Japredika memékena japorohayhúgui

1. ¿Mbaʼépa ñaaprende raʼe pe rreunión anuál de 2023-pe?

¡AJÉPA iporãite kuri pe rreunión anuál áño 2023-pe guare!a Upépe ojeexplika porãve kuri unas kuánta enseñánsa bíblica ha ojejapo algúno anúnsio ñane predikasión rehegua. Por ehémplo jahecha Babilonia Guasu oñehundi rire ikatuha gueteri oĩ algúno orekóva oportunida oñemoĩ hag̃ua Jehová ládo. Avei ojeʼe kuri ñandéve noviembre de 2023 guive natekotevẽmoʼãiha ñainforma entéro mbaʼe jajapóva predikasiónpe. ¿Heʼisépa upéva la predikasión naiñimportanteveimaha yma guaréicha? ¡Ni mbaʼevéicharõ!

2. ¿Mbaʼérepa koʼág̃arupi tekotevẽvéntema japredika? (Marcos 13:10).

² Káda día ohasáva iñimportanteve ha tekotevẽvéntema japredika. ¿Mbaʼérepa? Pórke saʼipaitéma la tiémpo hembýva ñandéve. Ñañatendemína la Jesús heʼi vaʼekuére pe predikasiónre oñeʼẽvo umi ára paháre (elee Marcos 13:10). Avei pe lívro de Matéope oñemombeʼu Jesús heʼi hague umi notísia porã oñemombeʼu vaʼerãha oparupiete ko yvy ape ári og̃uahẽ mboyve “pe fin” (Mat. 24:14). Oñeñeʼẽvo pe fin rehe heʼise hína Satanás múndo iñañaitéva opataha pára siémpre. Jehová ningo omoĩma ‘pe óra ha pe día’ oikotahápe entéro umi mbaʼe haʼe oprofetisáva (Mat. 24:36; 25:13; Hech. 1:7). Ha káda día ohasáva ñañemoag̃uive hína upe féchare (Rom. 13:11). Péro ndoúi aja pe fin, jasegi vaʼerã japredika.

3. ¿Mbaʼérepa japredika?

³ Oĩ álgo tekotevẽtereíva enterove ñañeporandu: ¿Mbaʼérepa japredika ha ñamombeʼu umi notísia porã? Japorohayhúgui ningo jajapo upéva. Ñapensamíntena: Japredika jave jahechauka ñamombaʼetereiha umi notísia porã, jahayhuha umi héntepe ha iñimportanteveha jahayhuha Jehovápe ha héra porãite. Jahechamína koʼã mbaʼe uno por uno.

JAPREDIKA ÑAMOMBAʼETEREÍGUI UMI NOTÍSIA PORÃ

4. ¿Mbaʼéichapa ñañeñandu oñemombeʼu jave ñandéve notísia porã?

⁴ Epensamína mbaʼéichapa eñeñandu jepi oñemeʼẽ jave ndéve notísia iporãitereíva. Ikatu oime peteĩ ne hénte omombeʼu ndéve la iveveʼi onase porãiterei hague térã ojeofrese ndéve nde travahorã eikotevẽtéva kuri. ¿Mbaʼéichapa erreaksiona kuri upe moméntope? Oiméne evyʼaiterei ha ensegída voi emombeʼuséma ne hentekuéra ha ne amigokuérape. Oiméne peichaite avei reñeñandu raʼe rehendúrõ guare umi notísia iporãvéva oĩva ko múndope: Umíva hína umi notísia porã oñeʼẽva Ñandejára Rréinore.

5. ¿Mbaʼéichapa reñeñandu raʼe reaprendévo rehóvo la Biblia heʼíva? (Ehecha pe taʼanga).

⁵ Epensamína mbaʼeichaitépa oiméne evyʼa raʼe reikuaávo rehóvo la Biblia heʼíva. Por ehémplo reaprende nde Ru yvagapegua nderayhuha ha oipotaha reime ifamília oadorávape chupe. Avei reaprende Jehová oipeʼaitetaha umi mbaʼe ñanembohasa asýva ha ñanembosufríva, ha ikatutaha rehecha jey pe múndo pyahúpe umi ne hénte omano vaʼekuépe (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). ¡Oiméne ndepyʼakyrỹi raʼe rehendúrõ guare koʼã enseñánsa porãite! (Luc. 24:32). Kon el tiémpo nde remombaʼeterei voi umi mbaʼe reaprendéva rehóvo ha emombeʼuseterei retopávape guive (ekompara Jeremías 20:9 heʼívare).

