Jahejákena Jehová tañanerekomboʼe
‘Opa mbaʼe ikatu vaʼerãmoʼã areko, ndahaʼéi chéve mbaʼevete, ambojojávo pe tuichaite mbaʼe ajúvare aikuaa, Cristo Jesúspe.’ (FILI. 3:8, BNP.)
1, 2. Mbaʼépa odesidi ojapo heta kristiáno ha mbaʼérepa?
ROBERT ningo imitã guive ivaleterei eskuélape. Orekórõ guare ocho áño peteĩ iprofesóra oho hógape ha heʼi chupe ikatuha hetaiterei mbaʼe porã ohupyty upévare. Ha heʼi voi hiʼãitereiha chupe oiko chugui doktór. Robert ningo inóta porãiterei ha ikatu voi kuri oike umi universida iñimportantevévape. Péro omboyke pe oportunida orekóva henonderãme ha ojapo iprekursorádo rregulár.
2 Hetaiterei kristiáno oĩ avei orekóva oportunida Robert oreko haguéicha ohupytývo heta mbaʼe ko múndope. Péro umíva apytégui oĩ avei heta odesidíva omboyke umi mbaʼe ombaʼapove hag̃ua Jehová servísiope (1 Cor. 7:29-31). Mbaʼérepa ombaʼapove hikuái Jehová servísiope? Ohayhúgui Jehovápe ha ohechakuaa rupi avei Jehová ñanerekomboʼe porãveha. Reñeporandúmavapa mbaʼépa oikovaʼerãmoʼã ndehegui nderestudiáirire la Biblia? Jajepyʼamongetamivaʼerã umi mbaʼe porã jahupytývare Jehová ñanerekomboʼe rupi. Upéicharõmante ñamombaʼevéta pe marandu porã ha kyreʼỹme ñamombeʼúta ñande rapichakuérape.
Ñamombaʼete ningo Jehová ñanemboʼe haguére
3. Mbaʼéichapa jaikuaa Jehová omboʼeseha yvyporakuéra imperféktope?
3 Jehová ningo imbaʼeporãiterei rupi omboʼese yvyporakuéra imperféktope. Isaías 54:13-pe ningo heʼi voi umi ungídore: ‘Ñandejára ohekomboʼéta ifamiliakuérape. Opavave oiko porãitereíta’. Péicha avei oikóta umi ambue ‘ovechakuérare’ (Juan 10:16). Ha mbaʼéichapa jaikuaa upéva? Jahecha rupi oñekumpliha peteĩ profesía Isaías ohaivaʼekue. Haʼe ningo peteĩ visión rupive ohecha hetaiterei hénte oúva opa tetãgui omombaʼeguasu hag̃ua Ñandejárape. Ha heʼi hikuái: ‘Jajupi Ñandejára montáñape, Jacob Jára róga guasúpe. Ñandejára ñanerekomboʼéta ha jaguatáta avei hapére’ (Isa. 2:1-3, ÑÑB). Ajépa tuichaite mbaʼe, Jehová voi ohekomboʼéta chupekuéra!
4. Mbaʼépa tekotevẽ jajapo Jehová ñanerekomboʼe hag̃ua?
4 Mbaʼépa tekotevẽ jajapo Jehová ñanerekomboʼe hag̃ua? Tekotevẽ ñandepyʼaporã ha jaheja chupe tañanerekomboʼe. Pe salmísta David heʼi voi: ‘Jehová ningo imbaʼeporã ha imarangatu. Ohekomboʼe umi ipyʼaporãvape oguata hag̃ua hapére’ (Sal. 25:8, 9). Ha Jesús heʼivaʼekue avei: ‘Romombaʼeguasu che Ru yvága ha yvy Jára reñomi haguére koʼã mbaʼe umi iñarandu ha heta mbaʼe oikuaávagui ha reikuaauka umi iñaranduʼỹvape’ (Luc. 10:21). Ajépa ndahasyiete jahayhu hag̃ua Jehovápe! Haʼe ningo ‘ipyʼaporã umi oñemomirĩva ndive’ (1 Ped. 5:5, ÑÑB).
