã mbaʼére ñandepojeráta ha ñameʼẽta ñande pyʼaite guive ñane kontrivusión, ivaíramo jepe ñane situasión (Mar. 12:41-44; 2 Cor. 9:7). Ha ani hag̃ua ñahundi rei pe pláta oñemeʼẽva, tekotevẽ jajagarra umi puvlikasión ñaikotevẽvante predikasionrã.

[Komentário oĩva páhina 2-pe]

Ñañatende porã vaʼerã japilla hag̃ua añetehápepa ogusta pe marandu upe japredikávape