3 | Umi ehémplo oĩva la Bíbliape

MBAʼÉPA OHECHAUKA LA BIBLIA: Umi kuimbaʼe ha kuña ifiélva haʼe vaʼekue “yvypóra ñandeichaguánte avei” (SANTIAGO 5:17).

¿Mbaʼépa heʼise upéva?

Heta párte la Bíbliape oñemombeʼu oĩ hague kuimbaʼe ha kuña ohasáva heta situasión ijetuʼuetereíva. Jaleévo umi rreláto bíblico ikatu jatopa oĩ hague Ñandejára siérvo oñeñandúva ñandéicha avei.

¿Mbaʼéichapa ñanepytyvõ?

Igustoiterei ningo oĩramo ótro ontendéva mbaʼéichapa ñañeñandu, péro koʼýte upéva ñaikotevẽ jarekóramo algún provléma emosionál. Jaleévo la Biblia, ñañemeʼẽ enkuénta la ñande jahasáva ha ñañandúva ojoguaha umi mbaʼe ohasa vaʼekuépe Ñandejára siervokuéra. Ha jaikuaávo upéva, ñanepytyvõ ani hag̃ua ñañeñandu ñaneaño jajepyʼapyeterei jave ha ndajaikuaái jave ni mbaʼépa jajapóta.

La Bíbliape heta pártepe oñemombeʼu oĩ hague Ñandejára siérvo opensáva ndaikatumoʼãiha oaguanta ha ojedesesperáva. ¿Ñañandúpa sapyʼánte nañameʼẽveimaha? Péicha oñeñandu vaʼekue Moisés, Elías ha David (Números 11:14; 1 Reyes 19:4; Salmo 55:4).
La Biblia omombeʼu peteĩ kuñakarai hérava Ana “oñamargaite” hague pórke ndaikatúi vaʼekue imemby. Hiʼarive Peniná, haʼéva irrivál, oñembohory hese (1 Samuel 1:6, 10).
La Biblia oñeʼẽ avei peteĩ kuimbaʼe héravare Job. Haʼe ojerovia mbarete vaʼekue Ñandejárare, upéicharamo jepe osufri ha oñeñandu vaieterei vaʼekue. Peteĩ vuéltape heʼi: “Chekueráima che rekovégui, amanoséntema voi” (Job 7:16).

Koʼã Ñandejára siérvo ojepyʼapyeterei vaʼekue ha heta vése naiporãiete la opensa lája. Péro haʼekuéra noñentregái ha osẽ porã, koʼã rreláto ikatu ñanemombarete ani hag̃ua ipuʼaka ñanderehe umi pensamiénto vai.

La Biblia oipytyvõ Kévinpe

Mbaʼéichapa che mbaʼasy cheafekta

“Arekórõ guare 50 áñorupi osẽ chéve arekoha transtórno vipolár. Oĩ moménto chembarete ha apensáva ikatuha asolusiona oimehaichagua provléma, ha ótro moméntope katu apensa ‘ni maʼerã reípa aikoseve’”.

Mbaʼéichapa la Biblia chepytyvõ

“Ahechakuaa heta mbaʼépe ajoguaha apóstol Pédrope. Haʼe ojavy vaʼekue ha oiméne opensa ndovaleiha mbaʼeverã, péro ndopytái opensa upévarente. Haʼe oheka amígo ikalidáva oipytyvõ hag̃ua chupe. Che mbaʼasy cheataka jave ndaigustoieterei, upéicha jave ou chéve che akãme che defektokuéra ha apensa ndavaleiha mbaʼeverã. Péro asegi Pedro ehémplo ha añemoag̃ui che amigokuérare, haʼekuéra chepytyvõ ani hag̃ua añentrega.

Tuichaiterei chekonsola avei rréi David ehémplo. Haʼe ohasa vaʼekue heta situasión ijetuʼúva, pyʼỹinte oñedeprimi ha oñembyasy umi mbaʼe vai ojapo vaʼekuére. Añemeʼẽ enkuénta ajoguaha chupe, pórke che pyʼỹinte haʼe térã ajapo umi mbaʼe upéi ambyasýva. Chemokyreʼỹeterei la David heʼi vaʼekue Salmo 51:3-pe: ‘Che ningo aikuaa porã apeka hague, umi mbaʼe vai ajapo vaʼekue ndaikatúi aipeʼa che akãgui’. Peichaite che añeñandu jepi añedeprimi jave, upéicha jave ijetuʼueterei ahecha hag̃ua álgo iporãva chejehe. Péro apensa la heʼívare versíkulo 10: ‘Ñandejára, emeʼẽmína chéve peteĩ korasõ ipotĩva, ha peteĩ ménte ipyahúva chepytyvõtava siémpre ajapo hag̃ua iporãva’. Péicha lénto avei ajerure Ñandejárape anivéma hag̃ua apensa vai chejehe. Ipahápe la heʼíva , versíkulo 17 chemokyreʼỹeterei, upépe heʼi: ‘Nde reipota umi hénte oñembyasy ikorasõ mbytete guive. Nde neremboykemoʼãi koichagua sakrifísio’. Pe téxtope heʼíva chemomanduʼa Jehová cherayhuha.

Añehaʼã añekonsentra umi ehémplo bíblicore ha umi mbaʼe porã Ñandejára omeʼẽvare chéve. Koʼã mbaʼe chepytyvõ aime hag̃ua segúro Ñandejára okumplitaha umi mbaʼe porã oprometéva. Che ajeroviaiterei pe esperánsa omeʼẽvare la Biblia ha upéva chepytyvõ asegi hag̃ua adelánte”.