5. Mbaʼéicha rupípa ñande jaikuaa Jehovápe?
5 Ikatúpa jaʼe jaikuaa hague Ñandejára Ñeʼẽ ñanearandúgui ha ñandejehegui reínte? Nahániri, ñande ningo ni mbaʼevéicharõ ndajaikuaamoʼãi Ñandejárape ñandejehegui reínte. Jesús heʼivaʼekue: “Avave ndaikatúi ou cherendápe ndoguerúiramo chupe che Ru, upe chembouvaʼekue” (Juan 6:44). Upeichaite, Jehová ningo la oguerúva iñorganisasiónpe umi ipyʼaporãvape ha upéva ojapo predikasión ha ijespíritu sánto rupive (Ageo 2:7). Remombaʼépa Jehová ndegueru haguére iñorganisasiónpe? (Jaleemína Jeremías 9:23, 24.)
Jehová ñanemboʼe rupi jaiko porãve
6. Mbaʼérepa tuichaite okambia umi oikuaáva Jehovápe?
6 Peteĩ ehémplo neporãva rupive, pe proféta Isaías ohechauka koʼág̃a rupi hetaiterei oĩha okambiáva. Pór ehémplo heta tapicha yma oñorairõsentevaʼekue koʼág̃a ipyʼaguapy (jaleemína Isaías 11:6-9). Oĩvaʼekue avei ndochaʼéiva ojuehe ambue tetãygua haguére, hũ térã morotĩ haguére. Ha koʼág̃a oiko porãmba oñondive pyʼaguapýpe. Añetehápe ningo ikatu jaʼe ‘ikyse pukúgui ojapoha hikuái arádo’ (Isa. 2:4). Mbaʼérepa peichaite okambia hikuái? Oikuaa rupi Jehovápe ha ojapo hembipota. Ñandejára siervokuéra ningo iñimperféktoramo jepe oservi Jehovápe peteĩ ñeʼẽme ha oiko hikuái oñopehẽnguéicha. Pe marandu porã oñemombeʼúva oparupiete ha umi mbaʼe porã ojehupytýva upéva rupi ohechauka ndaiporiha Jehová omboʼéva rasaharã (Mat. 11:19).
7, 8. a) Mbaʼépa umi mbaʼe Ñandejára Ñeʼẽ ikatúva oity yvýre? b) Mbaʼe ehémplopa ohechauka Ñandejára Ñeʼẽ okambiaha la héntepe?
7 Apóstol Pablo ombojoja pe predikasión peteĩ gérra rehe. Haʼe heʼi: ‘Ndahaʼéi ñañorairõva umi mbaʼe yvypóra oiporúva reheve oñorairõ hag̃ua. Ñañorairõ Ñandejára puʼaka rupive, ikatúva oity yvýre, ha upéi ohundi opa mbaʼe ojeʼéva ani hag̃ua ojekuaa Ñandejárape’ (2 Cor. 10:4, 5). Mbaʼépa umi mbaʼe Ñandejára Ñeʼẽ ikatúva oity yvýre? Umi japu omboʼéva rrelihionkuéra, kávala, filosofía ha ambue mbaʼe (Col. 2:8). Ñandejára Ñeʼẽ ningo oipytyvõ la héntepe okambia ha oheja hag̃ua hembiapo vai ha oiko hag̃ua Jehová oipotaháicha (1 Cor. 6:9-11). Oipytyvõ avei chupekuéra oiko porãve hag̃ua hogapýpe, ovyʼa ha omombaʼeve hag̃ua hekove. Koʼã mbaʼe ningo la ñaikotevẽva koʼág̃a rupi.
