Aníkena nekangy nerembiapo hetáramo jepe
1. ¿Mbaʼérepa oĩ noñekomprometeséiva ojapo hag̃ua estúdio vívliko?
1 Oĩ noñekomprometeséiva ojapo hag̃ua estúdio vívliko hembiapo hetaiterei rupi. Jaikuaa ningo ñañatende porã hag̃ua ñane estudiántere ñaikotevẽha tiémpo, pór ehémplo tekotevẽ jajeprepara, ñambostudia ha ñaipytyvõ chupe ogueropuʼaka hag̃ua umi mbaʼe ijetuʼúva. Apóstol Pablo heʼivaʼekue oñemeʼẽmbaite hague omboʼe hag̃ua umi hénte oĩva Tesalónicape ojapo hag̃ua Ñandejára rembipota (1 Tes. 2:7, 8). ¿Mbaʼéichapa ikatu ñañemotiémpo jajapo hag̃ua estúdio vívliko?
2. ¿Mbaʼéichapa jaiporúta ñane tiémpo jahayhúramo Jehovápe?
2 Ñaikotevẽ tiémpo jaservi hag̃ua Jehovápe. Ñande jajapo heta mbaʼe ñamombaʼeguasu hag̃ua Jehovápe. Káda semána ñañemotiémpo ikatu hag̃uáicha jaha rreuniónpe, japredika, ñañemboʼe ha jalee hag̃ua la Biblia. Ñapensamína ko mbaʼére: peteĩ omendáva ohayhúgui iména térã hembirekópe vyʼapópe oñemotiémpo hembiayhúpe g̃uarã hembiapo hetáramo jepe. Ñande avei jahayhueterei Jehovápe, upévare vyʼapópe ñañemotiempovaʼerã ñamombaʼeguasu hag̃ua chupe (Efes. 5:15-17; 1 Juan 5:3). Jesús heʼivaʼekue voi jahechauka hag̃ua ñamombaʼeguasuha Jehovápe hekoitépe, ñaipytyvõvaʼerãha umi héntepe oiko hag̃ua chuguikuéra Ñandejára siérvo (Mat. 28:19, 20). Ñapensávo ko mbaʼére ñanepytyvõta jajapo hag̃ua ko tembiapo iñimportantetéva.
3. ¿Mbaʼéichapa ikatu jajapo estúdio vívliko jajúramo ñanderasykatu, ñandetraváho heta térã ñanerembiapoitereíramo kongregasiónpe?
3 Péro, ¿mbaʼéichapa ikatu jajapo ñande estúdio vívliko jajúramo ñanderasykatu, ñandetraváho heta térã ñanerembiapoitereíramo kongregasiónpe? Sapyʼánte umi hasýva ojerure iñestudiántepe ou hag̃ua hógape ikatu hag̃uáicha ostudia hendive. Oĩ avei maranduhára pyʼỹinte oviahavaʼerã, upévare ojapo hag̃ua ijestúdio oiporu teléfono térã komputadóra. Avei oĩ ermáno ojeruréva peteĩ maranduhára rresponsávlepe omboʼe hag̃ua iñestudiántepe haʼe ndaikatumoʼãi jave.
4. ¿Mbaʼe iporãvapa jahupytýta jajapóramo estúdio vívliko?
4 Apóstol Pablo ovyʼaiterei vaʼekue oiporúvo itiémpo ha imbaretekue oipytyvõ hag̃ua hapichakuérape ojapo hag̃ua Ñandejára rembipota (Hech. 20:35). Haʼe ohechakuaa ojapo porã hague hembiapo Tesalónicape, ha upéva omomýi chupe oagradese hag̃ua Jehovápe (1 Tes. 1:2). Ndajahejáiramo umi ñane rembiapo ñandejoko jajapo hag̃ua estúdio vívliko, katuete javyʼavéta jaservívo Jehovápe.