Ñaipytyvõkena ñane estudiantekuérape osẽma hag̃ua opredika
1 Mateo 28:19, 20 heʼívaningo oñekumpli koʼág̃a peve. Jesús heʼi hemimboʼekuérape oipytyvõ hag̃ua hapichápe oiko hag̃ua chugui hemimboʼe, ha koʼãva oipytyvõvaʼerã avei ambue hapichakuérape. Upe tembiapo Jesús omoñepyrũvaʼekue oñemohuʼãmbotaitehína koʼág̃a. Ko ára pahápe ningo ojejapohína upéva oparupiete ko Yvy ape ári (Mat. 24:14).
2 Umi ostudiáva la Biblia apytépe ikatu oĩhína ñane familiakuéra ha umi tapicha oaprendeséva. Ha ñande ningo ñaipytyvõse chupekuéra oipytyvõ hag̃ua avei hapichakuérape oiko hag̃ua Jesucristo remimboʼéramo (Luc. 6:40).
3 Ñaipytyvõkena chupekuéra opredika hag̃ua. Ñamokyreʼỹvaʼerã ñane estudiántepe oñeʼẽ hag̃ua hapichakuérape umi mbaʼe oaprendévare. Ñamombeʼuvaʼerã chupekuéra umi mbaʼe porã jahasavaʼekue predikasiónpe. Ñamboʼékena ñane familiakuérape michĩmi guive opredika hag̃ua ikatuháicha chupekuéra (Sal. 148:12, 13). Jahechaukákena jaʼéva ha jajapóva rupive ñamombaʼeha ñane predikasión (1 Tim. 1:12).
4 Jehová ningo oiporu umi iñeʼẽrendúvape añoite. Ha peteĩ puvlikadór pyahu ningo ndoikuaái gueteri heta mbaʼe peteĩ ermáno aréma opredikávaicha. Upéicharõ jepe, ogueroviavaʼerã umi mbaʼe iñimportantevéva la Biblia omboʼéva ha omyesakãkuaavaʼerã (jahechami heʼíva Organizados, páh. 79-82). Haʼe osẽtemavaʼerã ‘Babilonia Guasúgui’ ha opaichagua polítikagui, ha oho meme vaʼerã avei rreunionhápe (Rev. 18:2, 4; Juan 17:16; Heb. 10:24, 25).
5 Ha oiméramo peteĩ ñane estudiánte oĩma osẽ hag̃uáicha opredika ojevautisaʼỹre, jaʼevaʼerã pe superintendénte presidéntepe. Haʼe ojeruréta mokõi ansiánope oñeʼẽ hag̃ua ñanendive ha ñane estudiánte ndive. Upéicha oikuaáta hikuái ikatútamapa osẽ opredika ojevautisaʼỹre. Upe rire, ñande ñasẽ meme vaʼerã japredika ñane estudiánte ndive ikatu hag̃uáicha oñembokatupyryve avei.