Ñande ikatu jajesalva ñapenáramo pe avísore

ÁÑO 2004-pe, el 26 de diciembre, oiko peteĩ terremóto tuichaitereíva ísla de Simeulúepe, opytáva noroéste gotyo ísla de Sumátragui (Indonesia). Umi hénte omañambajoa pe mar rehe, pórke pe y tuichaiterei oguejy de rrepénte. Ha pyaʼeterei oñepyrũ odipara hikuái umi lugár ijyvatevehápe ha osapukái ohóvo: “¡Smong! ¡Smong!”, heʼiséva sunámi. Ohasa mboyve 30 minúto, umi oláda ndetuichapa jepéva ojejapete pe kóstare, ha ohundi hetaiterei óga ha puévlo oĩva pe mar ypýpe.

Pe sunámi og̃uahẽ vaʼekue ísla de Simeulúepe raẽvete, péro umi 78.000 persóna oikóvagui upépe, siétente omano. ¿Mbaʼérepa?a Peteĩ ñeʼẽnga upe islapegua heʼi: “Eñandúrõ pe yvy oryryiha ha pe mar oguejyha, pyaʼe porãntema edipara peteĩ alturahápe, pórke ag̃aite pe mar ojejapetéta pe kóstare”. Umi hénte upepegua opilláma og̃uahẽta jave peteĩ sunámi, pórke heta vésema ohecha mbaʼépa oiko pe mar rehe péicha jave. Haʼekuéra ojesalva opena rupi pe avísore.

La Biblia oñeʼẽ avei peteĩ mbaʼe vai oikótavare, heʼi outaha peteĩ “jehasa asy guasu, arakaʼeve oikoʼỹ haguéicha ko múndo ñepyrũmby guive koʼág̃a peve, ha upe rire ndoikomoʼãvéima arakaʼeve” (Mateo 24:21). Péro upéva ndeʼiséi ko planéta oñehunditaha, tahaʼe umi hénte ombyaipágui la oĩva pype térã oikógui peteĩ sarambi guasu ivaietereíva. Ñandejára ningo ojapo vaʼekue ko planéta opyta hag̃uáicha pára siémpre (Eclesiastés 1:4). Añetehápe pe “jehasa asy guasu” og̃uahẽta hína ikatu hag̃uáicha Ñandejára ohundi “umi ohundívape ko yvy”. Upéva rupive opáta opaichagua sufrimiénto ha oñehundíta umi hénte iñañávape (Apocalipsis 11:18; Proverbios 2:22). ¡Ajépa iporãite ko notísia!

Oiko jave umi sunámi, yvyryrýi térã okapu jave umi volkán, omano jepi heta hénte inosénte. Péro Ñandejára, hérava Jehová, ndojapomoʼãi upéva. La Biblia heʼi voi haʼe haʼeha mborayhu, ha haʼe opromete: “Umi hembiapo porãvape oñemeʼẽta ko yvy, ha oikóta pype opa ára g̃uarã” (1 Juan 4:8; Salmo 37:29, NM). ¿Mbaʼépa nde ikatu rejapo rejesalva hag̃ua ha rehupyty hag̃ua Ñandejára vendisión? Upearã epena vaʼerã pe avísore.

EÑATENDÉKENA UMI KÁMBIO OIKÓVARE

Ñande ndaikatúi jaikuaa arakaʼetépa Ñandejára ohundíta umi iñañávape opa hag̃ua pe sufrimiénto, ha Jesús heʼi vaʼekue voi: “Upe día ha upe óra avave ndoikuaái, ni umi ánhel yvagapegua, ni pe Taʼýra. Pe Túva añoite oikuaa”. Upévare haʼe ñanemokyreʼỹ vaʼekue ‘ñañatende porã hag̃ua jaikóvo’ (Mateo 24:36; 25:13). ¿Mbaʼére ñañatende vaʼerã? La Biblia ohechauka porã mbaʼépa oiko vaʼerã og̃uahẽmbotávo pe tiémpo Ñandejára ohunditahápe umi iñañávape. Umi oikóva Simeulúepe opilla og̃uahẽtaha peteĩ sunámi ohechávo mbaʼépa oiko pe mar rehe, ha upéicha avei ñande ikatu japilla hiʼag̃uimaha pe fin jahechávo umi mbaʼe oikóva ko múndope. Pe rrekuádro ohechauka mbaʼe mbaʼépa heʼi vaʼekue la Biblia oiko vaʼerãha.

