“Embyaty umi héntepe”
1. ¿Mbaʼépepa ojojogua pe aty guasu ojejapo vaʼekue yma ha umi ojejapóva koʼág̃a?
1 Umi isrraelíta osẽ riremi Egíptogui, Jehová heʼi Moiséspe ombyaty hag̃ua ipuévlope mónte Sinaípe. Haʼe heʼi: “Embyaty opavave isrraelítape, ahenduka hag̃ua chupekuéra Che Ñeʼẽ, iñeʼẽrendu hag̃ua Chéve ha ohekomboʼe hag̃ua itaʼyrakuérape” (Deut. 4:10-13). Oiméne upe aty guasu omokyreʼỹ ha omombarete rakaʼe umi isrraelíta jerovia. Upéicha avei koʼág̃a Ñandejára siervokuéra oñembyaty potaitéma hína umi asambléa de distríto ha internasionálpe Jehová ohekomboʼe hag̃ua chupekuéra. ¿Mbaʼépa ikatu jajapo jaaprovecha porã hag̃ua ko asambléa?
2. ¿Mbaʼépa tekotevẽ jajapo ñaime hag̃ua preparádo asamblearã?
2 Jajepreparáma vaʼerã. Ojejapótarõ guare pe aty guasu mónte Sinaípe Jehová omanda vaʼekue umi isrraelítape ojeprepara porã hag̃ua (Éx. 19:10, 11). Upéicha avei, enterove ohótava pe asambléa de distrítope ojeprepara vaʼerã, ha ndahaʼéi umi ipártetava añónte ojapo vaʼerã upéva. Por ehémplo heta oĩ ojerure vaʼerã permíso ipatrónpe. Upéicha jave ikatu hína ojecha Nehemías situasiónpe. Haʼe ningo ombaʼapo vaʼekue rréi Artajérjespe g̃uarã, ha peteĩ jey haʼe ojerurese permíso oho hag̃ua omyatyrõ umi murálla hoʼapa vaʼekue Jerusalénpe, péro ndoikuaái pe rréi omeʼẽtapa chupe permíso. Upémarõ Nehemías oñemboʼe, opensa porã upe heʼítavare ha pyʼaguasúpe oho oñeʼẽ pe rréindi. ¿Mbaʼépa oiko upérõ? Pe rréi omeʼẽ chupe permíso ha hiʼarive okonsegi chupe umi mbaʼe oikotevẽva omopuʼã jey hag̃ua umi murálla (Neh. 2:1-9). Jaikuaa ningo iñimportanteha jajerure permíso, ¿péro rehechámapa avei mbaʼéichapa rehóta ha moõpa repytáta? Umi ansiáno ikatu hína nepytyvõ rekonsegi hag̃ua koʼã mbaʼe. Eñehaʼãkena eg̃uahẽ oñepyrũ mboyve pe prográma ha ‘eñatende porã umi mbaʼe rehendútavare’ (Heb. 2:1).
3. ¿Mbaʼépa ñanepytyvõta japrepara hag̃ua ñane korasõ pe asamblearã?
3 Tekotevẽ avei japrepara porã ñane korasõ ikatu hag̃uáicha ñaaprende umi mbaʼe ñahendútava pe aty guasúpe (Esd. 7:10). Upearã ñande sítio jw.org-pe, oñemoĩta voimi pe prográma oĩhápe umi diskúrso réra ha peteĩ térã mokõi téxto omopyendáva umíva. Ikatu voi jaiporu jajapo hag̃ua pe Aty Jastudia Hag̃ua Ñande Rogayguándi, umi semána og̃uahẽ mboyve ñane asambléa. Heta maranduhára oimprimi pe prográma ha oiporu pe aty guasu aja oanota hag̃ua umi mbaʼe iñimportantevéva.
4. ¿Mbaʼéichapa ikatu tuvakuéra oaprovecha pe asambléa de distríto ohekomboʼe hag̃ua ifamíliape?
4 “Pemboʼe pene famíliape.” Pe aty guasu ojejapo vaʼekue mónte Sinaípe oipytyvõ avei umi isrraelítape ikatu hag̃uáicha ohekomboʼe ifamíliape Jehová Ñeʼẽ (Deut. 4:10). Upéicha avei pe asambléa de distríto oipytyvõ tuvakuérape ohekomboʼe hag̃ua ifamíliape. Upévare, pe prográma aja oguapy vaʼerã umi mitã ykére ha oipytyvõ chupekuéra oñatende porã hag̃ua. Avei káda día opa rire pe aty guasu oñemongetakuaa hikuái umi mbaʼe oaprende vaʼekuére térã ojapo vove pe estúdio de família.
5. ¿Mbaʼéichapa ñanepytyvõta pe asambléa de distríto oúva?
5 Pe aty guasu ojejapo vaʼekue mónte Sinaípe oipytyvõ umi isrraelítape omombaʼe hag̃ua ojeporavo haguére chupekuéra Jehová puévloramo (Deut. 4:7, 8). Pe asambléa de distríto ñanepytyvõta avei ñamombaʼe hag̃ua ñaime haguére Jehová organisasiónpe. Umi tres día aja ñañemomombyrýta Satanás múndo ñanembohasa asyetévagui, ha ñaiméta ñane ermanokuérandi pyʼaguapýpe ha upéva tuicha ñanemokyreʼỹta (Is. 35:7-9). Jehová ára guasu ningo hiʼag̃uimbaitéma hína, upévare aníkena jajavy ko oportunida porãite jarekóva ñañembyaty ha ñañomokyreʼỹ hag̃ua ñane ermanokuérandi (Heb. 10:24, 25).