¿Mbaʼéichapa ikatu esegi evyʼa ndeedáramo jepe?

1, 2. ¿Mbaʼépa Jehová opensa umi isiervokuéra ijedávare? (Salmo 92:​12-14). (Ehecha pe taʼanga).

KO YVY tuichakuére la hénte orreaksiona heta hendáicha ohechakuaa vove ijedamaha ohóvo. Por ehémplo, ¿nemanduʼápa primera ves repillárõ guare ne akãrangue oñepyrũmaha morotĩ? Ikatu oime pyaʼe voi reipeʼa ótro ohecha mboyve, péro epilla avei rejapóramo jepe upéva lomímonte osegitaha osẽ nderehe umi akãrangue morotĩ. Ko ehémplo ohechauka porã heta persónape g̃uarã ijetuʼuha oasepta ijedamaha ohóvo.

² ¿Péro mbaʼépa Jehová opensa umi isiervokuéra ijedávare? (Prov. 16:31). Haʼe heʼi umi isiervokuéra ijedáva ojoguaha umi yvyramáta iporãitereívape (elee Salmo 92:​12-14). ¿Mbaʼérepa haʼe oipuru upe ehémplo? Ikatu jaʼe umi yvyramáta oiko arevéva normálmente iporãitereintemaha, pórke hogue heta ha ipoty porãiterei. Por ehémplo oĩ peteĩ yvyramáta hérava cerezo japonés oiko aretereíva. Algúno umi yvyramáta oiko voi mas de 1.000 áño ha la ipoty katu iporãitereíntema. Koʼãichagua yvyramáta iporã ha oiko aréva ojoguaiterei Jehová siervokuéra ijedávape, pórke Jehovápe g̃uarã haʼekuéra iporã ha ivaliosoiterei. Jehová ningo ndoikói ohecha sólamente umi akãrangue morotĩ orekóva umi isiervokuéra ijedáva, síno haʼe ohecha ha omombaʼe umi kualida porã haʼekuéra orekóva. Jehová oikuaa haʼekuéra oservimaha chupe heta áñore ha osegiha hikuái ifiél chupe ivai ha iporã jave la situasión.

3. Emombeʼu peteĩ ehémplo ohechaukáva Jehová ojevale hague umi ijedávare okumpli hag̃ua ivolunta.

³ Ñandeedáramo jepe jahávo Jehová osegi ñanemombaʼe.a Ikatu jaʼe upéva pórke Jehová pyʼỹinte oipuru vaʼekue umi ijedávape okumpli hag̃ua ivolunta. Por ehémplo Sara ijedáma vaʼekue Jehová heʼírõ guare imembytaha peteĩ mitãkuimbaʼe, ha imembýgui osẽtaha heta nasión ha upe ifamiliarégui outaha pe Mesías (Gén. 17:​15-19). Avei Moisés ijedáma vaʼekue Jehová heʼírõ guare chupe onohẽ hag̃ua ipuévlo Israélpe Egíptogui (Éx. 7:​6, 7). Apóstol Juan avei ijedáma kuri Jehová ojevalérõ guare hese oskrivi hag̃ua 5 lívro oĩva la Bíbliape.

4. Ohechaukaháicha Proverbios 15:​15, ¿mbaʼépa ikatu oipytyvõ umi ijedávape oaguanta hag̃ua umi provléma? (Ehecha pe taʼanga).

⁴ Umi ijedáva oñepyrũma avei hasy ha upévare heta mbaʼe ijetuʼu jepi chupekuéra. Peteĩ ermána opukahápe heʼi: “Legálmente ijetuʼu la ñandeeda vove, upéva ndahaʼeiete hína iñarruinádovape g̃uarã”. Péro nemanduʼákena pe vyʼa haʼeha peteĩ kualida ikatúva nepytyvõ reaguanta hag̃ua umi pruéva ijetuʼúva rembohováitava ndeeda rupi (elee Proverbios 15:15).b Ko artíkulope jahecháta mbaʼe mbaʼépa ikatu ojapo umi ijedáva osegi hag̃ua ovyʼa. Avei ñaanalisáta mbaʼépa ikatu ojapo umi ótro oipytyvõ hag̃ua umi ermáno ha ermána ijedávape oĩva kongregasiónpe. Péro koʼág̃a ñaanalisa raẽta mbaʼérepa ijetuʼu jepi umi ijedávape osegi hag̃ua ovyʼa.

¿MBAʼÉREPA IKATU EJU NDEREVYʼAVÉI NDEEDA VOVE REHÓVO?

