**Heta mbaʼe pyahu ogueru ñane Ñemañaha!**

Koʼág̃a guive Ñemañaha ogueru heta mbaʼe ipyahúva. Umíva omoporãve ñande rrevísta ha ñanepytyvõvéta ñahesaʼỹijo jave umi mbaʼe porãita oĩva Ñandejára Ñeʼẽme (Sal. 1:2; 119:97).

Ojapóma cuatro áño oñeguenohẽ hague mokõi Ñemañaha. Peteĩva ojejapo opaichagua tapichápe g̃uarã. Ambue katu umi testígo de Jehová ha estudiantekuérape g̃uarã, oñehaʼãva omombarete ijerovia.

Peteĩ ermáno heta áñorema oservíva Jehovápe omombeʼu: “Aleérõ guare pe primer Ñemañaha osẽvaʼekue oñehesaʼỹijo hag̃ua rreunionhápe, haʼe: ‘Ajépa oñemyesakã porãite ñandéve umi mbaʼe hypyʼũva oĩva Ñandejára Ñeʼẽme!’. Naponderapavéi voi mbaʼeichaitépa iporã, che korasõite peve og̃uahẽ. Aagradese che pyʼaite guive ko jopói porãitére”. Ambue ermáno katu ohai: “Hiʼãitéma chéve aguapy ha ahesaʼỹijo porã che Biblia reheve”. Katuete oiméne nde reñeñandu avei upéicha.

Nemanduʼa piko arakaʼépa oñeguenohẽ ypy vaʼekue Ñemañaha? Ingléspe oñeguenohe 1879 guive! Ko mbaʼe porãite ojejapo Jehová ovendesi ha oipytyvõgui iñorganisasión ijespíritu rupive (Zac. 4:6). Umi 133 áño ohasávape heta vésema oñekambia ijape. Ko áño 2012 guive káda rrevísta orekóta ijapére diferénte taʼanga ohechaukátava mbaʼéichapa ojepredika. Upéva akóinte ñanemomanduʼáta ñamombeʼuvaʼerãha opárupi ha hekoitépe pe marandu porã oñeʼẽva Jehová Sãmbyhy rehe (Hech. 28:23). Páhina 2-pe katu oĩ jeýta upe taʼanga, ha oñemombeʼúta moõguápa ha mbaʼéichapa ojepredika upe lugárpe. Káda més ñanemomanduʼáta ñamyerakuãha pe marandu porã “opárupi ko yvy jerekuévo” (Mat. 24:14).

Péro hetave mbaʼe pyahu oĩ ko rrevístape. Pór ehémplo, umi artíkulo ñahesaʼỹijótavape, oñepyrũre oñemoĩma porandukuéra rrepasorã ikatu hag̃uáicha ñanemanduʼa umi párte iñimportantevévare. Péicha jahechakuaátama mbaʼépa ñanemboʼese ha ñañehaʼãta ñambohovái jajeprepara jave rreunionrã. Jepiveguáicha koʼã porandu ojeporúta opakuévo pe Ñemañaha ñehesaʼỹijo, ikatu hag̃uáicha ñanemanduʼa jey umi mbaʼe ñaaprendevaʼekuére. Avei jahecháta pe páhina jerére nandiveha ñamoĩ hag̃ua ñane nóta jajepreparávo. Umi número ohechaukáva káda páhina ha párrafo tuichave koʼág̃a.

Avei oreko mokõi seksión ipyahúva. Peteĩva héra “Manduʼarã”. Oñemyesakãháicha upe pártepe, ñanepytyvõta ñanemanduʼa jey hag̃ua umi mbaʼe iñimportantevévare ojapovaʼekue Jehová rembiguaikuéra ñane tiempopegua. Pe ótro seksiónpe, hérava “Kyreʼỹme oñekuaveʼẽ hikuái”, oñemombeʼúta jepi ñane ermanokuéra ohasáva koʼág̃a rupi, ha ohechaukáta mbaʼeichaitépa ovyʼa hikuái oservívo Jehovápe umi lugár oñekotevẽtereihápe maranduhárare.

Hiʼãite ningo oréve ko rrevísta penepytyvõ ha penemokyreʼỹ pehesaʼỹijo jave Ñandejára Ñeʼẽ.

Umi ojapóva ko rrevísta