8 Jahechakuaa avei la hénte naimondaiha, Jehová omboʼe rupi chupekuéra. Jahechamína upéva ko ehémplope (Heb. 13:18). Índiape peteĩ kuñakarai ostudia la Biblia ha upéi opredikáma ojevautisa mboyve. Peteĩ árape, ohokuévo hógape ombaʼapopa rire construcción de Salón del Reino-pe ojuhu yvýpe peteĩ kadéna de óro kolektívo parádape. Ha imboriahúramo jepe haʼe odesidi oguerahávo omeʼẽ komisaríape ha oho hendive peteĩ ansiáno ikongregasiongua. Pe polisía oñemongeta hague ni ndogueroviaséi pe kuñakarai oguerahaha omeʼẽ jey hag̃ua ijárape pe kadéna ovaléva 800 dólares. Upe rire ambue polisía oporandu pe kuñakaraípe mbaʼérepa ojapo upéicha. Ha haʼe heʼi: “Ñandejára Ñeʼẽ ningo okambia che rekove. Koʼág̃a oiko chehegui peteĩ kuñakarai ijoheipyréva”. Upéi upe polisía heʼi pe ansiánope: “Ko lugárpe oiko treinta y ocho millones tapicha. Ha nde rekonsegíramo diez jepe upéva apytégui okambia ko kuñakaraícha, iporãitereíta”. Ñandejára Ñeʼẽ ningo hetaiterei ñande rapichápema okambia ha upéicha rupi oiko porãve hikuái. Ajépa koʼã mbaʼe ñanemokyreʼỹ ñamombaʼeguasu hag̃ua Jehovápe!
9. Mbaʼépa oipytyvõ la héntepe okambia hag̃ua?
9 Ñandejára Ñeʼẽ ningo ipuʼaka ha Jehová ijespíritu sánto rupive oipytyvõ avei la héntepe okambia hag̃ua (Rom. 12:2; Gál. 5:22, 23). Colosenses 3:10-pe heʼi: ‘Pende rekove pembopyahúta, peikuaa rupi Ñandejára Ñeʼẽ, ha pekambia pehóvo pejogua hag̃ua Ñandejárape’. La Biblia ningo ipuʼaka ha ikatu oikuaauka mbaʼépa oĩ ñande rapicha pyʼapýpe ha oipytyvõ chupe okambia hag̃ua heta mbaʼépe (jaleemína Hebreos 4:12). Ha oikuaavévo Jehovápe oñepyrũma ojapo hembipota ha ikatúma oiko iñamígoramo. Upéicha avei umi tapicha oreko esperánsa oikovévo opa ára g̃uarã.
Jehová ñanemboʼe jahechakuaa hag̃ua mbaʼépa oikóta koʼẽrõite
10. a) Mbaʼérepa jaʼekuaa Jehová añoite ikatuha ñanepytyvõ? b) Mbaʼépa oikóta koʼẽrõitéma?
10 Jehová añoite oikuaa mbaʼépa oikóta koʼẽrõite, upéicha rupi haʼe ikatu ñanepytyvõ upearã. Jehová heʼimavaʼekue mbaʼépa ohaʼarõ yvyporakuérape (Isa. 46:9, 10). La Bíbliape heʼi voi ‘hiʼag̃uimaha Ñandejára ára guasu!’ (Sof. 1:14). Upévo oñekumplíta Proverbios 11:4: ‘Plataita nandesalvaichéne ára pahápe, tekojoja katu ndepeʼáne ñemanógui’. Jehová ohundíta vove ko múndo aña, iñimportantevéta hína ñaime porã hendive. Ñandepláta hetáramo jepe ndoservimoʼãi ñandéve mbaʼeverã. Pórke Ezequiel 7:19-pe heʼi voi: “Omombóne tapépe ipláta, omombóne hiʼóro ytyramoguáicha”. Ha koʼã mbaʼe jaikuaávo ñanepytyvõ jajedesidi hag̃ua koʼág̃ama voi jajepytaso Jehová ykére.