5. ¿Mbaʼe mbaʼérepa algúno ijedáva ikatu ou ndovyʼavéi?

⁵ ¿Mbaʼe mbaʼérepa ikatu eju nderevyʼavéi? Por ehémplo, ikatu oime reñedesanima pórke koʼág̃a ndaikatuvéima rejapo umi mbaʼe rejapo vaʼekue yma. Ikatu avei oime nemanduʼa nemitãvérõ guare mbaʼeichaitépa neresãi asy ha hiʼãnte ndéve reiko jey upéicha (Ecl. 7:10). Por ehémplo peteĩ ermána hérava Rubic heʼi: “Ijetuʼueterei chéve amonde hag̃ua la che ao pórke cherasypaitéma voi ha hiʼarive ndaikatuvéima akuʼe porã. Ndaikatúi ningo ni ahupi porã la che py amonde hag̃ua la che média. Che po katu hatãmba pe artrítis káusare, upévare umi mbaʼe isensillovéva jepe ndaikatuvéima ajapo”. Peteĩ ermáno hérava Harold oservíva Betélpe heʼi avei: “Sapyʼánte ningo arrenega chejehe, pórke yma chemitãkariaʼýpe chembareteterei vaʼekue ha koʼág̃a ni michĩmi ndajoguavéima upe mitãkariaʼýpe. Chéve ningo chegustaiterei vaʼekue umi depórte ha umi ótro heʼími vaʼerã cherehe: ‘Pembohasa Hároldpe la pelóta, haʼe núnka ndojavýi’. Péro koʼág̃a katu ni pe pelótare ndachepuʼakavéima”.

6. a) ¿Mbaʼe mbaʼérepa algúno ijedáva ikatu ou oñedesanima? b) ¿Mbaʼépa ikatu oipytyvõ peteĩ ijedávape odesidi hag̃ua ikatútapa osegi omaneha térãpa nahániri? (Ehecha pe artíkulo hérava “¿Ikatúpa gueteri asegi amaneha?” osẽva ko rrevístape).

⁶ Ikatu oime hína eñedesanima pórke ndaikatuvéima rejapo ndejeheguíntema umi mbaʼe anteve rejapo vaʼekue. Koʼýte oiméne reñeñandu péicha tekotevẽrõ ojekuida nderehe nde rógape, térã tekotevẽrõ reva peteĩ ne família rógape ojekuida hag̃ua nderehe. Avei ikatu oime nderevyʼavéi pórke nderasykatu térã nderehechaporãvéima. Oiméne upévare ndaikatuvéima eho neaño algún lugárpe, térã ndaikatuvéima emaneha nde áuto térã ne móto. Entéro koʼã mbaʼe ningo ikatu hína nemoñeñandu vai. Péro nemanduʼákena ko mbaʼére: Jehová ha umi oĩva nde jerére nemombaʼeterei. Aníkena reduda nde Ru yvagapegua ontende porãitereiha umi mbaʼe reñandúva. Haʼe oikuaa porã mbaʼeichaitépa rehayhu chupe ha umi ermanokuérape, ha upéva hína la iñimportantevéva Jehovápe g̃uarã (1 Sam. 16:7).

7. Oimérõ reñembyasy repenságui ndaikatumoʼãiha rehecha pe Armagedón, ¿mbaʼe rehepa ikatu nemanduʼa?

⁷ Ikatu oime eñembyasy repenságui ndaikatumoʼãiha rehecha pe Armagedón ou vove. Oimérõ reñeñandu hína upéicha, ¿mbaʼépa ikatu nepytyvõ? Nemanduʼákena Jehová ipasiensiaha ohaʼarõ aja ohundi ko múndo aña (Is. 30:18). ¿Péro mbaʼérepa Jehová la ipasiensiaite? Haʼe oipota hetave persóna oikuaa ha odesidi oservi chupe (2 Ped. 3:9). Upévare reñedesanima jave, eñehaʼãkena nemanduʼa hetaiterei persóna ikatutaha oikuaa Jehovápe ha ojesalva ou mboyve pe fin. Ikatu voi hína umi persóna apytépe oĩ avei ne hentekuéra.

8. ¿Mbaʼépa ikatu ojapo algúno ijedáva hasy rupi?

