¿Mbaʼéichapa ikatu jaheka konsého iporãva?

1. ¿Mbaʼéichapa ikatu jadesidi porã? (Proverbios 13:10; 15:22).

ENTEROVÉVA jadesidi porãse ha jaipota osẽ porã ñandéve umi mbaʼe jadesidíva. Ñandejára Ñeʼẽ heʼi ñandéve upearã tekotevẽha jajerure umi konsého (elee Proverbios 13:10; 15:22).

2. ¿Mbaʼépa Jehová opromete ñandéve?

² Jaikuaa ningo ñande Ru Jehová ikatuha omeʼẽ ñandéve umi konsého iporãvéva. Upévare ñañemboʼe vaʼerã Jehovápe ha jajerure chupe tañanemoarandu. Haʼe opromete ñandéve ñanepytyvõtaha ha heʼi: ‘Che tódo el tiémpo amaña nderehe. Ameʼẽta ndéve konsého iporãva’ (Sal. 32:8). La heʼíva ko téxto ohechauka Jehová ndahaʼeiha omeʼẽnteva konsého síno avei oñeinteresa káda únore ha ñanepytyvõta jasegi hag̃ua ikonsého.

3. ¿Mbaʼe mbaʼépa jahecháta ko artíkulope?

³ Ko artíkulope jaipurúta Ñandejára Ñeʼẽ ñakontesta hag̃ua koʼã porandu: 1) ¿Mbaʼe kualidápa tekotevẽ jareko ideprovécho hag̃ua ñandéve umi konsého? 2) ¿Mávapa ikatu omeʼẽ ñandéve konsého iporãva? 3) ¿Mbaʼéichapa ikatu jahechauka ñanesinseroha jajerure jave peteĩ konsého? 4) ¿Mbaʼérepa ndajajeruréi vaʼerã ótrope odesidi hag̃ua ñanderehe?

¿MBAʼE KUALIDÁPA TEKOTEVẼ JAREKO?

4. ¿Mbaʼe kualidápa jareko vaʼerã ideprovécho hag̃ua ñandéve umi konsého?

⁴ Ideprovécho hag̃ua ñandéve umi konsého iporãva tekotevẽ ñaneumílde. Ñarrekonose vaʼerã ndajarekoiha sapyʼánte experiénsia peteĩ situasiónpe ha ndajaikuaaiha entéro mbaʼe jadesidíntema hag̃ua ñandejehegui rei. Oimérõ nañaneumíldei Jehová ndaikatumoʼãi ñanepytyvõ. Upévare ni jaleevéramo umi konsého oĩva Ñandejára Ñeʼẽme ndoikemoʼãi ñanderehe mbaʼeve (Miq. 6:8; 1 Ped. 5:5). Péro ñaneumílderamo ñahenduséta voi umi konsého oĩva la Bíbliape ha ensegída voi jasegiséta umi konsého.

5. ¿Mbaʼérepa jaʼekuaa rréi David ikatu hague ou oñemombaʼeguasu?

⁵ Jahechamína mbaʼépa ikatu ñaaprende rréi Davídgui. David ohupyty vaʼekue heta mbaʼe iñimportánteva, upévare haʼe ikatu kuri ou oñemombaʼeguasu. Por ehémplo heta áño oiko mboyve chugui rréi, heta héntema oikuaa vaʼekue Davídpe, pórke upérõ haʼéma kuri peteĩ músiko ivaléva. Hiʼarive ojejerure vaʼekue chupe oho hag̃ua ombopu músika pe rréipe g̃uarã (1 Sam. 16:​18, 19). Jehová oiporavo rire Davídpe oiko hag̃ua chugui rréi, omeʼẽ vaʼekue chupe ijespíritu sánto ha upéva omombarete chupe (1 Sam. 16:​11-13). Pe puévlo omombaʼeterei vaʼekue Davídpe ohundi haguére umi iñenemigokuérape, por ehémplo haʼe ojuka vaʼekue pe filisteo tuichaitévape hérava Goliat (1 Sam. 17:​37, 50; 18:7). David haʼérire peteĩ kuimbaʼe ijorgullósova ikatu kuri ou oñemombaʼeguasu ha opensa natekotevẽiha avave omeʼẽ chupe konsého. Péro haʼe nopensái vaʼekue upéicha.

