Ñañatende porãkena ñaaprende hag̃ua
1. ¿Mbaʼérepa sapyʼánte ijetuʼu ñañatende porã hag̃ua umi aty guasu tres diaguápe?
1 Ndahetavéima ofalta oñepyrũ hag̃ua umi ñande aty guasu tres diagua 2013-pe. Heta oñembaʼapo ojeprepara hag̃ua umi informasión oipytyvõtava umi hénte oparupiguápe oñemoag̃ui hag̃ua Ñandejárare. ¿Repensámapa hína mbaʼépa ikatu rejapo ani hag̃ua refalta ni peteĩ día? Umi aty guasuhápe ningo oiko jepi heta mbaʼe ñande jerére, ha upéicha rupi sapyʼánte ijetuʼu ñañatende porã hag̃ua. Ko aty ipukuve rupi umi rreunión jaguerekóvagui kongregasiónpe, tekotevẽ ñañatende hetave tiémpo. Ikatu voi ñanekaneʼõ javiaha mombyry rupi térã ambue mbaʼére. ¿Mbaʼépa upéicharõ ikatu ñanepytyvõ ñañatende porã ha ñaaprende hag̃ua? (Deut. 31:12.)
2. ¿Mbaʼépa rejapo vaʼerã reprepara hag̃ua ne korasõ pe aty guasurã?
2 Aty guasu mboyve. Internétpe ñande sítio www.jw.org/gug, ikatu jajuhu umi diskúrso réra oñehesaʼỹijótava pe aty guasúpe ha peteĩ térã mokõi téxto omopyendáva umíva. Oiméramo reguereko Internet ikatu rehecha pype umi informasión nepytyvõtava reprepara hag̃ua ne korasõ pe aty guasurã (Esd. 7:10). Ikatu avei reaprovecha pe Aty Jastudia Hag̃ua Ñande Rogayguándi pejepyʼamongeta hag̃ua umi informasión oñehesaʼỹijótavare, upéva penepytyvõta pehenduséma hag̃ua umi diskúrso ojejapótava upépe.
3. ¿Mbaʼépa nepytyvõta reñatende porã hag̃ua pe aty guasu aja?
3 Aty guasu aja. Ikatúramo reho vaʼerã váñope oñepyrũ mboyve pe prográma. Ha rembogue vaʼerã nde selulár ani nemolesta oĩrõ nerenóiva térã rerresivi jave mensáhe, ha ani hag̃ua nde voi remondose mensáhe pe prográma aja. Péro oiméramo rerresivíta peteĩ llamáda iñimportánteva remoĩ vaʼerã oporomolestaʼỹ hag̃uáicha. Reiporútaramo peteĩ tavléta elektrónika, eñehaʼã vaʼerã reiporukuaa, ani upéva káusare umi oĩva nde jerére noñatendeporãi umi diskúrsore. Avei pe prográma aja ndovaléi rekaru, reʼu terere, kaʼay térã gaseósa (Ecl. 3:1). Emaña vaʼerã pe diskursántere ha reheka umi téxto nde Bíbliape. Ha iporãta avei reanota mimíramo umi mbaʼe nepytyvõtava.
4. ¿Mbaʼéichapa tuvakuéra ikatu oipytyvõ ifamíliape oñatende porã hag̃ua pe prográmare?
4 Jaipota avei umi mitã oñatende porã pe prográmare ha oaprende umi mbaʼe ojeʼéva upépe. Proverbios 29:15 heʼi: “Pe mitãme ojehejáramo ojapo ojaposéva, omotĩta katuete isýpe”. Upévare iporãvéta umi mitã oguapýramo ituvakuérandi, ikatu hag̃uáicha oipytyvõ chupekuéra oñatende porã hag̃ua pe prográmare, oiko rangue oñeʼẽ, omondo mensáhe térã oguata pe pasíllore. Umi mitãmíme jepe ikatu ñamboʼe ani hag̃ua oke ha okirirĩ hag̃ua nontendéiramo jepe opa mbaʼe ojeʼéva.
5. ¿Mbaʼérepa iñimportánte ñanemanduʼa jey umi mbaʼe ñahesaʼỹijo vaʼekuére, ha mbaʼéichapa ikatu jajapo upéva?
5 Opa rire pe prográma káda diagua. Epytuʼu porãkena ha ani tardeterei reke. Peñemotiémpo vaʼerã avei penemanduʼa jey hag̃ua pende rogayguakuérandi umi mbaʼe peaprende vaʼekuére upe díape, upéicha opyta arevéta peneakãme umíva. Oiméramo resẽta ne amigokuérandi, iporãta penemanduʼa jeýramo peteĩ térã mokõi mbaʼe pendegustave vaʼekuére, upearã ikatu peiporu umi mbaʼe peanota vaʼekue. Ha amo gotyove, ikatu pehecha jey mbaʼéichapa ikatu pejapo umi mbaʼe peaprende vaʼekue pejapo vove pe Aty Jastudia Hag̃ua Ñande Rogayguándi. Káda semána ikatu avei peñemotiémpo pehesaʼỹijo hag̃ua umi puvlikasión pyahu osẽ vaʼekue pe aty guasúpe.
6. ¿Mbaʼépa jajapo vaʼerã ideprovécho hag̃ua ñandéve ñande aty guasu?
6 Ñañeinvitáramo peteĩ karu guasuhápe ha jaha ñamokõmokõ umi tembiʼu, ndajapillamoʼãi hépa térã nahániri ha ndaideprovechomoʼãi ñandéve. Upéicha avei, ñande aty guasu tres diaguápe ojeprepara heta informasión iñimportánteva, ha nañañatendeporãiramo ndaideprovechomoʼãi ha ndaigustomoʼãi ñandéve. Upévare ñañehaʼãmbaitékena ñañatende porã pe prográmare ha jajapo umi mbaʼe ñaaprendéva.