Ukraine Zaberɛ La Basɛ Ti Dipɔ’ɔsegɔ Malum Gaŋɛ La Nu’usi Tingole Wa Zɛ’an Woo Poan

May 19, 2022, nɛrezureba n gaŋɛ piyopɔi la banuu n daa yele United Nations Security Council la ti “Ukraine zaberɛ la basɛ ti COVID-19 bã’a la n wi’iri la, la tingɔŋɔ wa n sa’ani se’em n ta’asɛ dipɔ’ɔsegɔ sɛka la nyaa ba’ɛ gaŋɛ la bala, ti daanse’ere tisi basɛba poan, nɛreba wan vibera.” Dene pooren, The Economist gɔŋɔ la me yeti “ho san dekɛ yeledaaŋɔ seto n puɣum bɔna tingɔŋɔ wa zuo la biŋe kinkɛleŋa, zaberɛ la wan basɛ ti nɛreba zo’e zo’e vibe mɛ.” Baabule la yuun tɔɣɛ biŋe ti dipɔ’ɔsegɔ wan bɔna tomam dabesa wa poan ge la me pa’alɛ to la sɛla n wan soŋɛ tɔ ti to ta’an ŋmibe.

Baabule la tɔɣɛ biŋe ti dipɔ’ɔsegɔ wan bɔna

•  Yezu yuun tɔɣɛ biŋe ti: “Tiŋa wan isige zabɛ la tiŋa ti sɔ’ɔlum kayima me isige zabɛ la sɔ’ɔlum kayima ge ti dipɔ’ɔsegɔ wan bɔna.”​—Matu 24:7.

•  Baabule poan Liligere gɔŋɔ la tɔɣɛ la wɔ̃sum poan yibã’areba banaasi yele. Yibã’areba la ayima ze’ele bo la zaberɛ. Se’em n taɣelɛ en la me ze’ele bo la kom, sansɛka ti la wan kpe’em ti ho nyɛ dia ge ti nɛreba me wan pa’asa dia ligeri zo’e zo’e. “Ti mam daa nyɛ yesabega ge ti se’em n bã ka la daa zãli la maɣesega a nu’o poan. Mam daa wum la sɛla n wɔ̃ni la kɔ̃a . . . n yeti: ‘Witi witi lapika wan dɛna dabeserɛ muunɛ yɔɔrɛ! Ti mui lapiɣisi sitã me wan dɛna dabeserɛ yɔɔrɛ.’”​—Liligere 6:5, 6, Contemporary English Version.

Baabule yetɔɣebiŋere ana wa n tɔɣeri dipɔ’ɔsegɔ yele la kɔ’ɔn tuna tuuma mɛ tomam dabesa wa poan nananawa ti Baabule la yeti “ba’asegɔ dabesa la.” (2 Timoti 3:1) Ho san bɔta ti ho zamesɛ baŋɛ “ba’asegɔ dabesa la” la yibã’areba banaasi la ti Liligere gɔŋɔ la tɔɣɛ ba yele la pa’asɛ, bisɛ vidiyo la zuo n de Tiŋgɔŋɔ La Tee Mɛ Kɔ’ɔn Pɔsɛ Yuun 1914 la zaseŋɔ yele la zuo n de “Bani N De Yibã’areba Banaasi La?” (“The Four Horsemen​—Who Are They?”).

Baabule la n wan ta’an soŋɛ to se’em

•  Baabule la tari la ka’amsoŋɔ n wan soŋɛ tɔ ti to ta’an ŋmibe biɣi biɣi saŋa, hali la dipɔ’ɔsegɔ bii dia da’a n tɔi la. Kaalɛ zaseŋɔ yele wa zuo n de “Hon Wan Ta’an Dita Ligese’a Ti Ho Tara La Maɣesa Se’em” (“How to Live on Less”) bisɛ makerɛ ase’a.

•  Baabule la me basɛ ti to tara la beere sa’am puti’irɛ ti yɛla wan tee sɔ̃na bɛ’ɛna. La pu’ulumbiŋe ti saŋa keni na ti “dia wan ta buge tingɔŋɔ wa zuo” ti nɛra woo tara dia zo’e zo’e. (Yooma 72:16) Ho san bɔta ti ho zamesɛ baŋɛ Baabule beere sa’am puti’irɛ wa yele pa’asɛ, la sɛla n sɔi ti ho wan ta’an sakɛ ti de wan sirum tum, kaalɛ zaseŋɔ yele wa zuo n de “Tara Puti’irɛ Ti Beere Sa’am Wan Ta Ana Soŋa.”