Jaiporu porãkena ñane tiémpo ñasẽ jave japredika
1 Añetehápe heta ñane rembiaporã ha saʼietereíma ñane tiémpo jajapopa hag̃ua (Juan 4:35; 1 Cor. 7:29). Péro ñamohenda porãramo opa mbaʼe jajaposéva, ikatu jaiporu porã ñane tiémpo ñasẽ jave japredika.
2 Jajepreparákena. Jaha mboyve pe rreunión ojejapóvape ojepredika hag̃ua, jahechavaʼerã mbaʼe puvlikasiónpa ñaikotevẽta ha jaikuaa porãma vaʼerã mbaʼépa jaʼéta umi óga járape. Oñeñemboʼepa vove, jahamavaʼerã japredikatahápe. Upéicharõ opavave jaiporu porãta ñane tiémpo.
3 Ha oiméramo nde remoakãvaʼerã pe rreunión oñesẽ hag̃ua predikasiónpe, remoñepyrũvaʼerã oraitépe ha mbykymínte, diez térã quince minútonte vaʼerã. Ere mboyve ojehóma hag̃ua territóriope, rehechavaʼerã enterovépa oikuaáma mávandipa osẽta ha moõpa.
4 Japredika jave. Aníkena ñamakanea opa rire pe rreunión, ensegída jahamavaʼerã pe territóriope. Ñasẽ jave ñane ermanokuéra ndive, ñapensavaʼerã ikatuha ohaʼarõhína hikuái ñañemongetapa raẽ peteĩ óga jára ndive. Upéicharõ, iporãve vaʼerã jaʼe umi ñanerendu porãvape jaha jeytaha ñañemongetave hag̃ua ha umi ojodiskutisévagui katu jajedespedi porãnte vaʼerã (Mat. 10:11).
5 Jajapótaramo rrevisíta peteĩ várriope, jajapopamavaʼerã umi jarekomíva guive pono jaha heta vése. Sapyʼánte iporãvéta ñahenói teléfonope ñande rrevisítape jaikuaa hag̃ua oĩtapa hógape (Pro. 21:5). Ha ñande arétaramo peteĩ rrevisítape, umi ermanokuéra ikatúma opredika upe jerére térã ojapo avei ambue rrevisíta.
6 Koʼág̃a rupi ningo ñaipytyvõvaʼerã hetaiterei tapicha oikuaasévape Ñandejárape (Mat. 9:37, 38). Koʼẽrõitéma ndajajapomoʼãvéi ko tembiapo. Upévare jaiporu porãkena ñane tiémpo ñasẽ jave japredika.