⁸ Nañañeñanduporãi jave enterovévante voi ikatu jaʼe térã jajapo peteĩ mbaʼe upéi ñambyasýva (Ecl. 7:7; Sant. 3:2). Por ehémplo Job ohasa asýrõ guare oñepyrũ vaʼekue ‘oñeʼẽ opensa porãʼỹre’ (Job 6:​1-3). Avei peteĩ mbaʼasy káusare ikatu algúno ijedáva oñepyrũ heʼi térã ojapo algúna kósa normálmente ndeʼimoʼãi térã ndojapomoʼãiva jepi. Péro ñandeeda térã ñanderasýramo jepe, ndeʼiséi ikatuha jatrata vai ótrope térã ñaneexihenteterei jaipotágui ojejapopa ñandéve entéro mbaʼe. Upévare jahechakuaárõ jaʼe hague álgienpe álgo naiporãiva, pyaʼékena jajediskulpa hendive (Mat. 5:​23, 24).

¿MBAʼÉPA IKATU REJAPO ESEGI HAG̃UA EVYʼA?

9. ¿Mbaʼérepa reheja vaʼerã ótro nepytyvõ? (Ehecha pe taʼanga).

⁹ Ehejákena ótro tanepytyvõ (Gál. 6:2). Ñepyrũrã upéva ikatu ijetuʼu hína ndéve. Peteĩ ermána hérava Gret heʼi: “Chéve ndahaʼéi la ifasilpáva aasepta ótro chepytyvõ, pórke ndaipotái oiko chehegui peteĩ kárga chupekuéra g̃uarã. Upévare kon el tiémpo akambia vaʼerã kuri apensa lája ha ahechakuaa cheumílde vaʼerãha aheja hag̃ua ótro cheajuda”. Nemanduʼákena avei umi ótro ovyʼaitereitaha rehejáramo chupekuéra nepytyvõ (Hech. 20:35). Ha nde voi avei revyʼáta rehechávo mbaʼeichaitépa oĩ nderayhúva ha ojepyʼapýva nderehe.

10. ¿Mbaʼérepa ndeagradesído vaʼerã? (Ehecha pe taʼanga).

¹⁰ Ndeagradesídokena (Col. 3:15; 1 Tes. 5:18). Oĩ jave álgien ojapóva álgo ñanderehehápe ikatu oime ñamombaʼeterei, péro upéi ñanderesarái jaagradese hag̃ua chupe. Upévare iporãta pukavýpe jaʼéramo upe persónape “grásia”, pórke upéicha ñane amigokuéra oikuaáta ñamombaʼetereiha la haʼekuéra ojapóva ñanderehe. Peteĩ ermána hérava Lea okuida umi ermáno ha ermána ijedávare oĩvape Betélpe. Haʼe heʼi: “Peteĩva umi ermána ijedáva oskrivi jepi peteĩ kuatiaʼíre oagradesetereiha chéve la ajapóva. La haʼe oskrivíva ningo ndaipukúi péro ijukyetereíntema. Upéva ningo opokoiterei cherehe ha avei chembovyʼa, pórke aikuaa ovaloraitereiha la ajapóva hesehápe”.

11. ¿Mbaʼépa ikatu rejapo eporopytyvõ hag̃ua? (Ehecha pe taʼanga).

¹¹ Eñehaʼãkena eporopytyvõ. Reipurúramo ne tiémpo eipytyvõ hag̃ua ótrope, ndereikomoʼãi epensaiterei ne provlémarente. Ikatu ningo ñakompara umi ijedávape umi lívro iporãitereívare, péro peteĩ lívro opytáramo peteĩ muévle árinte ndaideprovechomoʼãi avavépe. Upéicha avei umi imitãvéva ndaikatumoʼãi oaprende ndehegui mbaʼeve nereñeʼẽiramo chupekuéra, térã neremombeʼúiramo umi mbaʼe reikuaáva. Upévare eñehaʼãkena eikuaa porãve umi imitãvévape ndehegui, ikatu embaʼeporandu chupekuéra ha ejapysaka porã la heʼívare hikuái. Emboʼékena chupekuéra iporãitereiha jaiko Jehová oipotaháicha ha ndaiporiha voi ótra kósa ñanembovyʼavéva upévagui. Nde rekonsola ha remokyreʼỹ jave umi ne amígo imitãvévape, nde voi revyʼáta (Sal. 71:18).