6. ¿Mbaʼérepa jaʼekuaa David siémpre ohendu hague pe konsého oñemeʼẽva chupe? (Ehecha pe taʼanga).

⁶ Davídgui oiko rire rréi, haʼe oiporavo vaʼekue iñamigorã umi persóna ikatútava omeʼẽ chupe konsého (1 Crón. 27:​32-34). Péro upéva nañanesorprendéi pórke oiko mboyve voi chugui rréi, David siémpre ohendu vaʼekue umi konsého oñemeʼẽva chupe. David ndahaʼéi vaʼekue avei ohendúva umi kuimbaʼe konséhonte, síno peteĩ vuéltape osegi vaʼekue peteĩ konsého omeʼẽva chupe peteĩ kuñakarai hérava Abigaíl. Abigaíl ména héra vaʼekue Nabal, haʼe ningo peteĩ kuimbaʼe oñemombaʼeguasúva, imalagradesídova ha ndorrespetáiva avavépe. David katu iñumílde ha osegi Abigaíl konsého. Upéicha rupi ndojapói vaʼekue peteĩ mbaʼe ivaietereíva (1 Sam. 25:​2, 3, 21-25, 32-34).

7. ¿Mbaʼépa ikatu ñaaprende David ehémplogui? (Eclesiastés 4:13). (Ehecha pe taʼanga).

⁷ Ñande ikatu ñaaprende unas kuánta kósa iporãva Davídgui. Por ehémplo ikatu oime ñandevale peteĩ mbaʼépe térã jarekove autorida ótrogui. Upéicharõ jepe aníkena núnka ñapensa jaikuaapamaha voi entéro mbaʼe ha natekotevẽiha avave omeʼẽ ñandéve konsého. Upéva rangue iporãta jasegíramo David ehémplo. Siémpre ñañehaʼã vaʼerã jasegi umi konsého iporãva tahaʼe haʼéva pe persóna omeʼẽva ñandéve (elee Eclesiastés 4:13). Jajapóramo upéicha ikatu hína jajei umi provléma tuichaichávagui ikatúva ñanembohasa asy ñandéve ha ótrope.

¿MÁVAPA IKATU OMEʼẼ ÑÁNDÉVE KONSÉHO IPORÃVA?

8. ¿Mbaʼérepa Jonatán ikatu vaʼekue omeʼẽ konsého porã Davídpe?

⁸ Jahechamína ótra kósa ikatúva ñaaprende David ehémplogui. Haʼe ohendu vaʼekue umi konsého omeʼẽva chupe umi persóna orekóva peteĩ amista imbaretéva Jehovándi. Péro ndahaʼéi upévante. Avei umi persóna oikuaa porã vaʼekue pe situasión David ohasáva. Por ehémplo peteĩ vuéltape David oikuaase vaʼekue ikatútapa oiko porã jey rréi Saúl ndive. Upérõ David ohendu pe konsého omeʼẽva chupe Jonatán, haʼéva hína Saúl raʼy. ¿Mbaʼérepa Jonatán ikatu vaʼekue omeʼẽ chupe konsého iporãva ko kásope? Pórke Jonatán haʼe vaʼekue Jehová amígo, péro ndahaʼéi upévante, avei oikuaa porã vaʼekue mbaʼeichagua persónapa itúa Saúl (1 Sam. 20:​9-13). ¿Mbaʼépa ñanemboʼe David ojapo vaʼekue?

9. ¿Mávapepa ikatu jajerure konsého? Emombeʼu peteĩ ehémplo. (Proverbios 13:20).

