Mbaʼéichapa japredika vaʼerã pe karríto reheve

Heta lugárpe, ojepredika hag̃ua ojepuru umi karríto ha mesa oñemoĩhápe puvlikasionkuéra, upéicha rupi oñepytyvõma heta persóna ipyʼaporãvape oikuaa hag̃ua Ñandejárape (Juan 6:44). Upévare oñemokyreʼỹ ansianokuérape oorganisa hag̃ua iterritóriope koichagua predikasión umi lugár ohasahárupi heta hénte. Umi mesa ha karríto ningo ojegueraha ha ojegueru jeýnte jepi, upévare heta hendápe natekotevẽi ojejerure katuete permíso oñemoĩ hag̃ua umíva. ¿Máva mávapa ikatu opartisipa koichagua predikasiónpe? Umi ermáno ha ermána iñakãguapýva, hory ha ikatupyrýva oñeʼẽ hag̃ua umi héntendi. Jahechamína mbaʼépa jajapo vaʼerã ha mbaʼépa ndovaléi jajapo japredika jave pe karríto reheve. Jasegíramo umi konsého ikatúta ñaipytyvõ porãve umi héntepe.

**Mbaʼépa jajapo vaʼerã:**

Ñanembaʼeporã ha ñanembaʼerechakuaa vaʼerã umi ohasávandi upérupi. Ñanderory ha jasaluda porã vaʼerã enterovépe. Oĩ jave opytáva omaña umi puvlikasiónre, ikatu jaʼe chupe: “Reipotáramo, ikatu regueraha la ndegustavéva”.
Jahecha vaʼerã iporãvétapa ñañemoĩ ag̃ui térã mombyrymínte pe karrítogui. Heta hendápe umi puvlikadór ohechakuaa iporãveha oñemoĩ ag̃uimínte ikarrítogui, péro upéva ndeʼiséi katuete oĩ porãvetaha jajapo péicha. Sapyʼánte opyta porãvéta ñañemoĩ mombyrymínte, ha jahechávo oĩha opytáva omaña umi puvlikasiónre, ikatu ñañemboja hendápe ha jaʼe chupe: “¿Ndépa reñeporandúmava pépe heʼíva?”.
Jaipuru vaʼerã la Biblia otoka porã jave.
Oĩramo oguerahaséva pe lívro ¿Mbaʼépa omboʼe la Biblia? térã ótra puvlikasión jaipurúva ñamboʼe hag̃ua umi héntepe, jaexplika vaʼerã chupe mbaʼéichapa jajapo upéva. Ikatu voi jahechauka chupe pe vidéo ¿Mbaʼérepa restudia vaʼerã la Biblia?
Oĩramo peteĩ ñanerendu porãva, ikatu jajerure chupe inúmero de teléfono ha ñaporandu chupe moõpa oiko. Ha pe persóna oikóramo ótro kongregasión territóriope, ñallena pe formulário Sírvase visitar (S-43) ha ensegída ñameʼẽ pe sekretário ñane kongregasionpeguápe.