12. Ohechaukaháicha Isaías 46:​4, ¿mbaʼépa Jehová opromete isiervokuéra ijedávape? (Ehecha pe taʼanga).

¹² Eñemboʼékena Jehovápe nemombarete hag̃ua. Sapyʼánte ikatu oime nekaneʼõ térã nekangy ha upéva nedesanima, péro nemanduʼákena Jehová ipoderosoitereiha. La Biblia heʼi voi: “Haʼe arakaʼeve naikaneʼõi ni núnka naikangýi” (Is. 40:28). Upévare haʼe ikatu hína omeʼẽ ndéve pe fuérsa reikotevẽva (Is. 40:​29-31). Jehová opromete voi nepytyvõtaha, ha reikuaaháicha haʼe siémpre okumpli la oprometéva (elee Isaías 46:4; Jos. 23:14; Is. 55:​10, 11). Reñemboʼéramo Jehovápe haʼe nepytyvõta, upéicha rehechakuaáta mbaʼeichaitépa haʼe nderayhu ha upéva nembovyʼaitereíta.

13. Ohechaukaháicha 2 Corintios 4:​16-18, ¿mbaʼe rehepa nemanduʼa vaʼerã? (Ehecha pe taʼanga).

¹³ Nemanduʼákena un tiémporente ndeedataha. Jaikuaa jave peteĩ situasión ijetuʼúva opataha, ifasilve ñandéve ñaaguanta hag̃ua. Ha la Biblia omboʼe koʼẽrõitéma ndaiporimoʼãveimaha ijedáva ni hasykatúva (Job 33:25; Is. 33:24). Upéicharõ ikatu evyʼa, pórke umi mbaʼe iporãvéva ndahaʼéi hína umi mbaʼe rehasáma vaʼekue yma nemitãvépe, síno la iporãvéva neraʼarõ gueteri hína amo gotyove (elee 2 Corintios 4:​16-18). Péro jahechamína koʼág̃a mbaʼépa ikatu jajapo umi ijedáva rehehápe.

¿MBAʼÉPA IKATU JAJAPO UMI IJEDÁVA REHEHÁPE?

14. ¿Mbaʼérepa iñimportánte javisita ha ñahenói umi ermáno ijedávape?

¹⁴ Javisita ha ñahenói memékena umi ermáno ha ermána ijedávape (Heb. 13:16). Sapyʼánte umi ijedáva ikatu oñeñandu haʼeño. Peteĩ ermáno hérava Kam heʼi: “Tódo el día apyta ógape pórke ndaikatúi asẽ, upévare sapyʼánte ndaikuaavéima mbaʼépa ikatu ajapo. Che ningo ajogua peteĩ león tuja oĩvape iháulape, upévare sapyʼánte arrenega ha ndaigustovéima chéve mbaʼeve”. Javisita jave umi ijedávape jahechauka jahayhu ha ñamombaʼeha chupekuéra. Ikatu oime jaʼéma raʼe ñahenói térã javisitataha peteĩ ermáno ijedávape ñane kongregasionpegua, péro upéi ndajajapói. Enterovévante voi ningo ñanerembiapo heta, péro jahecha vaʼerã “mbaʼépa hína umi mbaʼe iñimportantevéva”, umíva apytépe oĩ hína javisita umi ijedávape (Filip. 1:10). ¿Mbaʼépa ñanepytyvõta jajapo hag̃ua upéva? Ikatu ñaanota ñane kalendáriope ñanemanduʼa hag̃ua arakaʼépa ñamondóta peteĩ mensáhe térã ñahenóita umi ermáno ijedávape ñane kongregasionpegua. Avei ikatu ñañeorganisa jaha hag̃ua javisita chupekuéra, ikatu voi ñamoĩ mbaʼe díapa jaháta ani hag̃ua ñanderesarái upéi.

15. ¿Mbaʼe mbaʼépa ikatu ojapo umi imitãva ha ijedáva oñondive?