11. Emombeʼu mbaʼéichapa Jehová ñanemboʼe jajeprepara hag̃ua hiʼára guasu og̃uahẽ meve.
11 Jehová ñanemboʼévo ñanepytyvõ jahecha hag̃ua mbaʼépa ñamotenondevaʼerã ñande rekovépe. Apóstol Pablo ohaivaʼekue Timotéope: ‘Umi oguerekóvape mbaʼeta ko yvy ári ere ani hag̃ua ojejapo térã ojerovia umívare, ndahaʼéire jeroviaha umíva. Tojerovia uvei Ñandejára rehe’. Péro nañanderríkoiramo jepe ko konsého ikatu ñanepytyvõ. Mbaʼérepa? Heʼi rupi ñandéve jaikorangue ñambyaty mbaʼéta, ñañehaʼã hag̃ua ‘jajapo iporãva ha tañanembaʼeta tembiapo porãme’. Ha ñamotenondéramo Ñandejára rembipota, heta mbaʼe porã ñaneraʼarõ (1 Tim. 6:17-19, BNP). Ñañemeʼẽmbaitéramo Jehová servísiope jahechaukáta ñanearanduha. Jesús voi heʼivaʼekue: “Mbaʼépa oguenohẽne pe kuimbaʼe oguerekopáramo ko múndo ipópe, ha oñehundíramo haʼe?” (Mat. 16:26, 27, BNP). Hiʼag̃uimbaitéma rupi Jehová ára guasu, iporã ñañeporandu: “Moõpa che ambyatyʼaína mbaʼeta? Chépa Ñandejára rembiguái térã mbaʼeta rembiguái?” (Mat. 6:19, 20, 24).
12. Mbaʼérepa nañamboguapyivaʼerã ñandejehe oĩramo nomombaʼéiva pe marandu porã?
12 Umi tembiapo iporã ha iñimportantevéva jajapovaʼerã apytépe oĩ japredika ha ñamboʼe ñande rapichakuérape Ñandejára Ñeʼẽ (Mat. 24:14; 28:19, 20). Péro oĩ avei nomombaʼéiva pe marandu porã jagueraháva, oiko haguéicha síglo primérope (jaleemína 1 Corintios 1:18-21). Upéva ndeʼiséi naiñimportanteiha pe marandu jagueraháva ni ko tembiapo jajapóva koʼág̃a oĩ reheve tiémpo. Upéva rupive ningo heta ñande rapicha ikatu hína ojesalva (Rom. 10:13, 14). Ñande avei heta mbaʼe porã jahupytýta ñaipytyvõramo ñande rapichakuérape Jehová ohekomboʼe hag̃ua chupekuéra.
Ñañehaʼãramo hetaiterei mbaʼe porã jahupytýta
13. Mbaʼépa apóstol Pablo ojapo pe marandu porã rehehápe?
13 Apóstol Páblope imitã guive oñemboʼe ijestudio porã hag̃ua. Haʼe ningo oikovaʼekue Társope, ha oreko 13 áño rupínte ohórõ guare Jerusalénpe omboʼe hag̃ua chupe Gamaliel. Upéva ningo peteĩ mboʼehára katupyry (Hech. 22:3). Páblope oho porãiterei ha osegírire upépe ohupytyvaʼerãmoʼã heta mbaʼe pe hudaísmope (Gál. 1:13, 14). Péro oiko rire chugui Jesús remimboʼe, oñepyrũma opredika ha ohejapaite umi mbaʼe. Ombyasýpa ojapo haguére upéicha? Nahaniriete katu. Haʼe voi ohai péicha: ‘Opa mbaʼe ikatu vaʼerãmoʼã areko, ndahaʼéi chéve mbaʼevete, ambojojávo pe tuichaite mbaʼe ajúvare aikuaa, Cristo Jesúspe. Cristo rayhupápe ahejavaʼekue opa mbaʼe ha umíva ahecha ytýramo’ (Fili. 3:8, BNP).