6. ¿Mbaʼépa ñaaprende Ernest ha Rose experiénsagui?

⁶ Jahechamína la oiko vaʼekue peteĩ ermáno héravare Ernest.b Haʼe orekórõ guare 10 áñorupi itúa omano vaʼekue. Imanduʼávo upe tiémpore, Ernest heʼi: “Añeporandu: ‘¿Oime piko oho yvágape térã ja ndoexistivéima?’. Ha ahechávo umi ótro mitã orekoha gueteri itúape aenvidia chupekuéra”. Ernest káda día lénto ohómi vaʼerã pe sementériope, oñesũ itúa panteón renondépe ha oñemboʼe: “Ñandejára, ¿moõ piko oĩ che túa? Aikuaaseterei ningo”. Ohasa rire 17 áñorupi itúa omano hague, Érnestpe ojeofrese peteĩ kúrso bíblico ha haʼe ensegída oasepta upéva. Ernest oñesorprende oaprendérõ guare umi omanóva noñanduiha mbaʼeve, oĩha hikuái oketeramoguáicha ha la Biblia oprometeha oikove jeytaha hikuái (Ecl. 9:​5, 10; Hech. 24:15). ¡Hasypeve oikuaa umi mbaʼe hetaite tiémporema oñeporandu vaʼekue! Ernest ovyʼaiterei umi mbaʼe oaprendévare ohóvo la Bíbliagui. Hembireko hérava Rose oñepyrũ vaʼekue avei ostudia ha omombaʼeterei vaʼekue avei la oaprendéva. Tiémpo rire áño 1978-pe mokõivéva ojevautisa. Haʼekuéra kyreʼỹme opredika ihéntepe, iñamigokuérape ha entéro ohendusévape guive. Upéicha rupi Ernest ha Rose oipytyvõma mas de 70 persónape oikuaa hag̃ua Jehovápe ha ojevautisa hag̃ua.

7. ¿Mbaʼépa oikóta ñamombaʼéramo la Biblia omboʼéva ñande pyʼaite guive? (Lucas 6:45).

⁷ Jahechaháicha ñamombaʼéramo la Biblia omboʼéva ñande pyʼaite guive ñamombeʼuséta enterovépe voi la ñaaprendéva (elee Lucas 6:45). Ñañeñandu Jesús disipulokuéra ypykue oñeñandu haguéicha, haʼekuéra heʼi vaʼekue: “Ore ndaikatúi roguerokirirĩ umi mbaʼe rohecha ha rohendu vaʼekue” (Hech. 4:20). Ñande ningo ñamombaʼeterei umi enseñánsa verdadéra ha upévare ñakompartise opa ikatúvandi.

JAPREDIKA JAHAYHÚGUI UMI HÉNTEPE

8. ¿Mbaʼépa ñanemomýi ñamombeʼu hag̃ua ñande rapichakuérape umi notísia porã? (Ehecha pe rrekuádro “Pe oporohayhúva omboʼe umi héntepe”). (Ehecha pe taʼanga).

⁸ Jehová ha Jesús ohayhueterei umi héntepe ha ñande avei (Prov. 8:31; Juan 3:16). Ñande jaiporiahuvereko umi hénte ‘ndoikuaáivape Ñandejárape’ ha ‘oikóvape esperansaʼỹre’ (Efes. 2:12). Umi persóna ningo hetaiterei iprovléma, haʼete voíngo oĩva hikuái peteĩ yvykua pypukúpe. Péro ñande haʼetévaicha ñambohasáva chupekuéra peteĩ pióla osẽ hag̃ua upégui ñamombeʼúvo chupekuéra umi notísia porã oñeʼẽva Ñandejára Rréinore. Ñande jahayhu ha jaiporiahuvereko ñande rapichápe. Upévare jajapose ikatúva guive ñamombeʼu hag̃ua chupekuéra umi notísia porã. Upe mensáhe porãite ningo ikatu omeʼẽ esperánsa ha ombovyʼa la héntepe koʼág̃ama voi. Avei omeʼẽ chupekuéra la oportunida amo gotyove oikove hag̃ua pára siémpre Ñandejára múndo pyahúpe (1 Tim. 6:19).

9. ¿Mbaʼépa ñande jaiko jaavisa la héntepe ha mbaʼérepa? (Ezequiel 33:​7, 8).