¹⁵ Oimérõ nde nemitã, ikatu hína ndereikuaaporãi mbaʼe rehepa ikatu eñeʼẽ umi ermáno ijedávandi térã mbaʼépa ikatu ejapo hendivekuéra. Péro natekotevẽi ningo ejepyʼapy, eñehaʼãnte vaʼerã toiko ndehegui peteĩ amígo ikalidáva (Prov. 17:17). Ikatu eñehaʼã reñeʼẽ hendivekuéra rreunión mboyve térã opa rire. Ikatu avei eporandu umi ermáno ha ermána ijedávape mbaʼe téxtopa la ogustavéva chupekuéra, térã ejerurekuaa chupekuéra tomombeʼu ndéve algún káso imitãrõ guare igrasiaitereíva chupekuéra. Avei ikatu einvita umi ermánope ohecha hag̃ua nendive pe prográma de JW Broadcasting^®. Eñehaʼãkena avei ejapo hesehapekuéra umi mbaʼe haʼekuéra ndaikatúiva ojapo, por ehémplo ikatu rehecha la iteléfono térã itávlet oikópa hína, ha oimépa odeskarga raʼe umi puvlikasión ipyahuvéva. Peteĩ ermána hérava Carol heʼi: “Oimérõ oĩ peteĩ mbaʼe ndegustáva, einvitákena umi ijedávape ojapo hag̃ua upéva nendive. Che ningo ndahaʼevéima avei la chemitãitereíva péro oĩ gueteri heta mbaʼe chegustáva, por ehémplo asẽ ambaʼejogua, aha akaru che amigokuérandi ha avisita umi lugár iporãva adisfruta hag̃ua Jehová kreasióngui”. Peteĩ ermána hérava Maira heʼi avei: “Peteĩva che amigaite oreko 90 áño. Haʼe ningo 57 áño ijedave chehegui, péro pyʼỹinte cheresarái chemitãveha chugui, pórke orepyʼaropu hag̃uáicha jepi ropuka oñondive ha rohecha jepi pelíkula. Oreprovléma jave katu roñopytyvõ”.

16. ¿Mbaʼérepa iporã ñamoirũ umi ermáno ha ermána ijedávape oho jave doktórpe?

¹⁶ Ñamoirũkena umi ermáno ijedávape oho jave doktórpe. Ikatu tuicha ñaipytyvõ umi ijedávape jarahávo chupekuéra doktórpe. Péro avei ikatu japyta hendivekuéra jahecha hag̃ua mbaʼéichapa ojetrata chupekuéra ha oñeñatende porãpa hína hesekuéra (Is. 1:17). Ikatu voi ñaanota la heʼíva pe doktór ñaipytyvõ hag̃ua upe ermáno térã pe ermánape. Peteĩ ermána ijedáva hérava Ruth heʼi: “Aha jave akonsulta cheaño, sapyʼánte umi doktór ndoroviapái la haʼéva chupekuéra. Algúno katu heʼi voi chéve: ‘Ndéko nanderasýi, ne akãmente oĩ upéva’. Péro oĩ jave chemoirũva idiferenteterei, pórke upéicha jave umi doktór chetrata porãiterei. Aagradeseterei ningo umi ermáno ha ermána chemoirũvape che konsúltape”.

17. ¿Mbaʼéichapa ikatu ñaipytyvõ umi ijedávape opredika hag̃ua ñanendive?

¹⁷ Japredikákena umi ermáno ijedávandi. Ikatu algúno ijedáva naimbaretevéima opredika hag̃ua ogahárupi, upévare ikatu ñainvita chupekuéra oĩ hag̃ua ñanendive karrítope. Ikatu voi jagueraha peteĩ sílla ikatu hag̃uáicha haʼekuéra oguapy ag̃ui pe karrítogui. ¿Ikatúpa avei ñainvita umi ermáno ijedávape ñanemoirũ hag̃ua peteĩ kúrso bíblicope? ¿Térã ndaikatúipa jaraha ñane estudiántepe pe ermáno rógape jajapo hag̃ua upépe la kúrso bíblico? Avei umi ansiáno ikatu oorganisa ojejapo hag̃ua pe aty predikasionrã umi ermáno ijedáva rógape, péicha ifasilvéta chupekuéra osẽ hag̃ua opredika. Jehová omombaʼeterei jajapo jave la ikatúva guive jahechauka hag̃ua ñamombaʼeha umi ermáno ijedamívape (Prov. 3:27; Rom. 12:10).

18. ¿Mbaʼépa jahecháta pe artíkulo oúvape?

¹⁸ Ko artíkulope jahecha Jehová ha entéro umi ermáno kongregasionpegua ohayhu ha omombaʼetereiha umi ijedávape. Umi ijedáva ningo oreko heta provléma, péro Jehová katuete oipytyvõta chupekuéra osegi hag̃ua ovyʼa (Sal. 37:25). Peẽ ermáno ha ermána pendeedámava, aníkena pepensa umi mbaʼe iporãvéva pehasapáma hague yma penemitãvépe, síno la iporãvéva peneraʼarõ gueteri hína amo gotyove. Péro oĩ heta ermáno ha ermána ombohováiva ótro provléma, haʼekuéra okuida ihénte ijedávare térã peteĩ ifamília o iñamígo hasývare. ¿Mbaʼépa ikatu oipytyvõ chupekuéra osegi hag̃ua ovyʼa? Upéva jahecháta pe artíkulo oúvape.