14, 15. Mbaʼe mbaʼépa jahupyty ñaipytyvõ rupi Ñandejárape hembiapópe?
14 Apóstol Pablo ojapo haguéicha, oĩ avei koʼág̃a rupi Ñandejára siervokuéra ohejáva heta mbaʼe pe marandu porã rehehápe (Mar. 10:29, 30). Oikotevẽpa hikuái ojapo haguére upéicha? Jahechamína mbaʼépa heʼi Robert, hese ñañeʼẽkuri oñepyrũvo ko artíkulo. Haʼe heʼi: “Nambyasýi ni michĩmi ajapo haguére che prekursorádo. Avyʼaiterei katu ha ahecha mbaʼeichaitépa ‘Jehová imbaʼeporã’ chendive. Heta mbaʼe aheja ambaʼapove hag̃ua Jehová servísiope. Upévare Haʼe katuete cherovasa ha omeʼẽ hetaiteve chéve pe ahejavaʼekuégui. Ha amo ipahápe haʼete voi ku ndahejaivaʼekue mbaʼeve, mombyryeterei ningo agana”. Heta ermáno oĩ avei opensáva upéicha (Sal. 34:8; Pro. 10:22).
15 Oimérõ aremi guivéma repredika ha remboʼe Ñandejára Ñeʼẽ, rehechakuaámane avei mbaʼeichaitépa Jehová imbaʼeporã. Ha rehechakuaámavapa Ñandejára espíritu sánto nepytyvõha repredika jave? Oimevaʼerã rehecháma mbaʼéichapa hova rory asy umi hénte ohendúvo pe marandu porã (Hech. 16:14). Ha nepytyvõmavapa Jehová espíritu rembohovái hag̃ua umi mbaʼe ndejokoséva repredikave hag̃ua? Oimevaʼerã rehecháma mbaʼéichapa Jehová puʼaka nepytyvõ ha nemombarete reaguanta hag̃ua umi mbaʼe ijetuʼúva (Fili. 4:13). Jahechakuaáramo mbaʼeichaitépa Jehová ñanepytyvõ japredika jave ñañandúta ag̃uieterei ñaimeha chugui ha ñañemoag̃uisevéta hese (Isa. 41:10). Ajépa tuichaite mbaʼe ñaipytyvõ Ñandejárape hembiapópe ñamombeʼúvo pe marandu porã ñande rapichakuérape! (1 Cor. 3:9.)
16. Mbaʼépa nde ere umi mbaʼe rehejávare reipytyvõ hag̃ua nde rapichakuérape?
16 Heta oĩ ojaposéva peteĩ mbaʼe oiko hag̃uáicha hese manduʼa upe rire. Péro jaikuaa porã tahaʼe haʼéva pe jahupytýva ko múndope opytataha tesaráipe. Péro avave ndahesaraichéne umi mbaʼe Jehová ojapóvagui omopotĩ hag̃ua héra (Pro. 10:7; Heb. 6:10). Upéicharõ ñamombaʼékena ikatu haguére ñaipytyvõ ñande rapichakuérape Jehová ohekomboʼe hag̃ua chupekuéra.
Rembohovaimína koʼã porandu
• Mbaʼépa tekotevẽ jajapo Jehová ñanerekomboʼe hag̃ua?
• Mbaʼérepa heta oĩ oiko porãvéva Jehová omboʼe rupi chupekuéra?
• Mbaʼe iporãvapa jahupytýta ñañehaʼãramo ñaipytyvõ ñande rapichakuérape?
[Nóta oĩva taʼanga ndive páhina 23]
Jehová ohekomboʼéva guive ningo oiko oñoermánoicha
[Nóta oĩva taʼanga ndive páhina 24]
Ajépa tuichaite mbaʼe ñaipytyvõ Ñandejárape hembiapópe!