⁹ Jahayhu rupi ñande rapichakuérape, jaavisase avei chupekuéra ko múndo aña oñehundi potaitemaha (elee Ezequiel 33:​7, 8). Ñande ñambyasy jahechávo umi persóna ñande territoriopegua ha umi ñane hénte ndahaʼéiva Testígo oikoha oñemeʼẽʼỹre enkuénta mbaʼépa oiko potaite hína. La Biblia heʼi porã oikotaha “peteĩ jehasa asy guasu. Ko múndo oñepyrũ guive koʼág̃a peve núnka ndoikóiva péicha” (Mat. 24:21). Ñande jaipota umi hénte oikuaa mbaʼépa oikóta upe tiémpo Jehová oporohusgatahápe. Primero oñehundipaitéta umi rrelihión japu ha upéi Armagedónpe oñehundíta kompletoite ko múndo aña (Apoc. 16:​14, 16; 17:​16, 17; 19:​11, 19, 20). Jajerure ningo Jehovápe umi hénte ñanerendu ha odesidi hag̃ua oservi chupe ñanendive. Péro oĩ heta persóna nohendúiva ñane mensáhe koʼag̃aite peve, umíva apytépe ñane hentekuéra jahayhuetéva. ¿Mbaʼépa entónse oikóta chuguikuéra?

10. ¿Mbaʼérepa tekotevẽterei jasegi jaavisa la héntepe la oikótava?

¹⁰ Jahecháma haguéicha pe artíkulo ohasa vaʼekuépe ikatu hína Jehová odesidi osalva umi hénte okambiávape ohechávo oñehundiha Babilonia Guasu. Jaikuaávo upéva, ñantende porãvéntema mbaʼérepa tekotevẽterei jasegi jaavisa umi héntepe la oikótava. Ñapensamíntena: Haʼekuéra ikatu hína imanduʼa upe moméntope la ñande jaʼévare chupekuéra koʼág̃a (ekompara Ezequiel 33:33 heʼívare). Ikatu ou hína la hentekuéra akãme la avíso ñameʼẽ vaʼekue chupekuéra ha upéicha rupi odesidi oservi Jehovápe tardeterei mboyve. Ñanemanduʼa vaʼerã pe guardiakársel filipospeguáre. Haʼe oñepyrũ vaʼekue ojerovia Jehováre oiko rire ae “peteĩ terremóto tuichaitereíva”. Upéicha avei, ikatu oĩ umi hénte koʼag̃aite ndoaseptáiva ñane mensáhe, péro ikatúva okambia ohecha vove okachapaiteha ko múndo oñehundígui Babilonia Guasu (Hech. 16:​25-34).

JAPREDIKA JAHAYHÚGUI JEHOVÁPE HA HÉRA PORÃITE

11. ¿Mbaʼéichapa ñamombaʼe, ñambotuicha ha ñameʼẽ Jehovápe pe podér omereséva? (Apocalipsis 4:11). (Ehecha pe taʼanga).

¹¹ Ñande jahayhueterei Ñandejára Jehovápe ha héra porãite. Upéva la iñimportantevéva ñanemomýiva ñamombeʼu hag̃ua umi notísia porã. Japredika jave ñamombaʼeguasu hína Ñandejára jahayhuetévape. Ñande pyʼaite guive voi jaʼe Jehovápe: “Nde remerese enterove nemombaʼe ha nembotuicha, remerese avei rerresivi pe podér” (elee Apocalipsis 4:11). ¿Mbaʼéichapa ñamombaʼe ha ñambotuicha Jehovápe? Ñamombeʼu jave ñande rapichápe mbaʼérepa ñaĩ segúro haʼe ‘ojapo hague entéro mbaʼe’ ha omeʼẽ hague ñandéve la vída. ¿Ha mbaʼéichapa ñameʼẽ Jehovápe pe podér? Jaipuru jave ñane tiémpo, ñane mbaretekue ha entéro mbaʼe jarekóva japredika hag̃ua omeʼẽháicha ñandéve ñande posivilida (Mat. 6:33; Luc. 13:24; Col. 3:23). Añetehápe ñandegustaiterei voi ñañeʼẽ ótrope Ñandejára jahayhuetévare, avei ñamombeʼuse ñande rapichápe mbaʼéichapa héra haʼe ha mbaʼépa heʼise héra porãite. ¿Mbaʼérepa?

12. ¿Mbaʼéichapa ñambotuicha Jehová réra japredika jave?