⁹ Ñaikotevẽ jave konsého iporãta jajeruréramo upéva peteĩ persóna orekóvape peteĩ amista imbaretéva Jehová ndive. Péro avei tekotevẽ upe persóna oreko experiénsia ha oikuaa pe situasión jahasáva (elee Proverbios 13:20).a Por ehémplo ñamoĩ chupe peteĩ ermáno imitãva omendase ha otopaseha peteĩ tembireko omoirũ porãtava chupe. ¿Mávapa ikatu omeʼẽ upe ermánope konsého iporãva? Jaikuaa ningo peteĩ iñamígo soltéro ikatuha omeʼẽ chupe konsého porã oipurúramo la Biblia heʼíva. Péro provávlemente pe ermáno omendaséva orresivíta hetave konsého ideprovéchova oñeʼẽramo peteĩ matrimónio ijerovia mbaretévandi ha oikuaa porãva upe ermánope. Upe matrimónio omomanduʼáta chupe umi konsého oĩvare la Bíbliape, péro avei omombeʼúta upe ermánope umi mbaʼe oaprendémava hikuái imatrimóniope.

10. ¿Mbaʼépa jahecháta koʼág̃a?

¹⁰ Koʼa peve jahecháma mbaʼe kualidápa tekotevẽ jareko ha avei mávapepa jajerure vaʼerã konsého. Jahechamína koʼág̃a mbaʼérepa tekotevẽ ñanesinséro jajerure jave konsého ha mbaʼérepa nañahaʼarõi vaʼerã ótro odesidi ñanderehe.

¿MBAʼÉICHAPA IKATU JAHECHAUKA ÑANESINSEROHA JAJERURE JAVE KONSÉHO?

11, 12. a) ¿Mbaʼépa sapyʼánte ikatu hína ojapo peteĩ persóna? b) ¿Mbaʼépa ojapo vaʼekue rréi Rehoboam tekotevẽrõ guare odesidi peteĩ mbaʼe iñimportánteva?

¹¹ Sapyʼánte peteĩ persóna haʼetévaicha ohekáva hína konsého. Péro legálmente haʼe odesidíma álgo ha oipotánte ótro heʼi chupe oĩ porãha upéva. Peichagua persóna naisinséroi hína ha ndoipotái añetehápe peteĩ konsého. Oimérõ upéicha, tekotevẽterei oñatende la oiko vaʼekuére rréi Rehoboam rehe.

¹² Rréi Salomón rire ojupi vaʼekue de rréi Rehoboam. Haʼe oñepyrũrõ guare ogoverna, pe puévlo oreko vaʼekue hetaiterei rrikésa. Péro umi héntepe g̃uarã Salomón ojopyetereíma vaʼekue hendivekuéra. Upémarõ pe puévlo oho Rehoboam rendápe ha ojerure chupe ndaikatúipa ombovevyive pe traváho ha pe kárga pohýi oñemoĩ vaʼekue hiʼarikuéra. Rehoboam ojerure tiémpo umi héntepe opensa hag̃ua mbaʼépa odesidíta. Primerorã haʼe ojerure konsého umi kuimbaʼe ijedáva oipytyvõ vaʼekuépe Salomónpe. Ha upéva legálmente oĩ porãiterei vaʼekue (1 Rey. 12:​2-7). Péro Rehoboam orrechasa pe konsého omeʼẽva chupe umi kuimbaʼe ijedavéva. ¿Mbaʼérepa ojapóne raʼe upéva? Ikatu oime haʼe odesidíma raʼe la ojapótava ha otopasénte álgien opensáva haʼe opensaháicha. ¿Mbaʼérepa jaʼe upéva? Pórke upéi haʼe oho ojerure konsého umi iñamígo imitãvape ha Rehoboámpe ogustaitéma voi la haʼekuéra heʼíva (1 Rey. 12:​8-14). Upéi Rehoboam oho heʼi pe puévlope la umi mitãkariaʼy heʼi vaʼekue chupe. Upéicha rupi upéi pe puévlo ojedividi, opuʼã hese ha upe guive Rehoboam oreko vaʼekue heta provléma (1 Rey. 12:​16-19).

