Ñaipytyvõkena ñande rapichakuérape ohendu hag̃ua Ñandejárape
1. ¿Mbaʼéichapa héra umi folléto oñepresentavaʼekue pe Aty Guasu Tres Diaguápe hérava “Tou ne rréino”, ha mbaʼérepa ndahasýi ojetradusi hag̃ua?
1 Pe Aty Guasu Tres Diaguápe hérava “Tou ne rréino”, oñepresentavaʼekue mokõi folléto pyahu hérava: Ehendúkena Ñandejárape ha reikovéta opa árare ha Ehendúkena Ñandejárape. Koʼã folléto ndahasyiete ojetradusi hag̃ua saʼieterei ojehai rupi pype. Upévare, oñepresentárõ guare pe aty guasúpe, Cuerpo Gobernante omeʼẽma kuri permíso ojetradusi hag̃ua 431 idiómape.
2. ¿Mávapepa ideprovéchota koʼã folléto?
2 ¿Mávapepa ikatu ideprovécho koʼã folléto? Jahechamína mbaʼe situasiónpa oñepresenta jepi ñane ermanokuérape oparupiete ko múndope:
• Peteĩ maranduhára opredika térã ovisita jeývo peteĩ tapichápe ohechakuaa hese ndoleekuaaiha térã apenaite oleeha.
• Peteĩ maranduhára opredika peteĩ território oñeñeʼẽhápe ótro idióma, péro ndaipóri puvlikasión upe idiómape térã saʼieterei oĩ. Sapyʼánte oĩ avei tapicha ndoleekuaáiva iñidiómape.
• Peteĩ maranduhára opredika lenguáhe de séñaspe umi tapicha nohendúivape.
• Peteĩ túva omboʼese Ñandejára Ñeʼẽ itaʼyraʼi ndoleekuaáivape.
3. ¿Mbaʼe mbaʼépa oreko pe folléto Ehendúkena Ñandejárape?
3 Mbaʼe mbaʼépa oreko koʼã folléto. Pe folléto Ehendúkena Ñandejárape ningo oreko heta taʼanga ha saʼi ojehai pype. Káda páhina guyetépe oreko peteĩ térã hetave téysto, ha ojehai mbykymi oñemyesãka hag̃ua umi mbaʼe iñimportantevéva káda leksióngui. ¿Mbaʼérepa ojejapo upéicha? Ñambohovái hag̃ua ñapensami ko situasiónre. Ñamoĩ chupe oñemeʼẽha ndéve peteĩ folléto ojehaíva ótro idióma nde ndereikuaáivape, ¿ideprovéchotapa ndéve orekóramo jepe heta taʼanga iporãva? Katuete nanepytyvõmoʼãi. Upéicha avei, umi puvlikasión ojehaíva pype heta mbaʼe ndaideprovechomoʼãi umi ndoleekuaáivape. Upévare ko follétope oñemoĩ heta taʼanga iporãitereíva oipytyvõtava umi ndoleekuaáivape. Ha ñahesaʼỹijo porãve hag̃ua káda leksión, umi taʼanga oreko peteĩ señalʼi, ohechaukáva mbaʼe taʼangápepa jahasavaʼerã jahechapa rire peteĩ.
4. Emombeʼu mbaʼe mbaʼépa oreko pe folléto Ehendúkena Ñandejárape ha reikovéta opa árare.
4 Pe folléto Ehendúkena Ñandejárape ha reikovéta opa árare orekopaite avei umi taʼanga oĩva pe ótro follétope. Ko puvlikasión ojejapo oñepytyvõ hag̃ua umi ndoleekuaáivape térã umi oñehaʼãvape oleekuaa. Ha oimérõ jaiporuhína pe folléto Ehendúkena Ñandejárape jajapo hag̃ua estúdio vívliko, jaiporukuaa avei pe folléto Ehendúkena Ñandejárape ha reikovéta opa árare orekovégui informasión ikatúva ñanepytyvõ. Káda leksión ojagarra dos páhina, ha oñepyrũvo oĩ peteĩ porandu oñembohováiva umi páhinape. Umi taʼanga oreko téysto vívliko ha oñemyesakã mbykymi. Avei haimete káda páhinape oĩ peteĩ rrekuádro orekovéva informasión, ha téysto vívliko ikatúva ñahesaʼỹijo ñane estudiántendi jahechakuaáramo tekotevẽha.
5. ¿Mbaʼéicha javépa ikatu ñaikuaveʼẽ koʼã folléto, ha mbaʼéichapa jajapokuaa upéva?