¹² Jahayhueterei rupi Jehovápe ñambotuichase la héra (Mat. 6:9). Upévare ñamombeʼuse enterovépe japuha umi mbaʼe vaiete Satanás heʼíva Jehováre (Gén. 3:​1-5; Job 2:4; Juan 8:44). Japredika jave jaipotaiterei entéro ohendu mbaʼeichagua Dióspa añetehápe Jehová. Jaipota umi hénte oikuaa Jehová oporohayhuha ha ogoverna lája ihustoha. Avei ñamombeʼuse Ñandejára Rréino koʼẽrõitéma oipeʼaitetaha entéro sufrimiénto ikatu hag̃uáicha jaiko vyʼápe ha pyʼaguapýpe (Sal. 37:​10, 11, 29; 1 Juan 4:8). Jajapo jave entéro koʼã mbaʼe ñambotuicha hína Jehová réra. Péicha jave javyʼaiterei avei jajapógui la oñehaʼarõva ñandehegui, pórke ñande Jehová Testígo hína. ¿ Mbaʼérepa jaʼe upéva?

13. ¿Mbaʼérepa tuichaite mbaʼe ñandéve g̃uarã jaiko Jehová Testígoramo? (Isaías 43:​10-12).

¹³ Jehová ningo ñandeporavo oiko hag̃ua ñandehegui Itestígo (elee Isaías 43:​10-12). Ojapo unos kuánto áño pe Kuérpo Governánte heʼi hague peteĩ kártape: “Ñande ningo testígo de Jehová ha ndaipóri ótra kósa tuichavéva upévagui”.c ¿Mbaʼérepa ñapensa upéicha? Epensamína ko ehémplore. Ñamoĩ chupe oñembojaha nderehe rejapo hague álgo ivaíva. Koʼág̃a nde rehechauka vaʼerã umi héntepe japuha upéva ha nderejapói hague mbaʼeve ivaíva. ¿Mávapepa rejeruréta osẽ hag̃ua ndéve de testígo? Katuete ningo peteĩ persóna de konfiánsa nde reikuaa porãvape. Avei tekotevẽ oñeñeʼẽ porã pe persónare ikatu hag̃uáicha ojeguerovia chupe. Ñapensamíntena: Jehová ñandeporavo Itestigorã. Upéva ohechauka haʼe ñandekuaa porã ha okonfiaha ñanderehe jaikuaauka hag̃ua haʼe añoite haʼeha pe Dios verdadéro. Ñandéve g̃uarã ningo tuichaiterei mbaʼe jaiko Jehová Testígoramo. Upévare jaaprovecha entéro oportunida jaikuaauka hag̃ua héra porãite ha jahechauka hag̃ua japuha umi mbaʼe vai ojeʼéva hese. Jajapóvo koʼã mbaʼe ñakumpli la oñehaʼarõva ñandehegui, pórke ñande hína Jehová Testígo (Sal. 83:18; Rom. 10:​13-15).

JASEGÍTA JAPREDIKA OU PEVE PE FIN

14. ¿Mbaʼe mbaʼe ijojahaʼỹvapa ñaneraʼarõ gueteri?

¹⁴ Ñaneraʼarõ gueteri heta mbaʼe ijojahaʼỹva. Hiʼãite ñandéve Jehová rupive hetave persóna oasepta ñane mensáhe oñepyrũ mboyve pe jehasa asy guasu. Upe tiémpo ningo ijetuʼuetereíta, núnka ndojehasáiva peichagua situasión. Péro javyʼa jaikuaávo ikatutaha gueteri upe tiémpope oĩ hénte ohejáva Satanás múndo aña ha ñanemoirũva ñamombaʼeguasu hag̃ua Jehovápe (Hech. 13:48).

15, 16. ¿Mbaʼépa jasegíta jajapo ha arakaʼe pevépa?

¹⁵ Ñahaʼarõ aja jareko hína jajapo hag̃ua peteĩ traváho iñimportantetereíva ha núnka ndojejapomoʼãvéimava. Jareko la priviléhio ñamombeʼúvo ko múndo tuichakuére umi notísia porã oñeʼẽva Ñandejára Rréinore. Avei tekotevẽterei jasegi jaavisa la héntepe mbaʼépa oikóta koʼẽrõite. Haʼekuéra oikuaa vaʼerã ag̃aitéma oñehunditaha ko múndo aña. Ha og̃uahẽ vove pe tiémpo Jehová oporohusgatahápe, umi hénte ohechakuaáta pe mensáhe ñamombeʼu vaʼekue añetehápe ou hague Ñandejáragui (Ezeq. 38:23).

¹⁶ ¿Mbaʼépa jajedesidietéma jajapotaha? Ñande ningo ñamombaʼeterei umi notísia porã, jahayhu umi héntepe ha koʼytevéntema Jehovápe ha pe héra porãite. Upévare jasegíta japredika kyreʼỹme ha japerdeʼỹre tiémpo Jehová heʼi peve: “Ovaléma, koʼápe opa”.