13. ¿Mbaʼéichapa ikatu jaikuaa ñanesinséropa hína jajerure jave peteĩ konsého?

¹³ ¿Mbaʼépa ikatu ñaaprende Rehoboam ehémplogui? Jajerure jave peteĩ konsého tekotevẽ ñanesinséro. ¿Péro mbaʼéichapa jaikuaáta ñanesinséropa hína? Upearã ikatu ñañeporandu: “Ajerure jave peteĩ konsého, ¿ensegídapa amboyke upéva oimérõ ndahaʼéi hína la che ahenduséva?”. Jahechamína peteĩ ehémplo.

14. ¿Mbaʼe rehepa ñanemanduʼa vaʼerã oñemeʼẽ jave ñandéve peteĩ konsého? Emombeʼu peteĩ ehémplo. (Ehecha pe taʼanga).

¹⁴ Ñapensamína ko ehémplore. Ñamoĩ chupe peteĩ ermánope ojeofreseha peteĩ traváho ojepaga porãtahápe chupe. Péro ojagarra mboyve pe traváho pe ermáno ojerure konsého peteĩ ansiánope. Pe ermáno omombeʼu pe ansiánope pe traváho káusare heta vése tekotevẽtaha oĩ mombyry ifamíliagui heta tiémpore. Upémarõ pe ansiáno omomanduʼa chupe haʼe orekoha peteĩ rresponsavilida iñimportantevéva, haʼéva hína oipytyvõ ifamíliape ojerovia mbarete hag̃ua (Efes. 6:4; 1 Tim. 5:8). Ñamoĩ chupe pe ermánope upepetéma voi ndogustaiha pe ansiáno heʼíva chupe. Upémarõ haʼe osegi oñeʼẽ upe témare hetave ermánondi otopa peve peteĩ heʼíva chupe la haʼe ohenduséva. Upéicharõ, ¿añetehápepa pe ermáno isinséro ha oipota oñemeʼẽ chupe peteĩ konsého? ¿Térãpa odesidíma voi álgo ha oipotánte álgien heʼi chupe la haʼe ohenduséva? Aníkena ñanderesarái ñane korasõ itraisioneroha (Jer. 17:9). Ha sapyʼánte pe konsého ñaikotevẽvéva haʼe hína pe nañahenduseietéva.

¿JAJERURE VAʼERÃPA ÓTROPE TODESIDI ÑANDEREHE?

15. ¿Mbaʼépa ndovaléi jajapo ha mbaʼérepa?

¹⁵ Ñandete jadesidi vaʼerã umi mbaʼe jajapótava, pórke upéva peteĩ rresponsavilida jarekóva káda uno (Gál. 6:​4, 5). Jahecháma haguéicha, ñanearandúramo jahekáta umi konsého oĩva Ñandejára Ñeʼẽme ha ñañeʼẽta umi ermáno ha ermána ijerovia mbaretévandi. Péro ñañatende vaʼerã ani jajerure chupekuéra todesidi ñanderehe. Oĩ algúno okonfiáva peteĩ persónare ha derechoite voi heʼi chupe: “¿Mbaʼépa nde rejapóne che situasiónpe?”. Ha avei oĩ umi ojapóntemava la ótro ojapóva opensa porãʼỹre isituasiónre.

16. ¿Mbaʼe situasiónpa oñepresenta vaʼekue Coríntope, ha mbaʼépa ojapo vaʼerã kuri káda kristiáno? (1 Corintios 8:7; 10:​25, 26).