Añetehápe umi mbaʼe la Biblia heʼíva oikóma vaʼekue voi yma guive peteĩteĩ. Péro Jesús heʼi vaʼekue jahechávo oikoha “opa koʼã mbaʼe” japillataha hiʼag̃uimaha pe fin (Mateo 24:33). Epensamíntena, ¿arakaʼépa oikóva koʼã mbaʼe opárupi ko yvy ape ári, peteĩ tiempopepa ha oho vai vaive hese? Koʼã mbaʼe oiko ko tiémpope añoite ha upéva ohechauka porã hiʼag̃uimaha pe fin.

ÑANDEJÁRA ÑANDEAVISA

Peteĩ presidénte Estados Unidospegua heʼi vaʼekue voi: “Umi mbaʼe ojejapóva ojeavisa hag̃ua voimíre [umi pelígrogui] ikatu oporosalva”. Por ehémplo, oiko rire pe sunámi áño 2004-pe oñemoĩ peteĩ sistéma ikatu hag̃uáicha ojeavisa umi héntepe oikóta jave peichagua sarambi pono hetaiterei jey omano. Upéicha avei Ñandejára oñenkargáma ojeavisa hag̃ua umi héntepe pe fin hiʼag̃uimaha. La Biblia heʼi: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi, ha upéi og̃uahẽta pe ára pahaite” (Mateo 24:14).

Pe áño ohasa vaʼekuépente, umi testígo de Jehová odedika mas de 1.900 millones de óra opredika hag̃ua pe marandu porã 240 país ha territóriope, mas de 700 idiómape. Ko tembiapo ojejapóva hína ohechauka porãiterei añetehápe hiʼag̃uimbaitemaha pe fin. Umi testígo de Jehová ohayhueterei hapichakuérape, upévare oñehaʼãmbaite oavisa umi héntepe koʼẽrõitéma Ñandejára ohusgataha yvyporakuérape (Mateo 22:39). Ko avíso og̃uahẽ avei ndéve, ha upéva ohechauka porã mbaʼeichaitépa Jehová nderayhu. Nemanduʼákena, Ñandejára ndoipotái “avave oñehundi; oipota guei enterove oñarrepenti” (2 Pedro 3:9). ¿Remombaʼétapa Ñandejára ojapóva nderehehápe ha repenáta ko avísore?

¿REJESALVÁTAPA?

Umi hénte oikóva pe kóstare ísla de Simeulúepe ojesalva odipara rupi umi lugár ijyvatevehápe ohechávo pe mar oguejyha, nohaʼarõi hikuái ojupi raẽ jey. Péicha avei, jajesalva hag̃ua og̃uahẽ vove pe jehasa asy guasu koʼág̃ama jakuʼe vaʼerã, tardeterei mboyve. ¿Ha mbaʼe la jajapo vaʼerã? Proféta Isaías oñeʼẽ vaʼekue peteĩ mbaʼe oikótavare “umi ára pahápe”, térã ñane tiémpope. Haʼe omombeʼu ojejapotaha ko invitasión la héntepe: “Pejúna, jaha jajupi Jehová montáñape [...]. Haʼe oikuaaukáta ñandéve hape ha jaikóta haʼe oipotaháicha” (Isaías 2:2, 3, NM).

Peteĩ montáña ári guive ningo ikatu ojehecha mombyry ha umi oĩva upépe ikatu avei ojeprotehe umi oládagui. Péicha avei, Ñandejára oprotehéta umi ‘oikóvape haʼe oipotaháicha’, koʼãva hína umi oaprendéva la Biblia heʼíva ha okambia hekove (2 Timoteo 3:16, 17). Ñandejára ningo oguerohoryeterei umichagua persónape.

¿Reaseptátapa pe invitasión ikatu hag̃uáicha Ñandejára ndeprotehe avei ndéve koʼã tiémpo ijetuʼuetévape? Romokyreʼỹ reanalisa porã hag̃ua umi pruéva oĩva la Bíbliape ohechaukáva ñaimemaha “umi ára pahápe”, ohechaukaháicha pe rrekuádro. Oiméramo rentende porãseve mbaʼéichapa ikatu resegi umi konsého oĩva la Bíbliape rejesalva hag̃ua, umi testígo de Jehová vyʼápe nepytyvõta. Ikatu avei retopa la rrespuésta umi mbaʼe reikuaasévape ore páhina de Internétpe, www.jw.org/gug.