5 Mbaʼéichapa jaiporukuaa koʼã folléto. Opyta porãma guive jaiporukuaa japredika jave ogahárupi, noñekuaveʼẽiramo jepe koʼã folléto upe méspe (ehecha pe rrekuádro “Mbaʼéichapa ikatu ñaikuaveʼẽ”). Javisita jeývo umi ohendu porã vaʼekuépe ikatu jaʼe chupe jarekoha peteĩ puvlikasión imbaʼerã, ha ñameʼẽ chupe pe folléto.
6. ¿Mbaʼéichapa ikatu jaiporu koʼã folléto jajapo hag̃ua estúdio vívliko?
6 Pe folléto Ehendúkena Ñandejárape ndorekói porandu. Upéicha rupi, ndapestudiamoʼãi ojejapoháicha jepi ojeporu jave pe lívro Mbaʼépa omboʼe la Biblia? Hetápe ogusta umi istória, upévare eaprovechákena umi taʼanga remombeʼu hag̃ua ne estudiántepe umi istória oĩva la Bíbliape. Nekyreʼỹkena remyesakã jave mbaʼépa heʼise káda taʼanga, ha eporandu chupe mbaʼépa opensa umívare. Elee umi téysto oĩva pe páhina guyetépe ha pehesaʼỹijo oñondive. Eporandu mimi jepi chupe rehechakuaa hag̃ua ontendépa hína umi mbaʼe pehesaʼỹijóva. Ha oiméramo peiporu pe folléto Ehendúkena Ñandejárape ha reikovéta opa árare pestudia hag̃ua, elee ha ehesaʼỹijo hendive umi informasión ha téysto orekóva káda taʼanga.
7. ¿Mbaʼéichapa ikatu ñaipytyvõ ñane estudiántepe oñakãrapuʼã hag̃ua?
7 Ñaipytyvõkena umi estudiántepe oñakãrapuʼã hag̃ua. Oĩ tapicha ostudia rupi la Biblia ohechakuaáva tekotevẽha oleekuaa oaprende hag̃ua hetave mbaʼe Jehovágui (Mat. 5:3; Juan 17:3). Upévare, reiporúramo pe folléto Ehendúkena Ñandejárape rembostudia hag̃ua nde rapichápe, mbeguekatúpe ikatu reipytyvõ chupe oleekuaa hag̃ua. Upéi ikatúma reiporu pe folléto Ehendúkena Ñandejárape ha reikovéta opa árare rembostudia hag̃ua chupe. Péro ostudiapáramo jepe koʼã mokõi folléto, ndoikuaamoʼãi gueteri umi mbaʼe oñekotevẽva ojevautisa hag̃ua. Upearã tekotevẽ ostudia raẽ pe lívro Mbaʼépa omboʼe la Biblia? térã ambue puvlikasión oikuaave hag̃ua la Biblia omboʼéva.
8. ¿Mbaʼérepa javyʼavaʼerã jareko haguére koʼã mokõi folléto pyahu?
8 Umi oikoséva opa ára g̃uarã ojapovaʼerã pe Mburuvicha Guasu heʼíva (Isa. 55:3). Jehová ningo “oipota opavave ojesalva”, umíva apytépe umi ndoleekuaáiva (1 Tim. 2:3, 4). ¡Ajépa javyʼaite jaguereko haguére koʼã mokõi folléto pyahu, ñanepytyvõtava ñamboʼe hag̃ua ñande rapichakuérape Ñandejára Ñeʼẽ!
[Rrekuádro oĩva páhina 3-pe]
Mbaʼéichapa ikatu ñaikuaveʼẽ
Ehechauka pe ogajárape páhina 2 ha 3, upéi eporandu: “¿Reikosépa peichagua lugárpe? [Ehaʼarõ tombohovái.] La Biblia omombeʼu Ñandejára koʼẽrõitéma ojapotaha ko yvýgui peteĩ lugár iporãitereíva, upépe jaikóta pyʼaguapýpe ha avei ndaiporimoʼãvéima imboriahúva ni hasýva. Emañami mbaʼépa heʼi koʼápe jajapovaʼerãha jaiko hag̃ua ko lugár porãitépe. [Elee ojehaíva oñepyrũvo páhina 3-pe omyesakãva Isaías 55:3 heʼíva.] Koʼápe heʼi ñahenduvaʼerãha Ñandejárape. Péro, ¿mbaʼéichapa ikatu jajapo upéva?”. Rembohovái hag̃ua, ehechauka chupe páhina 4 ha 5 ha pehesaʼỹijo oñondive. Ha pe ogajára naitiémpoiramo, eheja chupe pe folléto, ha eporandu arakaʼépa ikatu reho jey pehesaʼỹijo hag̃ua pe informasión.