Eñembokatupyryvékena: eipytyvõ ne estudiántepe opredikakuaa hag̃ua

Mbaʼérepa iñimportánte. Umi oñepyrũva omoirũ Jesúspe oaprende vaʼerã “ojapo hag̃ua opa mbaʼe” haʼe omanda vaʼekue, umíva apytépe, omboʼe vaʼerãha pe añetegua (Mat. 28:19, 20). Heta estudiánte ningo oñanotáma pe Eskuéla Jaipurukuaa Hag̃ua la Bíbliape ha ikatu voi oime opredika oikóvo ihentekuéra ha iñamigokuérape. Mbeguekatúpe, omombaʼevéta ohóvo umi mbaʼe oaprendéva. Ha upéi oikuaávo Jehová oipotaha enterovéva ohendu pe marandu porã, ikatu omombeʼu ñandéve osẽsemaha avei opredika, péicha oprogresavéta ohóvo (Rom. 10:13, 14). Ansianokuéra heʼi rire chupe ikatumaha osẽ opredika, oikotevẽta oñepytyvõ chupe ojeprepara porã hag̃ua, péicha ipyʼaguasuvéta opredika hag̃ua (Luc. 6:40).

Mbaʼéichapa ikatu rejapo:

Eipytyvõ ne estudiántepe orretira hag̃ua umi puvlikasión oikotevẽtava opredika ha ojapo hag̃ua estúdio. Ehechauka chupe mbaʼe mbaʼépa nde regueraha jepi predikasiónpe ha emombeʼu chupe maʼerãpa ojepuru umi puvlikasión regueraháva.
Peiporavo peteĩ presentasión osẽva jepi Ñane Marandu Porãme ha peñensaja upéva. Peipuru pe lívro Eñembokatupyrýke páhina 82 pejeprepara hag̃ua mbaʼéichapa pembohováita umi situasión oñepresentavéva territóriope. Eipytyvõ ne estudiántepe opredika hag̃ua oñeʼẽháicha jepi voi. Emomanduʼa chupe iñimportanteha oñemonde hekópe porã (2 Cor. 6:3, 4).
Emboʼe vaʼerã chupe hetave mbaʼe; por ehémplo ehechauka chupe peteĩ tarhéta de território ha ere chupe mbaʼe mbaʼépa oanota vaʼerã pe Registro de casa en cásape, oĩ jave ohendu porãva chupe predikasiónpe. Emokyreʼỹ chupe ojapo hag̃ua rrevisíta (1 Cor. 3:6). Ehechauka chupe mbaʼéichapa oipuru vaʼerã predikasiónpe pe folléto Notísia Porã opavave Tapichakuérape g̃uarã ha avei pe sítio jw.org.
Nepasiénsia vaʼerã hese ha eguerohory chupe oaprendeve haguére ohóvo (Prov. 25:11). Emboʼe chupe ne ehémplo rupive. Pe puvlikadór pyahu ndahesaraimoʼãi umi mbaʼe rejapóvagui reipytyvõ hag̃ua chupe ha avei mbaʼéichapa nekyreʼỹ predikasiónpe.

Taréa ko méspe g̃uarã:

Oimérõ ne estudiántegui oikóma puvlikadór, einvita chupe pesẽ hag̃ua predikasiónpe térã pejapo hag̃ua rrevisíta ha estúdio. Oimérõ koʼag̃aite ndereguerekói ni peteĩ estudiánte oprogresáva ohóvo, einvita peteĩ puvlikadór ndaikatupyryguasúivape osẽ hag̃ua nendive.