Oñeporandúva jepi
¿Mbaʼépa hína ‘pe plan’ Jehová omoĩtava koʼẽrõitéma umi nasionkuéra akãme?
Oñeʼẽvo mbaʼéichapa oñepyrũta pe jehasa asy guasu, Apocalipsis 17:16, 17 heʼi: “Pe animál salváhe 10 hatĩva nde rehecha vaʼekue ndochaʼemoʼãi pe kuña rekovaíre, oipeʼapaitéta chugui ikosakuéra ha ohejáta chupe opío, hoʼúta hoʼo ha ohapýta chupe kompletoite tatápe. Upéva oikóta pórke Ñandejára omoĩta iñakãmekuéra peteĩ plan ojapo hag̃ua haʼe oipotáva, upéva heʼise opensataha hikuái la mísma kósa ha omeʼẽta ijautorida pe animál salváhepe, oñekumplipa peve umi mbaʼe Ñandejára heʼi vaʼekue”. Anteve ñane puvlikasionkuéra heʼími vaʼekue Jehová omoĩtaha umi nasión akãmekuéra “peteĩ plan” ohundipaite hag̃ua hikuái enterove umi rrelihión japúpe.
Péro koʼág̃a tekotevẽ oñekambia ko explikasión. Añetehápe, ‘pe plan’ Jehová omoĩtava umi nasionkuéra korasõme, heʼise hína haʼekuéra ‘omeʼẽtaha ijautorida pe animál salváhepe’. ¿Mbaʼéichapa oñekumplíta upéva? Ñantende hag̃ua, ñambohovái vaʼerã unos kuánto porandu.
¿Máva mávarepa oñeʼẽ hína ko profesía? Pe “kuña rekovai”, oñehenóiva avei “Babilonia Guasu”, orrepresenta hína kompletoite umi rrelihión japúpe. Pe “animál salváhe pytãitéva”, orrepresenta pe Organización de las Naciones Unídaspe. Ko organisasión oñeforma vaʼekue 1919-pe omoĩ hag̃ua pyʼaguapy ko múndo tuichakuére, ha upérõ héra vaʼekue Sociedad de Naciones (Apoc. 17:3-5). Ha umi “10 hatĩ” katu orrepresenta enterove umi goviérno térã nasión oapojávape pe animál salváhepe.
¿Mbaʼe trátopa oreko pe kuña rekovai ha pe animál salváhe pytãitéva? Pe kuña rekovai oguapy pe animál salváhe ári, upéva heʼise oapojaha chupe ha oñehaʼãha odomina pe animál salváhepe.
¿Mbaʼépa oikóta pe kuña rekovaíre? Pe animál salváhe umi “10 hatĩ” reheve “ndochaʼemoʼãi pe kuña rekovaíre”. Upévare oipeʼapaitéta chugui umi rrikésa orekóva, ha ohechaukáta enterovépe mbaʼeichaitépa iñaña upe kuña rekovai. Upéi ohundietéta hikuái pe kuña rekovaípe, Jehová heʼíma haguéicha oikotaha (Apoc. 17:1; 18:8). Péicha opaitéta enterove umi rrelihión japu. Péro oiko mboyve upéva, Jehová omomýita umi nasionkuérape ojapo hag̃ua peteĩ mbaʼe tuichaitereíva, núnka voi ndoikóiva gueteri ko múndope.
¿Mbaʼépa Jehová ojapokáta umi goviérnope? Jehová omoĩta “peteĩ plan” umi goviérno akãme haʼéva hína umi “10 hatĩ”. ¿Mbaʼépa upe plán? Umi goviérno ‘omeʼẽta ipodér ha ijautorida pe animál salváhe’ pytãitévape, haʼéva hína pe Naciones Unidas (Apoc. 17:13). Epensamína la oikótavare. ¿Ijehegui reínte piko umi nasión odesidíta omeʼẽ ipodér ha ijautorida pe animál salváhepe? Nahániri. Pe profesía ohechauka Jehová voi omomyitaha umi goviérnope ojapo hag̃ua upéva (Prov. 21:1; ekompara Isaías 44:28 heʼívare). ¿Ontregáta piko umi nasión pe podér orekóva saʼi saʼípe ha mbeguekatúpe? Ndaupeichaiete katu, degolpete voi ontregáta hikuái. Upémarõ pe animál salváhe oipurúta upe autorida oñemeʼẽ ramoitéva chupe, ha ohundipaitéta pára siémpre enterove umi rrelihión japúpe.
¿Mbaʼépa ñahaʼarõ oiko amo gotyove? Nañapensái vaʼerã jahechataha umi notísiape umi goviérno oapojavetaha ohóvo mbeguekatúpe pe Naciones Unídaspe. Upéva rangue Jehová omoĩta degolpete voi umi nasionkuéra akãme pe idéa ontrega hag̃ua ipodér pe animál salváhepe. Jahecha vove oikoha upéva, jaikuaátama pe jehasa asy guasu oñepyrũtamaha. Ñahaʼarõ aja oiko koʼã mbaʼe “aníkena jake”, “síno japyta japayhápe ha jasegi ñapensa hendaitépe”. ¡Koʼã kámbio oikóta hína degolpete! (1 Tes. 5:6).