¹⁶ Jahechamína mbaʼe situasiónpa oñepresenta vaʼekue pe kongregasión Corintoguápe. Umi kristiáno tekotevẽ vaʼekue odesidi hoʼútapa pe soʼo provávlemente ojesakrifika vaʼekue umi dios raʼangápe. Pablo heʼi vaʼekue umi kristiánope: “Ñande jaikuaa peteĩ dios raʼanga ndahaʼeiha mbaʼevete, ha jaikuaa peteĩnte oĩha Ñandejára” (1 Cor. 8:4). Pablo heʼi rupi upéva, algúno pe kongregasionpegua odesidi vaʼekue hoʼu pe soʼo oñevendéva umi karniseríarupi, jepe upéva provávlemente ojeofrese vaʼekue umi dios raʼangápe. Péro ótro odesidi vaʼekue ndoʼumoʼãiha pono omolesta chupe ikonsiénsia (elee 1 Corintios 8:7; 10:​25, 26). Káda kristiáno odesidi vaʼerã kuri ijeheguiete mbaʼépa ojapóta. Pablo ni mbaʼevéicharõ ndeʼíri vaʼekue umi kristiánope odesidi hag̃ua ótrore, térã ojapóntema hag̃ua la ótro ojapóva. Amo ipahápe ‘káda únope Ñandejára ohusgáta kuri umi mbaʼe ojapóvare’ (Rom. 14:​10-12).

17. ¿Mbaʼépa ikatu oiko jajapónterõ la ótro ojapóva? Emombeʼu peteĩ ehémplo. (Ehecha pe taʼanga).

¹⁷ ¿Mbaʼeichagua situasiónpa ikatu avei oñepresenta koʼág̃arupi? Ñañeʼẽmína umi párte michĩvéva oĩvare ñande ruguýpe. Káda kristiáno odesidi vaʼerã ijeheguiete oaseptátapa térãpa orrechasáta umi párte michĩvéva oĩva ñande ruguýpe.b Ñarrekonose vaʼerã ko téma ijetuʼuha ñantendepa hag̃ua, péro káda uno tekotevẽ odesidi ijeheguiete mbaʼépa ojapóta (Rom. 14:4). Ndaikatumoʼãi ningo núnka ñanearandu jaikóramo jajapónte la ótro ojapóva, péro ikatúta ñanearandu jaipurúramo la Biblia heʼíva jadesidi hag̃ua káda uno mbaʼépa jajapóta (Heb. 5:14). Upévare, primerorã tekotevẽ ñandejeheguiete ñainvestiga upe téma. Péro ikatu oime jasegi gueteri nañantendepái mbaʼéichapa jasegíta umi konsého bíblico ñande kásope. Oimérõ upéicha, upépe ae jajerure vaʼerã konsého peteĩ kristiáno ijerovia mbaretévape.

JASEGÍKENA JAJERURE KONSÉHO

18. ¿Mbaʼe mbaʼépa Jehová ojapo ñanderehehápe?

¹⁸ Jehová ohechauka ojeroviaha ñanderehe ohejávo ñandete jadesidi mbaʼépa jajapóta. ¿Péro mbaʼéichapa haʼe ñanepytyvõ jadesidi porã hag̃ua? Omeʼẽ ñandéve Iñeʼẽ la Biblia ha amígo iñarandúva ñanepytyvõva ñantende hag̃ua mbaʼéichapa ikatu jasegi umi konsého oĩva la Bíbliape. Péicha Jehová okuida ñanderehe pórke haʼe ningo ñande Ru ñanderayhuetéva (Prov. 3:​21-23). ¿Mbaʼéichapa ñande ikatu jahechauka jaagradeseha chupe ñanepytyvõ haguére?

19. ¿Mbaʼépa ikatu jajapo jasegi hag̃ua ñambovyʼa Jehovápe?

¹⁹ Ñapensamína ko ehémplore. Tuakuéra ovyʼaiterei ohechávo ifamília okakuaaha ohóvo ha oikoha chuguikuéra Jehová siérvo iñarandúva ha oipytyvõva ótrope. Péicha avei Jehová ovyʼaiterei ohechávo ñande jerovia imbareteveha ohóvo, jajerureha konsého ha ñañehaʼãha jadesidi umi mbaʼe omombaʼeguasútava chupe.